ନୂଆଦିଲ୍ଲୀ: ଚାମ୍ପିୟନ ଟ୍ରଫି ପୂର୍ବରୁ ଟିମ୍ ଇଣ୍ଡିଆ ପାଇଁ ଅଶୁଭ ସଂକେତ। ଫିଟ୍ ନାହାନ୍ତି ଟିମ୍ ଇଣ୍ଡିଆର ଷ୍ଟାର୍ ପେସର୍ ଜସ୍ପ୍ରୀତ ବୁମରା। ଫିଟ୍ନେସ କାରଣରୁ ଫେବ୍ରୁଆରୀ ୬ରୁ ଆରମ୍ଭ ହେବାକୁ ଥିବା ଇଂଲଣ୍ଡ ବିପକ୍ଷ ଦିନିକିଆ ସିରିଜ୍ରୁ ବୁମରାଙ୍କୁ ଟିମ୍ରୁ ହଟାଇ ଦିଆଯାଇଛି। ମଙ୍ଗଳବାର(ଫେବ୍ରୁଆରୀ ୪) ବିସିସିଆଇ ଜାରି କରିଥିବା ସଂଶୋଧିତ ଦିନିକିଆ ଟିମ୍ରେ ବୁମରାଙ୍କୁ ସ୍ଥାନ ମିଳି ନାହିଁ।
ଏହା ପୂର୍ବରୁ ତାଙ୍କୁ ଦିନିକିଆ ସିରିଜ୍ର ଶେଷ ତଥା ତୃତୀୟ ମ୍ୟାଚ୍ରେ ସାମିଲ୍ କରାଯାଇଥିଲା। ଏହାପରେ ସେ ଇଂଲଣ୍ଡ ବିପକ୍ଷ ଦିନିକିଆ ସିରିଜର ଶେଷ ମ୍ୟାଚ୍ ଖେଳି ପାରନ୍ତି ବୋଲି ଚର୍ଚ୍ଚା ହେଉଥିଲା। ହେଲେ ମଙ୍ଗଳବାର ବିସିସିଆଇ ନୂଆ ସଂଶୋଧିତ ଟିମ୍ ତାଲିକା ଜାରି କରିଛି। ଏଥିରେ ବୁମରାଙ୍କ ବଦଳରେ ବରୁଣ ଚକ୍ରବର୍ତ୍ତୀଙ୍କୁ ସାମିଲ୍ କରାଯାଇଛି।
ଚାମ୍ପିୟନ୍ସ ଟ୍ରଫିରେ ଖେଳିବା ନେଇ ଆଶଙ୍କା
କେବଳ ଇଂଲଣ୍ଡ ବିପକ୍ଷ ଦିନିକିଆ ସିରିଜ୍ ନୁହେଁ, ବୁମରା ଏବେ ୨୦୨୫ ଚାମ୍ପିଅନ୍ସ ଟ୍ରଫି ଖେଳିବା ନେଇ ମଧ୍ୟ ଆଶଙ୍କା ପ୍ରକାଶ ପାଇଛି। ସୋମବାର ବୁମରାହଙ୍କ ସମ୍ପର୍କରେ ମିଡିଆରେ ଏକ ରିପୋର୍ଟ ପ୍ରକାଶ ପାଇଥିଲା। ଏଥିରେ କୁହାଯାଇଥିଲେ ଯେ ବୁମରା ବର୍ତ୍ତମାନ ବେଙ୍ଗାଲୁରୁର ଜାତୀୟ କ୍ରିକେଟ୍ ଏକାଡେମୀ (NCA)ରେ ଅଛନ୍ତି। ସଠାରେ ତାଙ୍କର ଫିଟନେସ୍ ପରୀକ୍ଷା କରାଯିବ। ବର୍ତ୍ତମାନ ସେ ଏକ ଡାକ୍ତରୀ ଦଳର ତତ୍ତ୍ୱାବଧାନରେ ରହିବେ।
ଟାଇମ୍ସ ଅଫ୍ ଇଣ୍ଡିଆରେ ପ୍ରକାଶିତ ରିପୋର୍ଟରେ ଅନୁସାରେ ଜସପ୍ରିତ ବୁମରା ବର୍ତ୍ତମାନ ୨-୩ ଦିନ ପାଇଁ NCA ବିଶେଷଜ୍ଞଙ୍କ ନିରୀକ୍ଷଣରେ ରହିବେ। ଫିଟ୍ନେସ ସମ୍ପର୍କିତ ସମ୍ପୂର୍ଣ୍ଣ ପରୀକ୍ଷା ନିରୀକ୍ଷା କରିବା ପରେ ହିଁ ରିପୋର୍ଟ ଅଜିତ ଅଗରକରଙ୍କ ନେତୃତ୍ୱାଧୀନ ଚୟନ କମିଟିକୁ ପଠାଯିବ।
