ଭୁବନେଶ୍ଵର: ଖରିଫ୍ ଧାନ ସଂଗ୍ରହ ପାଇଁ ଅଗଷ୍ଟ ୨୫ ତାରିଖ ପର୍ଯ୍ୟନ୍ତ ପଞ୍ଜିକରଣ ଅବଧି ବଢ଼ାଇଛନ୍ତି ସରକାର । ଅବଧି ଶେଷ ପାଇଁ ଆଉ ମାତ୍ର ୨ଦିନ ବାକି ଥିବା ବେଳେ ବିଭିନ୍ନ ସ୍ଥାନରେ ପଞ୍ଜିକରଣ ପାଇଁ ଚାଷୀଙ୍କ ଲମ୍ବା ଧାଡ଼ି ଦେଖିବାକୁ ମିଳିଛି । ହେଲେ ଅନେକ ସ୍ଥାନରେ ଓ୍ବେବ୍ ସାଇଟ୍ ସ୍ଲୋ ହେଉଥିବାରୁ ଘଣ୍ଟା ଘଣ୍ଟା ଧରି ଅପେକ୍ଷା ପରେ ବି ପଞ୍ଜିକରଣରୁ ବଞ୍ଚିତ ହେଉଛନ୍ତି ଚାଷୀ । ଚାଷୀ ପଞ୍ଜିକରଣରେ ଜଟିଳ ପ୍ରକ୍ରିୟାକୁ ନେଇ ସରକାରଙ୍କୁ ଘେରିଛନ୍ତି ବିରୋଧୀ । ସେପଟେ ଯୋଗାଣ ମନ୍ତ୍ରୀଙ୍କ ଜବାବ୍ ଏଥର ପୂର୍ବ ରେକର୍ଡ଼ ଭାଙ୍ଗିବ ଚାଷୀ ପଞ୍ଜିକରଣ ।
ଅଗଷ୍ଟ ୨୫ ତାରିଖ ପର୍ଯ୍ୟନ୍ତ ପଞ୍ଜିକରଣ ଅବଧି ବଢ଼ାଇଛନ୍ତି ସରକାର । ଏଥିପାଇଁ ସମବାୟ କାର୍ଯ୍ୟାଳୟରେ ଦେଖିବାକୁ ମିଳିଛି ଚାଷୀଙ୍କ ଲମ୍ବା ଲାଇନ । ବରଗଡ ଜିଲ୍ଲାରେ ଅନେକ ଚାଷୀ ପଞ୍ଜିକରଣ ପାଇଁ ଅପେକ୍ଷାରେ ଅଛନ୍ତି । ହେଲେ ୱେବ୍ ସାଇଟ୍ ସ୍ଳୋ ଯୋଗୁଁ ଦିନ ତମାମ ଅପେକ୍ଷା ପରେ ମଧ୍ୟ ପଞ୍ଜିକରଣ କରିପାରି ନାହାନ୍ତି ଚାଷୀ । ଏପଟେ ଅବ୍ୟବସ୍ଥାକୁ ନେଇ ସରକାରଙ୍କୁ କଟାକ୍ଷ କରିଛନ୍ତି ବିରୋଧୀ । ବିଜେଡି କହିଛି, ପଞ୍ଜିକରଣ ପ୍ରକ୍ରିୟାକୁ ଜଟିଳ କରିବା ଦ୍ବାରା ଚାଷୀ ଅସନ୍ତୋଷ ବଢୁଛି । ସରକାର ଗ୍ରାଉଣ୍ଡକୁ ଯାଇ ବାସ୍ତବ ସ୍ଥିତି ଦେଖନ୍ତୁ । ସେପଟେ ସମାନ ଅଭିଯୋଗ ଆଣି ବର୍ଷିଛି କଂଗ୍ରେସ ।
Also read: ସୁସ୍ଥ ହୋଇ ମେଡିକାଲରୁ ଡିସଚାର୍ଜ ହେଲେ ମୁଖ୍ୟମନ୍ତ୍ରୀଙ୍କ ପତ୍ନୀ ପ୍ରିୟଙ୍କା ମାରାଣ୍ଡି
