ନୂଆଦିଲ୍ଲୀ: ଭାରତ ପାକିସ୍ତାନ ଉତ୍ତେଜନା ମଧ୍ୟରେ, ପାକିସ୍ତାନୀ ସେନା ଗୁରୁତ୍ୱପୂର୍ଣ୍ଣ ତୋପ ଗୋଳାବାରୁଦର ଘୋର ଅଭାବ ଦେଖା ଦେଇଛି। ଗୋଳା ବାରୁଦର ଅଭାବ ଯୋଗୁ ପାକିସ୍ତାନ ଭାରତ ବିରୋଧରେ କେବଳ ଚାରି ଦିନ ତିଷ୍ଟି ପାରିବ ବୋଲି ସମ୍ବାଦ ସରବରାହ ସଂସ୍ଥା ଏଏନ୍‌ଆଇ ରିପୋର୍ଟ କରିଛି। ଯୁଦ୍ଧାସ୍ତ୍ର ଗୋଳାବାରୁଦର ଅଭାବ ମୁଖ୍ୟତଃ ୟୁକ୍ରେନ ଏବଂ ଇସ୍ରାଏଲ ସହିତ ପାକିସ୍ତାନର ସମ୍ପ୍ରତି ଅସ୍ତ୍ରଶସ୍ତ୍ର ଚୁକ୍ତି ଯୋଗୁ ହୋଇଛି। ଯାହା ଏହାର ଯୁଦ୍ଧ ଭଣ୍ଡାରକୁ ହ୍ରାସ କରିଛି।

ଗୋଟିଏ ପଟେ ଯୁଦ୍ଧ ଏବଂ ବିଶ୍ୱବ୍ୟାପୀ ଚାହିଦା ବଢ଼ିବା ଓ ପୁରୁଣା ଉତ୍ପାଦନ ସୁବିଧାକୁ ନେଇ ପାକିସ୍ତାନ ଯୁଦ୍ଧାସ୍ତ୍ର ଫ୍ୟାକ୍ଟ୍ରି ନିଜ ସାମରିକ ବାହିନୀକୁ ଅସ୍ତ୍ରଶସ୍ତ୍ର ଯୋଗାଣ କରିବାରେ ବିଫଳ ହୋଇପାରେ ବୋଲି କୁହାଯାଉଛି। ପହଲଗାମ ଆତଙ୍କବାଦୀ ଆକ୍ରମଣର ଜବାବରେ ଭାରତ ପଡ଼ୋଶୀ ଦେଶ ଉପରେ ସାମରିକ କାର୍ଯ୍ୟାନୁଷ୍ଠାନ ଆରମ୍ଭ କରିବ ବୋଲି ଅନେକ ପାକିସ୍ତାନୀ ନେତା କହିଛନ୍ତି। ସେମାନଙ୍କ ସେନା ଭାରତୀୟ ଯବାନଙ୍କୁ ଉଚିତ ଜବାବ ଦେବେ ବୋଲି ମଧ୍ୟ ସେମାନେ ଫମ୍ପା ଧମକ ଦେବାକୁ ଚେଷ୍ଟା କରୁଛନ୍ତି। 

ପଢନ୍ତୁ- କେବେ ହେବ ଯୁଦ୍ଧ? ପ୍ରଧାନମନ୍ତ୍ରୀ ମୋଦିଙ୍କ ବୟାନକୁ ନେଇ ଅଟକଳ ଆରମ୍ଭ

ବିଶେଷ ସୂତ୍ରରୁ ମିଳିଥିବା ସୂଚନା ଅନୁସାରେ, ଯୋଗାଣ ହ୍ରାସ ପାଇବା ସହିତ, ପାକିସ୍ତାନର ଗୋଳାବାରୁଦ ଭଣ୍ଡାର ମାତ୍ର ୯୬ ଘଣ୍ଟା ତୀବ୍ର ସଂଘର୍ଷରେ ତିଷ୍ଟି ରହିପାରିବ ବୋଲି କୁହାଯାଉଛି। ତେଣୁ ଏଥିରୁ ସ୍ପଷ୍ଟ ହେଉଛି ଯେ ପାକିସ୍ତାନର ସାମରିକ ବାହିନୀ ଦୁର୍ବଳ ହୋଇପଡ଼ିଛି।

ଭାରତ ସହ ଲଢ଼ିବାକୁ ପାକିସ୍ତାନ ପାଖରେ ସାମରିକ ବାହିନୀର M109 ହାୱିତର୍ସ ପାଇଁ 155mm ସେଲ୍ କିମ୍ବା BM-21 ସିଷ୍ଟମ ପାଇଁ 122mm ରକେଟ୍ ପର୍ଯ୍ୟାପ୍ତ ନାହିଁ। ଏପ୍ରିଲ ମାସରେ ଏକ୍ସରେ ଅନେକ ପୋଷ୍ଟରେ ଏହା ଦାବି କରାଯାଇଥିଲା ଯେ ୧୫୫ଏମଏମ ତୋପ ସେଲ୍ ୟୁକ୍ରେନକୁ ପଠାଯାଇଥିଲା, ଯାହା ଫଳରେ ଏହାର ଗୋଦାମ ସ୍ୱଳ୍ପ ରହିଛି। 

ସୂତ୍ର ଅନୁଯାୟୀ, ପାକିସ୍ତାନୀ ପ୍ରତିରକ୍ଷା ବାହିନୀ ଗୁରୁତ୍ୱପୂର୍ଣ୍ଣ ଗୋଳାବାରୁଦର ଅଭାବକୁ ନେଇ ଗଭୀର ଚିନ୍ତିତ ଏବଂ ଆତଙ୍କିତ ହୋଇ ପଡିଛି। ମେ ୨ ତାରିଖରେ ପାକିସ୍ତାନର ସ୍ୱତନ୍ତ୍ର କର୍ପସ କମାଣ୍ଡର ସମ୍ମିଳନୀରେ ଏହି ପ୍ରସଙ୍ଗ ଉଠିଥିଲା ବୋଲି କୁହାଯାଉଛି। ଗୁଇନ୍ଦା ସୂତ୍ରରୁ ମିଳିଥିବା ସୂଚନା ଅନୁସାରେ, ସମ୍ଭାବ୍ୟ ଭାରତୀୟ ଆକ୍ରମଣର ଆଶଙ୍କା କରି ପାକିସ୍ତାନ ଭାରତ-ପାକିସ୍ତାନ ସୀମା ନିକଟରେ ଗୋଳାବାରୁଦ ଡିପୋ ନିର୍ମାଣ କରିଥିଲା ବୋଲି ଜଣାପଡ଼ିଛି।