ମଣ୍ଡି ସମସ୍ୟାକୁ ନେଇ ତେଜୁଛି ଚାଷୀ ଅସନ୍ତୋଷ, ମିଲର୍ସଙ୍କ ଅସହଯୋଗ ପାଇଁ ଉଠି ପାରୁନି ଧାନ

ଅତାବିରା/କଳାହାଣ୍ଡି: କଳାହାଣ୍ଡି, ବରଗଡ଼ ସବୁଠି ମଣ୍ଡି ସମସ୍ୟାକୁ ନେଇ ତେଜିଛି ଚାଷୀ ଅସନ୍ତୋଷ । କଳାହାଣ୍ଡିରେ ୧୦ଦିନ ହେଲାଣି ମାତ୍ର ୨ଜଣ ଚାଷୀଙ୍କ ଠାରୁ ମାତ୍ର ୧୫୦ କ୍ବିଣ୍ଟାଲ ଧାନ କିଣିଛି ପ୍ରଶାସନ । ଚାଷୀଙ୍କୁ ଏପର୍ଯ୍ୟନ୍ତ ଟୋକନ୍ ମିଳୁନଥିବାରୁ ହାଡ଼ଭଙ୍ଗା ଶୀତ ରାତିରେ ଖଳାରେ ନିଜ କଷ୍ଟ ଉପାର୍ଜିତ ଫସଲକୁ ଜଗି ବସିବାକୁ ବାଧ୍ୟ ହେଉଛନ୍ତି ଚାଷୀ । ସେହିଭଳି ବରଗଡ଼ ଜିଲ୍ଲାରେ ମଧ୍ୟ ନଭେମ୍ବର ୨୮ରୁ ମଣ୍ଡି ଖୋଲିଥିଲେ ବି ଟୋକନ ଅବ୍ୟବସ୍ଥା, ମଣ୍ଡିରୁ ଧାନ ନଉଠିବା ଭଳି ସମସ୍ୟାକୁ ନେଇ ଚାଷୀଙ୍କ ଭିତରେ ବଢ଼ୁଛି ଅସନ୍ତୋଷ । ବରଗଡ଼, କଳାହାଣ୍ଡି, ସମ୍ବଲପୁର ଭଳି ମାତ୍ର ୩ଟି ଜିଲ୍ଲାରେ ମଣ୍ଡି ଖୋଲିଥିଲେ ମଧ୍ୟ ୧୨ ଦିନ ହେଲାଣି ସ୍ବାଭାବିକ ହୋଇପାରୁନି ମଣ୍ଡି ବ୍ୟବସ୍ଥା ।

ମଣ୍ଡି ଖୋଲିବା ପୂର୍ବରୁ ବାରମ୍ବାର ସମୀକ୍ଷା ବୈଠକ । ଧାନ କିଣା ତଦାରଖ ପାଇଁ ମନ୍ତ୍ରୀ ସ୍ତରୀୟ କମିଟି ଗଠନ ହେଲା । ଜିଲ୍ଲାଓ୍ବାରୀ ମନ୍ତ୍ରୀଙ୍କୁ ଦାୟିତ୍ବ ଦିଆଗଲା । ସୁବ୍ୟବସ୍ଥିତ ଧାନ କିଣା ନେଇ ଯୋଗାଣ ମନ୍ତ୍ରୀଙ୍କ ଆଶ୍ବାସନା ପରେ ନଭେମ୍ବର ଶେଷ ଆଡ଼କୁ ଖୋଲିଲା ମଣ୍ଡି । ପୂଜାର୍ଚ୍ଚନା କରି ବହୁ ଆଡ଼ମ୍ବରରେ ସିନା ମଣ୍ଡି ଖୋଲିଲା ହେଲେ ମିଲର୍ସଙ୍କ ଅସହଯୋଗ ଯୋଗୁଁ ଉଠିଲାନି ଧାନ । ୪/୬ଦିନ ପରେ ପୁଣି ମିଲର୍ସଙ୍କ ସହ ବୈଠକ କଲେ ମନ୍ତ୍ରୀ । ଧାନ ଉଠାଇବାକୁ ହେଲା ସହମତି । ହେଲେ ମଣ୍ଡି ଖୋଲିବାର ୧୨ ଦିନ ପରେ ଇଏ ହେଉଛି ବାସ୍ତବ ସ୍ଥିତି । କଳାହାଣ୍ଡିରେ ଧାନମଣ୍ଡିରେ ଜାରି ରହିଛି ଅଚଳାବସ୍ଥା । ୧୦ ଦିନରେ ମାତ୍ର ୨ଜଣ ଚାଷୀଙ୍କ ୧୫୦ କ୍ବିଣ୍ଟାଲ ଧାନ କିଣିଛି ପ୍ରଶାସନ ।

