ନୂଆଦିଲ୍ଲୀ: ରତନ ଟାଟାଙ୍କ ବିୟୋଗ ପରଠୁ ଭାରତର ସର୍ବବୃହତ କଙ୍ଗଲୋମରେଟ୍‌ରେ ବିବାଦ ଲାଗି ରହିଛି । ଟାଟା ଗ୍ରୁପରେ ବୋର୍ଡ ସଦସ୍ୟଙ୍କୁ ନେଇ ବିବାଦ ସାର୍ବଜନୀନ ହୋଇଛି । ଏହାରି ଭିତରେ ରତନ ଟାଟାଙ୍କ ସାବତ ଭଉଣୀମାନେ ମିଣ୍ଟକୁ ସାକ୍ଷାତକାର ଦେଇ ବଡ଼ କଥା କହିଛନ୍ତି । ରତନ ଟାଟା ତାଙ୍କ ପରିବାର ପ୍ରତି ଗଭୀର ସମର୍ପିତ ଥିଲେ କିନ୍ତୁ କେବେବି ବ୍ୟକ୍ତିଗତ ସମ୍ପର୍କକୁ ତାଙ୍କ ବୃତ୍ତିଗତ ନିଷ୍ପତ୍ତିକୁ ପ୍ରଭାବିତ କରିବାକୁ ଦେଇ ନଥିଲେ ବୋଲି ସେମାନେ କହିଛନ୍ତି

ରତନ ଟାଟାଙ୍କ ଭଉଣୀ ଶିରିନ ଜେଜିଭୋଇ ମିଣ୍ଟକୁ କହିଛନ୍ତି, "ଆମେ ବହୁତ ଘନିଷ୍ଠ ଥିଲୁ । ସେ ସବୁବେଳେ ସପୋର୍ଟ କରୁଥିଲେ । ପ୍ରାୟତଃ ଆମ ସହିତ ମଜା କରୁଥିଲେ । ଆମ ମଧ୍ୟରେ ପ୍ରେମ ଏବଂ ସମ୍ମାନର ଏକ ଗଭୀର ସମ୍ପର୍କ ଥିଲା । ରତନ ଆମକୁ ଅପାର ସ୍ନେହ ଏବଂ ଭଲ ପାଇବା ଦେଇଥିଲେ । ସେ ମୋ ମାଆଙ୍କର ପ୍ରିୟ ଥିଲେ-ବିନା କୌଣସି ସନ୍ଦେହରେ।"

ମିଣ୍ଟ ରିପୋର୍ଟ ଅନୁସାରେ, ରତନ ଟାଟାଙ୍କ ଭଉଣୀ ଶିରିନ୍ ଏବଂ ଡିଆନା ଟାଟା ଟ୍ରଷ୍ଟର ବୋର୍ଡ ମଧ୍ୟରେ ବିବାଦ ଉପରେ ଚିନ୍ତା ପ୍ରକାଶ କରିଛନ୍ତି । ଉଲ୍ଲେଖଯୋଗ୍ୟ ଯେ ଦିବଂଗତ ଶିଳ୍ପପତିଙ୍କ ଜଣେ ଘନିଷ୍ଠ ବିଶ୍ୱାସୀ ମେହଲି ମିସ୍ତ୍ରୀଙ୍କୁ ନିକଟରେ ବୋର୍ଡରୁ ବହିଷ୍କାର କରାଯାଇଥିଲା ।

ଅକ୍ଟୋବର ୯, ୨୦୨୪ରେ ମୃତ୍ୟୁବରଣ କରିଥିବା ରତନ ଟାଟା ବିବାହ କରିନଥିଲେ । ମିଣ୍ଟ ଅନୁଯାୟୀ, ତାଙ୍କ ପରିବାରରେ ଭାଇ ଜିମି ଟାଟା, ସାବତ ଭଉଣୀ ଶିରିନ୍ ଓ ଡିଆନା ଜେଜିଭୋଇ ଏବଂ ସାବତ ଭାଇ ନୋଏଲ୍ ଟାଟା ଅଛନ୍ତି । ନୋଏଲ ବର୍ତ୍ତମାନ ଟାଟା ଟ୍ରଷ୍ଟର ଅଧ୍ୟକ୍ଷ ଭାବରେ କାର୍ଯ୍ୟ କରୁଛନ୍ତି ।

