‘ଦଶଟି ନୋଟ୍ ଏବଂ ବାରଟି ମାଲିକ’; ପାକିସ୍ତାନ ସଂସଦରେ ସାଂସଦଙ୍କ ମିଛ; ୟୁଜର କହିଲେ-ଲଜ୍ଜିତ

ନୂଆଦିଲ୍ଲୀ: ପାକିସ୍ତାନର ଆର୍ଥିକ ଅବସ୍ଥା କାହାକୁ ଅଛପା ନାହିଁ । ଲୋକେ ଦୈନନ୍ଦିନର ଜୀବନର ଅତ୍ୟାବଶୀୟ ସାମଗ୍ରୀ ପାଇଁ ସଂଘର୍ଷ କରୁଛନ୍ତି । ଏହାରି ଭିତରେ ପାକିସ୍ତାନର ଜାତୀୟ ସଂସଦରୁ ଏପରି ଘଟଣା ସାମନାକୁ ଆସିଛି, ଯାହା ଜାଣିଲେ ଆପଣ ବି କହିବେ, ପାକିସ୍ତାନର ‘ମିଛୁଆ ଏମପି’ । ପାକିସ୍ତାନ ଜାତୀୟ ସଂସଦର ବାଚସ୍ପତି ଆୟାଜ ସାଦିକ ଚାମ୍ବର ମହଲାରୁ ଦଶଟି ପାକିସ୍ତାନୀ ୫,୦୦ ନୋଟ ଉଠାଇ ଏହା କାହାର ଟଙ୍କା ବୋଲି ପଚାରି ଥିଲେ । ଏହାର ଜବାବରେ, ପ୍ରାୟ ଏକ ଡଜନ ସଦସ୍ୟ ତୁରନ୍ତ ସେମାନଙ୍କ ହାତ ଉଠାଇଥିଲେ ।

ଏହି ଘଟଣା ସଂସଦ ପରିସରରେ କୌତୁହଳର ପରିବେଶ ସୃଷ୍ଟି କରିଥିଲା । ବାଚସ୍ପତି କହିଥିଲେ "ଦଶଟି ନୋଟ୍ ଏବଂ ବାରଟି ମାଲିକ ଅଛନ୍ତି।" ଶେଷରେ ଟଙ୍କା ଏହାର ପ୍ରକୃତ ମାଲିକ ପିଟିଆଇ ସାଂସଦ ମହମ୍ମଦ ଇକବାଲ ଆଫ୍ରିଦିଙ୍କ ପାଖକୁ ଦିଆଯାଇଥିଲା । କିନ୍ତୁ ଏହା ପୂର୍ବରୁ ବାଚସ୍ପତିଙ୍କ ବୟାନର କ୍ଲିପ୍ ଭାଇରାଲ ହୋଇସାରିଛି । ଏବେ ପାକିସ୍ତାନୀ ଏହି ଘଟଣାରେ କ୍ରୋଧିତ ଏବଂ ଲଜ୍ଜିତ ।

ଜଣେ ଫେସବୁକ୍ ୟୁଜର ଶାହନାଜ ଖାଲିଦ କହିଛନ୍ତି, "ଏମଏନଏଙ୍କ ମନୋଭାବ ପାଇଁ ଲଜ୍ଜା ଲାଗୁଛି । ଆମର ସଂସଦ କେତେ ସଚ୍ଚୋଟ ତାହା ଏହି ଦୃଶ୍ୟରୁ ସ୍ପଷ୍ଟ ଭାବରେ ଜଣାପଡୁଛି ।" ଅନେକ ଲୋକ ଏହା ଉପରେ ନିନ୍ଦା ପ୍ରକାଶ କରିଛନ୍ତି । ଫେସବୁକ୍ ୟୁଜର ମହମ୍ମଦ ସଲିମ୍ ମେମନ ଦାବି କରିଛନ୍ତି ଯେ ଏହି ଘଟଣା ପ୍ରମାଣିତ କରିଛି ଯେ ସାଂସଦମାନେ " “THUG OF PAKISTAN AND PPP.”"। ଏହି ଭିଡିଓ ଏବେ ପାକିସ୍ତାନୀ ରାଜନେତାଙ୍କ ଅବସ୍ଥା ଉପରେ ମଧ୍ୟ ଏକ ବିତର୍କ ଆରମ୍ଭ କରିଛି । ଜଣେ ଏକ୍ସ ୟୁଜର ଲେଖିଛନ୍ତି, "ସେମାନେ ଲକ୍ଷ ଲକ୍ଷ ଟଙ୍କାରେ ଦରମା ଏବଂ ସୁବିଧା ନିଅନ୍ତି, ତଥାପି ଏହା ସେମାନଙ୍କର ଅବସ୍ଥା – ହାୟ ।"