ମୁମ୍ବାଇ, ୭।୮: ଦେଶର ବିଶିଷ୍ଟ ଶିଳ୍ପପତି ମୁକେଶ ଅମ୍ବାନୀ ଲଗାତାର ପଞ୍ଚମ ବର୍ଷ ପାଇଁ କମ୍ପାନୀରୁ କୌଣସି ଦରମା ନେଇ ନାହାନ୍ତି । ରିଲାଏନ୍ସର ବାର୍ଷିକ ରିପୋର୍ଟରେ ଏହି ତଥ୍ୟ ପ୍ରକାଶ ପାଇଛି । ୨୦୨୦-୨୧ ଆର୍ଥିକ ବର୍ଷରୁ ଅମ୍ବାନୀ କୌଣସି ଦରମା ନେଇ ନାହାନ୍ତି । କରୋନା ମହାମାରୀ ପରେ ସୃଷ୍ଟି ହୋଇଥିବା ବିକଟ ପରିସ୍ଥିତି ଯୋଗୁ ମୁକେଶ ଅମ୍ବାନୀ ସ୍ୱେଚ୍ଛାକୃତ ଭାବରେ ସମସ୍ତ ପ୍ରକାରର ଭତ୍ତା, ସେବାନିବୃତ୍ତି ଲାଭ ଏବଂ ଯେକୌଣସି ପ୍ରକାରର କମିଶନ ସମେତ ନିଜର ସମ୍ପୂର୍ଣ୍ଣ ଦରମା ଛାଡିବାକୁ ନିଷ୍ପତ୍ତି ନେଇଥିଲେ ।
ଆର୍ଥିକ ବର୍ଷ ୨୦୦୮-୦୯ରୁ ୨୦୧୯-୨୦ ମଧ୍ୟରେ ମୁକେଶ ଅମ୍ବାନୀ ତାଙ୍କର ବାର୍ଷିକ ପାରିଶ୍ରମିକ ୧୫ କୋଟି ଟଙ୍କାରେ ସୀମିତ ରଖିଥିଲେ । ପରିଚାଳନା ସ୍ତରରେ ଶିଳ୍ପରେ ଏବଂ କମ୍ପାନୀ ପାଇଁ ଏକ ବ୍ୟକ୍ତିଗତ ଉଦାହରଣ ସ୍ଥାପନ କରିବା ଏହା ପଛର କାରଣ ଥିଲା । ଉଲ୍ଲେଖଯୋଗ୍ୟ ଯେ ଭାରତରେ କୋଭିଡ୍-୧୯ ମହାମାରୀ ଦେଶର ସାମାଜିକ, ଅର୍ଥନୈତିକ ଏବଂ ଶିଳ୍ପ ପରିସ୍ଥିତି ଉପରେ ଖରାପ ପ୍ରଭାବ ପକାଇଥିଲା ।
ରିଲାଏନ୍ସର ବାର୍ଷିକ ରିପୋର୍ଟ ଅନୁଯାୟୀ, କମ୍ପାନୀର କାର୍ଯ୍ୟନିର୍ବାହୀ ନିର୍ଦ୍ଦେଶକ ନିଖିଲ ମେସୱାନିଙ୍କୁ ବାର୍ଷିକ ମୋଟ ୨୫ କୋଟି ଟଙ୍କା ଦରମା ଏବଂ ଅନ୍ୟାନ୍ୟ ସୁବିଧା ଭାବରେ ମିଳୁଛି । ସେହି ସମୟରେ, ତାଙ୍କ ସାନ ଭାଇ ତଥା କାର୍ଯ୍ୟନିର୍ବାହୀ ନିର୍ଦ୍ଦେଶକ ହିତଲ ମେସୱାନିଙ୍କ ଦରମା ମଧ୍ୟ ୨୫ କୋଟି ଟଙ୍କା ରହିଛି । ରିଲାଏନ୍ସର ଅନ୍ୟତମ କାର୍ଯ୍ୟନିର୍ବାହୀ ନିର୍ଦ୍ଦେଶକ ପି.ଏମ.ଏସ. ପ୍ରସାଦଙ୍କୁ ପ୍ରାୟ ୨୦ କୋଟି ଟଙ୍କା ଦରମା ଏବଂ ଅନ୍ୟାନ୍ୟ ସୁବିଧା ଭାବରେ ମିଳୁଛି ।