ନାଭାଲ ଟାଟା ଏବଂ ସୁନୁ କମିଶରିଆଟଙ୍କଠାରୁ ରତନ ଏବଂ ଜିମିଙ୍କ ଜନ୍ମ । ବାପା-ମାତା ଅଲଗା ହେବା ପରେ, ସୁନୁ ସାର୍ ଜାମସେତଜୀ ଜେଜିଭୋୟଙ୍କୁ ବିବାହ କରିଥିଲେ, ଯାହାଙ୍କ ଠାରୁ ତାଙ୍କର ତିନୋଟି ଝିଅ ଶିରିନ୍, ଡିଆନା ଏବଂ ଗୀତା ଜନ୍ମ ହୋଇଥିଲେ । ନାଭାଲ ଟାଟା ପରେ ସିମୋନ ଡୁନୋୟରଙ୍କୁ ବିବାହ କରିଥିଲେ ଏବଂ ସେମାନଙ୍କଠାରୁ ନୋଏଲ ଜନ୍ମ ହୋଇଥିଲେ । ଡାଉନ୍ ସିଣ୍ଡ୍ରୋମରେ ପୀଡିତ ଗୀତାଙ୍କ ବହୁ ବର୍ଷ ପୂର୍ବେ ମୃତ୍ୟୁ ହୋଇଥିଲା ।

ମିଣ୍ଟ ଅନୁଯାୟୀ, ଶିରିନ୍ ମହିଳା ସଶକ୍ତିକରଣ ଏବଂ ଲିଙ୍ଗଗତ ସମାନତା ଉପରେ କେନ୍ଦ୍ରିତ ଏକ ଏନଜିଓ ଆକାଶ ସେଣ୍ଟର ଫର୍ ଇକ୍ୱିଟି ଆଣ୍ଡ୍ ୱେଲବିଂ ପ୍ରତିଷ୍ଠା କରିଥିଲେ । ଅନ୍ୟପକ୍ଷରେ, ଡିଆନା ଅନେକ ଏନଜିଓ ସହ କାମ କରିଛନ୍ତି । ବୟସ୍କଙ୍କ ଯତ୍ନ ଏବଂ ଡାଉନ୍ ସିଣ୍ଡ୍ରୋମ୍, ଅଟିଜିମ୍ ଏବଂ ସାମାନ୍ୟ ସ୍ପାଷ୍ଟିସିଟି ଭଳି ଅକ୍ଷମତା ଥିବା ବ୍ୟକ୍ତିମାନଙ୍କ ସେବାରେ କାମ କରନ୍ତି ।

ଉଭୟ ଭଉଣୀ କହିଛନ୍ତି, "ରତନ ଟାଟା ବ୍ୟକ୍ତିଗତ ଏବଂ ବୃତ୍ତିଗତ ଭୂମିକା ମଧ୍ୟରେ ଏକ ସୀମା ବଜାୟ ରଖିଥିଲେ । ପରିବାରର ସଦସ୍ୟମାନଙ୍କୁ ଟାଟା ଟ୍ରଷ୍ଟର ପରିଚାଳନାରୁ ଦୂରରେ ରଖିଥିଲେ ।" ଡାଆନା କହିଛନ୍ତି, "ତାଙ୍କର ନିଷ୍ପତ୍ତି କେବେ ପାରିବାରିକ ସମ୍ପର୍କ ଦ୍ୱାରା ପ୍ରଭାବିତ ନହୁଏ ବୋଲି ରତନ ନିଶ୍ଚିତ କରିଥିଲେ । ମୁଁ ଥରେ ସାର୍ ଦୋରାବଜୀ ଟାଟା ଟ୍ରଷ୍ଟରେ ସେବା କରିଥିଲି, କିନ୍ତୁ ରତନ ମୋତେ ନିଯୁକ୍ତି ଦେଇ ନଥିଲେ । ଜାମସେଦ ଭାଭା ଜିଦ୍ ଧରିଥିଲେ । ମୁଁ ତାଙ୍କୁ କହିଥିଲି ଯେ ରତନ ଏହାକୁ ପସନ୍ଦ କରି ନପାରନ୍ତି । କିନ୍ତୁ ସେ କହିଥିଲେ, 'ମୁଁ ଅଧ୍ୟକ୍ଷ, ଏବଂ ମୁଁ ଚାହେଁ ତୁମେ ଯୋଗ ଦିଅ।'" ମିଣ୍ଟ ରିପୋର୍ଟ ଅନୁଯାୟୀ, ଭାଇ ରତନ ଏବଂ ଜିମିଙ୍କ ପରି, ଶିରିନ ଏବଂ ଡିଆନା ବିବାହ ନକରି କୁକୁରଙ୍କ ସହ ସ୍ନେହ ବାଣ୍ଟିବାକୁ ଚାହିଁଥିଲେ । ସେମାନେ ରତନ ଟାଟାଙ୍କ ପାଳିତ ପଶୁମାନଙ୍କ ମଧ୍ୟରୁ ଗୋଟିଏକୁ ମଧ୍ୟ ପୋଷ୍ୟ ଭାବରେ ଗ୍ରହଣ କରିଥିଲେ ।