ନୂଆଦିଲ୍ଲୀ: ଭାରତର ହମ୍ଲାରେ ଘାଇଲା ପାକିସ୍ତାନ। ଶତ୍ରୁକୁ ନିପାତ କଲା ଅପରେସନ ସିନ୍ଦୂର। ରାତି ପାହିବା ପୂର୍ବରୁ ବଦଲା ନେଲା ଭାରତ। ଗଣି ଗଣି କରି ଉଡ଼ାଇଲା ଆତଙ୍କୀଙ୍କ ଆଡ୍ଡା। ଭାରତୀୟ ସେନାର ଅପରେସନ ସିନ୍ଦୂରରେ ଜୈସ ଚିଫ୍ ମାସୁଦ ଆଝାରର ପରିବାରର ୧୦ ଜଣ ସଦସ୍ୟଙ୍କ ମୃତ୍ୟୁ। ମାସୁଦର ୪ ଅତି ନିକଟ ସମ୍ପର୍କୀୟଙ୍କ ମୃତ୍ୟୁ ହୋଇଛି। ମୃତକଙ୍କ ତାଲିକାରେ ମାସୁଦ ଆଝାରର ଭାଇ ଏବଂ ଭାରତର ମୋଷ୍ଟ ୱାଣ୍ଟେଡ୍ ଆତଙ୍କବାଦୀ ରୌଫ୍ ଅସଗରର ପୁଅ ହୁଜୈଫା ମଧ୍ୟ ରହିଛି । ଏହା ବ୍ୟତୀତ ରୌଫ ଅସଗରଙ୍କ ଭାଇର ସ୍ତ୍ରୀଙ୍କ ମୃତ୍ୟୁ ଖବର ମଧ୍ୟ ସାମନାକୁ ଆସୁଛି। ମାସୁଦ ଆଝାରର ଭାଇ ତଥା ଆତଙ୍କବାଦୀ ରଉଫ ଅସଗର ମଧ୍ୟ ଗୁରୁତର ଆହତ ହୋଇଛି।
ଜୈଶ-ଏ-ମହମ୍ମଦର ପ୍ରତିଷ୍ଠାତା ମାସୁଦ ଆଝାର। ଭାରତ ପାଇଁ ମୋଷ୍ଟ ୱାଣ୍ଟେଡ୍ ଆତଙ୍କବାଦୀ। ମାସୁଦକୁ ଭାରତ ପାଇଁ ସବୁଠାରୁ ବିପଦଜନକ ଆତଙ୍କବାଦୀଙ୍କ ମଧ୍ୟରୁ ଜଣେ ବୋଲି ବିବେଚନା କରାଯାଏ। ୧୯୯୯ ମସିହାରେ ଇଣ୍ଡିଆନ୍ ଏୟାରଲାଇନ୍ସ ଅପହରଣ ପରେ ବନ୍ଧକଙ୍କ ମୁକ୍ତି ବଦଳରେ ମୁକ୍ତ ହୋଇଥିଲା ମାସୁଦ। ସେବେଠାରୁ ସେ ପାକିସ୍ତାନରେ ଲୁଚି ରହିଛି। ଅନେକ ବଡ଼ ଆତଙ୍କବାଦୀ ଆକ୍ରମଣର ଷଡଯନ୍ତ୍ର କରୁଛି।
୨୦୧୯ ମସିହାରେ ମାସୁଦ ଆଝାରକୁ ଅନ୍ତର୍ଜାତୀୟ ଆତଙ୍କବାଦୀ ଘୋଷଣା କରିଛି ଜାତିସଂଘ ସୁରକ୍ଷା ପରିଷଦ। ସେ ଆଫଗାନିସ୍ତାନ ଏବଂ ପାକିସ୍ତାନରେ ଆତଙ୍କବାଦୀମାନଙ୍କୁ ତାଲିମ ଦେଉଛି। ନିଜର ସଂଗଠନକୁ ବିସ୍ତାର କରିବା ପାଇଁ ନୂତନ ମଦ୍ରାସା ଖୋଲିବାକୁ ଯୋଜନା କରୁଛି।
ମାସୁଦ ଆଝାରଙ୍କ ନେତୃତ୍ୱରେ ଜୈଶ-ଏ-ମହମ୍ମଦ ୨୦୦୧ ମସିହାରେ ଭାରତୀୟ ସଂସଦ ଉପରେ ଆକ୍ରମଣ, ୨୦୦୦ ମସିହାରେ ଜମ୍ମୁ-କାଶ୍ମୀର ବିଧାନସଭା ଉପରେ ଆକ୍ରମଣ, ୨୦୧୬ ମସିହାରେ ପଠାନକୋଟ ବାୟୁସେନା ଘାଟି ଉପରେ ଆକ୍ରମଣ ଏବଂ ୨୦୧୯ ମସିହାରେ ପୁଲୱାମାରେ ଆତ୍ମଘାତୀ ଆକ୍ରମଣ ଭଳି ଅନେକ ବଡ଼ ଆତଙ୍କବାଦୀ ଘଟଣା ଘଟାଇଥିଲା।
'ଅପରେସନ୍ ସିନ୍ଦୂର'ରେ ଭାରତୀୟ ସେନା ମାସୁଦ ଆଝାରର ଆତଙ୍କବାଦୀ ଆଡ୍ଡାକୁ ଧ୍ୱଂସ କରିଦେଇଛି। ବାହାବଲପୁରରେ ଥିବା ତା'ର ମଦ୍ରାସା ଏବଂ ଜୈଶ ମୁଖ୍ୟାଳୟ ସମ୍ପୂର୍ଣ୍ଣ ଧ୍ୱଂସ ହୋଇଯାଇଛି। ଏପ୍ରିଲ ୨୨ ତାରିଖରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ଏହା ଥିଲା ଜବାବ। ଭାରତୀୟ ସେନା ପାକିସ୍ତାନରେ ୯ଟି ଆତଙ୍କବାଦୀ ଘାଟି ଉପରେ ବିମାନ ଆକ୍ରମଣ କରିଛି। ଏଥିରେ ପାକିସ୍ତାନର ଶତାଧିକ ଆତଙ୍କୀଙ୍କ ମୃତ୍ୟୁ ହୋଇଥିବା ଜଣାପଡ଼ିଛି।
