ପିଏମ ମୋଦୀଙ୍କ ବାୟୋପିକର ସୁଟିଂ ଆରମ୍ଭ: ପ୍ରଧାନମନ୍ତ୍ରୀଙ୍କ ଭୂମିକାରେ ନଜର ଆସିବେ 'ମାର୍କୋ' ଆକ୍ଟର ଉନ୍ନି ମୁକୁନ୍ଦନ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ନିର୍ମିତ ବାୟୋପିକ୍ "ମା ବନ୍ଦେ"ର ସୁଟିଂ ଆରମ୍ଭ ହୋଇଛି। "ମାର୍କୋ" ଭଳି ଫିଲ୍ମରେ ଅଭିନୟ କରିଥିବା ପ୍ରଖ୍ୟାତ ମାଲାୟଲମ ଅଭିନେତା ଉନ୍ନି ମୁକୁନ୍ଦନ ପ୍ରଧାନମନ୍ତ୍ରୀ ମୋଦୀଙ୍କ ଭୂମିକାରେ ଅଭିନୟ କରୁଛନ୍ତି ।

ଫିଲ୍ମର ନିର୍ମାତା ଶନିବାର ଏକ୍ସ ଆକାଉଣ୍ଟରେ ଏକ ପୋଷ୍ଟ ସେୟାର କରି ସୁଟିଂ ଆରମ୍ଭ ହେବା ନେଇ ଘୋଷଣା କରିଛନ୍ତି । ପୋଷ୍ଟରେ ଫିଲ୍ମର ସୁଟିଂ ଆରମ୍ଭ ହେବା ପୂର୍ବରୁ ଅନୁଷ୍ଠିତ ହୋଇଥିବା ପୂଜାର ଫଟୋ ସେୟାର କରାଯାଇଛି ।

ପୋଷ୍ଟର କ୍ୟାପସନରେ ଲେଖା ଅଛି, ‘ମା ବନ୍ଦେ ଫିଲ୍ମର ସୁଟିଂ ଆରମ୍ଭ ହୋଇଛି। ଏବେ ଦେଶର ଭାଗ୍ୟ ଗଢ଼ିଥିବା ବ୍ୟକ୍ତିଙ୍କ କାହାଣୀ କହିବାରେ ଏକ ନୂତନ ଅଧ୍ୟାୟ ଆରମ୍ଭ ହେଉଛି।’

ପ୍ରଧାନମନ୍ତ୍ରୀ ମୋଦୀଙ୍କ ଜନ୍ମଦିନ ଅବସରରେ ସେପ୍ଟେମ୍ବରରେ ଏହି ଚଳଚ୍ଚିତ୍ରର ସୁଟିଂ ନେଇ ଘୋଷଣା କରାଯାଇଥିଲା । ମା' ବନ୍ଦେ, ବୀର ରେଡ୍ଡୀ ଏମ୍ ତାଙ୍କ ପ୍ରଯୋଜନା କମ୍ପାନୀ ସିଲଭର କାଷ୍ଟ କ୍ରିଏସନ୍ସ ଅଧୀନରେ ପ୍ରଯୋଜିତ। ଏହି ଚଳଚ୍ଚିତ୍ରଟି କ୍ରାନ୍ତି କୁମାର ସିଏଚ୍ ଦ୍ୱାରା ନିର୍ଦ୍ଦେଶିତ।

ମାଲାୟଲମ ଚଳଚ୍ଚିତ୍ର ଶିଳ୍ପର ଜଣେ ଲୋକପ୍ରିୟ ଅଭିନେତା ଉନ୍ନି ମୁକୁନ୍ଦନଙ୍କ ଜନ୍ମ କେରଳର ତ୍ରିସୁରରେ ହୋଇଥିଲା। ସେ ତାଙ୍କ ଜୀବନର ଅନେକ ବର୍ଷ ଗୁଜରାଟରେ ବିତାଇଥିଲେ। ଉନ୍ନି ତାଙ୍କର ସ୍କୁଲ ଶିକ୍ଷା ଅହମଦାବାଦରେ ସମାପ୍ତ କରିଥିଲେ ।

ଉନ୍ନି ତାମିଲ ଚଳଚ୍ଚିତ୍ର ସେଡାନ (୨୦୧୧)ରେ ଚଳଚ୍ଚିତ୍ରରେ ଡେବ୍ୟୁ କରିଥିଲେ । ଛୋଟ ଭୂମିକାରେ ଅଭିନୟ କରିବା ପରେ ସେ ମଲ୍ଲୁ ସିଂ (୨୦୧୨) ରେ ମୁଖ୍ୟ ଭୂମିକାରେ ଅବତୀର୍ଣ୍ଣ ହୋଇଥିଲେ । ଏହା ପରେ ସେ ବିକ୍ରମଦିତ୍ୟ (୨୦୧୪), କେ.ଏଲ୍ ୧୦ ପଟ୍ଟୁ (୨୦୧୫), ଷ୍ଟାଇଲ୍ (୨୦୧୬), ଓରୁ ମୁରାଇ ଭାନୁ ପାର୍ଥାୟା (୨୦୧୬), ଆଚାୟାନ୍ସ (୨୦୧୭), ମଲିକାପୁରମ(୨୦୨୨) ଏବଂ ମାର୍କୋ (୨୦୧୪) ଭଳି ସଫଳ ଚଳଚ୍ଚିତ୍ରରେ ଅଭିନୟ କରିଥିଲେ । ଉନ୍ନି ତେଲୁଗୁ ଚଳଚ୍ଚିତ୍ର ଜନତା ଗ୍ୟାରେଜ (୨୦୧୬) ଏବଂ ତାମିଲ ଚଳଚ୍ଚିତ୍ର ମରୁଡନ (୨୦୨୪) ରେ ମଧ୍ୟ ଅଭିନୟ କରିଥିଲେ।