ନୂଆଦିଲ୍ଲୀ: ଏକାଧିକ ମହିଳାଙ୍କୁ ଯୌନ ନିର୍ଯାତନା ଅଭିଯୋଗରେ ତଦନ୍ତରେ ସହଯୋଗ ପାଇଁ ଭାରତ ଫେରୁଛନ୍ତି ଜେଡିଏସ୍ ସାଂସଦ ପ୍ରଜ୍ଜ୍ୱଳ ରେଭନ୍ନା। ଜର୍ମାନୀର ମୁଞ୍ଚି ବିମାନବନ୍ଦରରୁ ସେ ବେଙ୍ଗାଲୁରୁ ଆସୁଥିବା ଜଣାପଡ଼ିଛି। ଯୌନ କେଳେଙ୍କାରିର ଭିଡିଓ ଭାଇରାଲ୍ ହେବା ପରେ ପ୍ରଜ୍ଜ୍ୱଳ ଜର୍ମାନୀ ଫେରାର୍ ହୋଇଯାଇଥିଲେ। ସେବେଠାରୁ ତାଙ୍କୁ ଭାରତ ଫେରାଇ ଆଣିବା ପାଇଁ କର୍ଣ୍ଣାଟକ ସରକାର ବହୁ ଉଦ୍ୟମ କରିଥିଲେ। ଇଣ୍ଟରପୋଲ୍ର ସହାୟତା ମଧ୍ୟ ନେଇଥିଲେ।
ସ୍ଥାନୀୟ ସମୟ ଅନୁସାରେ ଦିନ ୧୧.୨୦ରୁ ପ୍ରଜ୍ଜ୍ୱଳ ବୋର୍ଡିଂ କରିଛନ୍ତି ବୋଲି ଜାତୀୟ ଗଣମାଧ୍ୟମ ଇଣ୍ଡିଆ ଟୁଡେ ତାଙ୍କ ବୋର୍ଡିଂ ପାସ୍ ପୋଷ୍ଟ କରି ଖବର ପ୍ରକାଶ କରିଛି। ମେ ୩୧ ସକାଳୁ ପ୍ରଜ୍ଜ୍ୱଳ ବେଙ୍ଗାଲୁରୁରେ ପହଞ୍ଚିବେ ବୋଲି କୁହାଯାଉଛି।
ସୂଚନା ଥାଉକି ପ୍ରଜ୍ଜ୍ୱଳ ରେଭନ୍ନା ୨୦୨୪ ଲୋକସଭା ନିର୍ବାଚନରେ ବିଜେପି-ଜେଡିଏସ୍ର ମିଳିତ ପ୍ରାର୍ଥୀ ହୋଇ ହସଲ ସଂସଦୀୟ କ୍ଷେତ୍ରରୁ ନିର୍ବାଚନ ଲଢ଼ିଥିଲେ। ଦ୍ୱିତୀୟ ପର୍ଯ୍ୟାୟରେ ଏପ୍ରିଲ ୨୬ ତାରିଖରେ ନିର୍ବାଚନ ସରିବା ପରେ ଭିଡିଓ ଭାଇରାଲ ହେବାରୁ ସେ ଦେଶ ଛାଡ଼ି ପଳାଇଥିଲେ। ଏହି ମାମଲାରେ ପ୍ରଜ୍ଜ୍ୱଳଙ୍କ ବିରୋଧରେ ଦୁଷ୍କର୍ମ ମାମଲା ରୁଜୁ ହୋଇଛି।
ଏହା ପୂର୍ବରୁ ଚଳିତ ସପ୍ତାହ ଆରମ୍ଭରେ ପ୍ରଜ୍ଜ୍ୱଳ ଏକ ଭିଡିଓ ଜାରି କରି ମେ ୩୧ ତାରିଖରେ ବେଙ୍ଗାଲୁରୁରେ ପହଞ୍ଚିବେ ଓ ତଦନ୍ତରେ ସହଯୋଗ କରିବେ ବୋଲି କହିଥିଲେ। ଏବଂ ତାଙ୍କ ବିରୋଧରେ ଲାଗିଥିବା ସମସ୍ତ ଅଭିଯୋଗ ସମ୍ପୂର୍ଣ୍ଣ ଭିତ୍ତିହୀନ ଓ ରାଜନୈତିକ ଉଦ୍ଦେଶ୍ୟପ୍ରଣୋଦିତ ବୋଲି ସେ ଭିଡିଓରେ କହିଥିଲେ।