ସେପଟେ ବିରୋଧୀଙ୍କୁ ତଥ୍ୟ ସହ ଆଇନା ଦେଖାଇଛନ୍ତି ଯୋଗାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର । ମନ୍ତ୍ରୀ କହିଛନ୍ତି, ବର୍ତ୍ତମାନ ସୁଦ୍ଧା ୧୭ ଲକ୍ଷରୁ ଅଧିକ ଚାଷୀ ପଞ୍ଜିକରଣ କରିସାରିଛନ୍ତି । ସର୍ବାଧିକ ଚାଷୀ ପଞ୍ଜିକରଣ ହୋଇଥିବା ୫ ଜିଲ୍ଲାର ତଥ୍ୟ ଉପରେ ଟିକେ ନଜର ପକାନ୍ତୁ । ଗଞ୍ଜାମ ଜିଲ୍ଲାରେ ୧ଲକ୍ଷ ୨୫ହଜାର, ବରଗଡ଼ ଜିଲ୍ଲାରେ ୧ଲକ୍ଷ ୨୨ହଜାର, କଳାହାଣ୍ଡି ଜିଲ୍ଲାରେ ୧ଲକ୍ଷ ୯ହଜାର, ବାଲେଶ୍ବର ଜିଲ୍ଲାରେ ୯୩ହଜାର, ବଲାଙ୍ଗିର ଜିଲ୍ଲାରେ ୮୬ହଜାର ଚାଷୀ ପଞ୍ଜିକରଣ କରିଛନ୍ତି । କନ୍ଧମାଳ ଜିଲ୍ଲାରେ ସର୍ବନିମ୍ନ ୩ ହଜାର୨୦୦ ଚାଷୀ ପଞ୍ଜିକରଣ କରିଛନ୍ତି । ଚଳିତ ବର୍ଷ ୨୦ ଲକ୍ଷ ଚାଷୀ ପଞ୍ଜିକରଣ କରିବା ନେଇ ଲକ୍ଷ୍ୟ ରହିଛି ବୋଲି କହିଛନ୍ତି ମନ୍ତ୍ରୀ ।
ରାଜ୍ୟରେ ଚାଷୀଙ୍କୁ ନେଇ ରାଜନୀତି କିଛି ନୂଆ କଥା ନୁହେଁ । ବିଜେପି ସରକାର ଆସିବା ପରେ ଚାଷୀଙ୍କୁ ୮୦୦ ଟଙ୍କା ଇନପୁଟ ସବସିଡି ଦେଇ ମାଷ୍ଟର ଷ୍ଟୋକ ମାରିଥିଲେ । ଏମିତି କି ଧାନ କ୍ବିଣ୍ଟାଲ ପିଛା ୩୧୦୦ ଟଙ୍କା ହେବା ପରେ ଧାନ ଚାଷ ପାଇଁ ଚାଷୀଙ୍କ ଆଗ୍ରହ ବଢିଥିବା ଦେଖା ଯାଇଛି ।
କେଉଁ ଜିଲ୍ଲାରେ ପଞ୍ଜିକରଣ କରିଛନ୍ତି କେତେ ଚାଷୀ
ଜିଲ୍ଲା ଚାଷୀ ସଂଖ୍ୟା
ଗଞ୍ଜାମ ୧ ଲକ୍ଷ ୨୫ ହଜାର
ବରଗଡ ୧ ଲକ୍ଷ ୨୨ ହଜାର
କଳାହାଣ୍ଡି ୧ ଲକ୍ଷ ୯ ହଜାର
ବାଲେଶ୍ବର ୯୩ ହଜାର
ବଲାଙ୍ଗିର ୮୬ ହଜାର