ସେପଟେ ଚାମ୍ପିୟନ୍ସ ଟ୍ରଫି ପାଇଁ ଖେଳାଳି ଚୟନ ଶେଷ ତାରିଖ ପାଖେଇ ଆସୁଛି। ହାତରେ ମାତ୍ର ଆଉ ସପ୍ତାହେ ସମୟ ରହିଛି। କାରଣ ଆଇସିସିର ନିର୍ଦ୍ଦେଶ ଅନୁସାରେ ଦଳଗୁଡ଼ିକ ଫେବ୍ରୁଆରୀ ୧୨ ତାରିଖ ସୁଦ୍ଧା ନିଜ ଦଳରେ ପରିବର୍ତ୍ତନ କରିପାରିବେ। ତେଣୁ ମଙ୍ଗଳବାର ୪ ତାରିଖ ହୋଇଗଲାଣି। ହାତରେ ମାତ୍ର ଆଉ ୮ ଦିନ। ତେଣୁ ଚାମ୍ପିୟନ୍ସ ଟ୍ରଫିରେ ବୁମରାଙ୍କୁ ଦଳରେ ସାମିଲ୍ କରାଯିବ କି ନାହିଁ ଏହି ୮ ଦିନ ଭିତରେ ବିସିସିଆଇ ଚୟନ କମିଟିକୁ ନିଷ୍ପତ୍ତି ନେବାକୁ ପଡ଼ିବ।
ସେପଟେ ବିସିସିଆଇ ଜାରି କରିଥିବା ସଂଶୋଧିତ ତାଲିକାରେ ବରୁଣ ଚକ୍ରବର୍ତ୍ତୀଙ୍କୁ ସାମିଲ୍ କରାଯାଇଛି। ବରୁଣ ଦିନିକିଆ ଫର୍ମାଟ୍ରେ ପ୍ରଥମ ଥର ଟିମ୍ ଆଣ୍ଡିଆ ପାଇଁ ପ୍ରତିନିଧିତ୍ୱ କରିବେ। ଏହା ପୂର୍ବରୁ ସେ କୌଣସି ଦିନିକିଆ ଅନ୍ତର୍ଜାତୀୟ ମ୍ୟାଚ୍ ଖେଳି ନାହାନ୍ତି।
ହୋଇଥିବା ନୂଆ ପରିବର୍ତ୍ତନରେ ଚାମ୍ପିୟନ୍ସ ଟ୍ରଫି ପାଇଁ ୧୬ ଜଣିଆ ଭାରତୀୟ ଦଳରେ ୫ ଜଣ ସ୍ପିନର ହୋଇ ଯାଇଛନ୍ତି। ସେମାନେ ହେଲେ- ରବିନ୍ଦ୍ର ଜାଡେଜା, ଅକ୍ଷର ପଟେଲ, କୁଲଦୀପ ଯାଦବ, ୱାଶିଂଟନ ସୁନ୍ଦର ଏବଂ ବରୁଣ ଚକ୍ରବର୍ତ୍ତୀ।
ଇଂଲଣ୍ଡ ବିପକ୍ଷ ଦିନିକିଆ ସିରିଜ୍ ପାଇଁ ସଂଶୋଧିତ ଭାରତୀୟ ଦଳ-
ରୋହିତ ଶର୍ମା (ଅଧିନାୟକ), ଶୁଭମନ ଗିଲ (ଉପଅଧିନାୟକ), ଯଶସ୍ୱୀ ଜୈସ୍ୱାଲ, ବିରାଟ କୋହଲି, ଶ୍ରେୟସ୍ ଆୟର, କେ.ଏଲ୍ ରାହୁଲ (ଡବ୍ଲୁ.କେ) ଋଷଭ ପନ୍ତ (ୱିକେଟ କିପର), ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡେଜା, ୱାଶିଂଟନ୍ ସୁନ୍ଦର, ଅକ୍ଷର ପଟେଲ, କୁଲଦୀପ ଯାଦବ, ହର୍ଷିତ ରାଣା, ମୋହମ୍ମଦ୍ ଶାମୀ, ଅର୍ଶଦୀପ ସିଂ, ବରୁଣ ଚକ୍ରବର୍ତ୍ତୀ।
