ନୂଆଦିଲ୍ଲୀ: କାହିଁକି ଅଧାରକୁ ଆଇପିଏଲ୍ ଛାଡ଼ି ନିଜ ଦେଶକୁ ଫେରିଗଲେ ରାବାଡା ? ଏହି ପ୍ରଶ୍ନ ଉପରେ ଏବେ ନୀରବତା ଭାଙ୍ଗିଛନ୍ତି ଦକ୍ଷିଣ ଆଫ୍ରିକାର ଦ୍ରୁତ ବୋଲର । ଡ୍ରଗ୍ସ ପରୀକ୍ଷାରେ ବିଫଳ ହେବା ପରେ ତାଙ୍କୁ ଆଇପିଏଲ୍ ଛାଡି ନିଜ ଦେଶ ଦକ୍ଷିଣ ଆଫ୍ରିକା ଫେରିବାକୁ ପଡିଲା । ରାବାଡା ନିଜର ଭୁଲ ସ୍ୱୀକାର କରି ଏକ ବିବୃତ୍ତି ଜାରି କରିଛନ୍ତି । ଆଇପିଏଲରେ ଗୁଜରାଟ ଟାଇଟାନ୍ସ ପାଇଁ ଖେଳୁଥିବା ରାବାଡା ଚଳିତ ସିଜନରେ କେବଳ ୨ଟି ମ୍ୟାଚ୍ ଖେଳିପାରିଥିଲେ । ଏହାପରେ, ହଠାତ୍ ଏପ୍ରିଲ ୨ରେ ସେ ନିଜ ଦେଶକୁ ଫେରି ଯାଇଥିଲେ । ବ୍ୟକ୍ତିଗତ କାରଣରୁ ଫେରି ଯାଇଥିବା ସେତେବେଳେ କୁହାଯାଇଥିଲା ।
ଶନିବାର ରାବାଡା ଏକ ବିବୃତ୍ତି ଜାରି କରିଛନ୍ତି । ଏଥିରେ ସେ କହିଛନ୍ତି ଯେ ଡ୍ରଗ୍ ଟେଷ୍ଟ ରିପୋର୍ଟ ପଜିଟିଭ୍ ଆସିବାରୁ ହଠାତ୍ IPLରୁ ଫେରିବାକୁ ପଡିଲା । ରାବାଡା ଏହା ମଧ୍ୟ କହିଛନ୍ତି ଯେ ବର୍ତ୍ତମାନ ତାଙ୍କୁ ଅସ୍ଥାୟୀ ଭାବରେ ନିଲମ୍ବିତ କରାଯାଇଛି । ESPN-Cricinfo ରିପୋର୍ଟ ଅନୁଯାୟୀ, ରାବାଡା ଜାନୁଆରୀ-ଫେବୃଆରୀରେ ଖେଳାଯାଇଥିବା SA20 ଲିଗ୍ ସମୟରେ ଏହି ଔଷଧ ବ୍ୟବହାର କରିଥିଲେ ।
Kagiso Rabada confirms in a statement through South Africa’s players union that he is currently serving a provisional suspension after testing positive for a recreational drug pic.twitter.com/gUd9Uu1Vhu
— Ali Martin (@Cricket_Ali) May 3, 2025
ରାବାଡା ବିବୃତ୍ତିରେ କହିଛନ୍ତି, 'ବ୍ୟକ୍ତିଗତ କାରଣରୁ ଆଇପିଏଲ୍ ଛାଡ଼ି ଦକ୍ଷିଣ ଆପ୍ରିକା ଫେରିଥିବା ଖବର ଥିଲା । ଏହା ଏଥିପାଇଁ କାରଣ ରିକ୍ରିଏସନଲ୍ ଡ୍ରଗ୍ସ ବ୍ୟବହାର ଉପରେ ମୋର ରିପୋର୍ଟ ପଜିଟିଭ୍ ଆସିଛି । ମୁଁ ଯେଉଁମାନଙ୍କୁ ନିରାଶ କରିଛି, ସେମାନଙ୍କୁ କ୍ଷମା ପ୍ରାର୍ଥନା କରୁଛି । ମୁଁ କ୍ରିକେଟ୍ ଖେଳକୁ କେବେ ବି ହାଲୁକାରେ ନେଇ ନାହିଁ । ମୋର ବ୍ୟକ୍ତିଗତ ଆକାଂକ୍ଷାଠାରୁ ବି ଉପରେ ।'
ଦକ୍ଷିଣ ଆଫ୍ରିକାର ଦ୍ରୁତ ବୋଲର ବର୍ତ୍ତମାନ ଅସ୍ଥାୟୀ ଭାବେ ସସପେଣ୍ଡ ଅଛନ୍ତି । ଏହି ଖରାପ ସ୍ଥିତିରେ ଛିଡ଼ା ହୋଇଥିବାରୁ ସାଉଥ୍ ଆଫ୍ରିକା କ୍ରିକେଟ୍ ଆସୋସିଏସନ, ଗୁଜାରଟ ଟାଇଟନ୍ସ ଓ ନିଜର ଆଇନଗତ ପରାମର୍ଶଦାତାଙ୍କୁ ଧନ୍ୟବାଦ ଦେଇଛନ୍ତି ।
ରିକ୍ରିଏସନଲ୍ ଡ୍ରଗ୍ସ ଦକ୍ଷତା ବୃଦ୍ଧିକାରୀ ଡ୍ରଗ୍ସଠାରୁ ଅଲଗା ହୋଇଥାଏ । ଏହାର ବ୍ୟବହାର ଉପରେ ସଂପୂର୍ଣ୍ଣ ବ୍ୟାନ ରହିଛି । ରିକ୍ରିଏସନାଲ୍ ଡ୍ରଗ୍ସ କେବଳ ମଜା ମସ୍ତି ପାଇଁ ବ୍ୟବହାର କରାଯାଉଛି । କିନ୍ତୁ ଏହାର ବ୍ୟବହାରକୁ ସାଧାରଣତଃ ବେଆଇନ ବୋଲି ବିବେଚନା କରାଯାଏ। କିଛି ବର୍ଷ ପୂର୍ବେ, ଇଂଲଣ୍ଡ ବ୍ୟାଟର ଆଲେକ୍ସ ହେଲ୍ସଙ୍କୁ ମଧ୍ୟ ସମାନ ଡ୍ରଗ୍ସ ବ୍ୟବହାର ପାଇଁ ନିଲମ୍ୱନ କରାଯାଇଥିଲା ।