ମଣ୍ଡି ଖୋଲିବାର ୧୦ଦିନ ପରେ ବି ନା’ ଚାଷୀଙ୍କୁ ମିଳିଛି ଟୋକନ, ନା’ ମିଲର୍ସ ଟ୍ୟାଗ୍ ହୋଇ ବ୍ୟାଙ୍କ ଗ୍ୟାରେଣ୍ଟି ଦେଉଛନ୍ତି । ଏମିତିକି ମଣ୍ଡିକୁ ବି ଆସିନି ଟାର୍ଗେଟ୍ । ଚଳିତ ବର୍ଷ ଧାନ ବିକ୍ରି ପାଇଁ କଳାହାଣ୍ଡି ଜିଲ୍ଲାରେ ୧ ଲକ୍ଷ ୨୧ ହଜାର ୧୮୧ ଜଣ ଚାଷୀ ପଞ୍ଜିକୃତ ହୋଇଥିବା ବେଳେ କେବଳ ୫% ଚାଷୀଙ୍କ ପାଖକୁ ଆସିଛି ଟୋକନ l ଅନ୍ୟପଟେ ଜିଲ୍ଲାରେ ୯୦ ମିଲର୍ସଙ୍କୁ ଧାନ କିଣା ଦାୟିତ୍ବ ଦିଆଯାଇଥିବା ବେଳେ ସମସ୍ତ ମିଲର୍ସଙ୍କୁ ଟ୍ୟାଗ୍ ସରିଛି ହେଲେ ୯୦ ମିଲର୍ସ ମଧ୍ୟରୁ କେବଳ ୧୨ ଜଣ ମିଲର୍ସ ବ୍ୟାଙ୍କ ଗ୍ୟାରେଣ୍ଟି ଦେଇଛନ୍ତି ।

ଯାହାର ଫଳ ସ୍ବରୂପ ହାଡ଼ଭଙ୍ଗା ଶୀତ ରାତିରେ ଏମିତି ଖଳାରେ ପଡ଼ିଥିବା ନିଜ କଷ୍ଟ ଉପାର୍ଜିତ ଧାନକୁ ଜଗିବସିବାକୁ ବାଧ୍ୟ ହେଉଛନ୍ତି ଚାଷୀ । ଖଳା ଓ ଘର ପିଣ୍ଡାରେ ଗଦା ହୋଇଛି ଚାଷୀଙ୍କ ଧାନ । ମଣ୍ଡିରେ ଅବ୍ୟବସ୍ଥା ଓ ଧାନ କିଣାରେ ଅହେତୁକ ବିଳମ୍ବ ଏଠି ଦଲାଲ୍ଙ୍କୁ ଦେଇଛି ସୁଯୋଗ । ଆଉ କମ୍ ଦରରେ ଦଲାଲଙ୍କ ହାତକୁ ଧାନ ଟେକି ଦେଉଛନ୍ତି ଚାଷୀ ।

ସେହିଭଳି ବରଗଡ଼ ଧାନ କିଣାରେ ଜାରି ରହିଛି ଅବ୍ୟବସ୍ଥା । ଜିଲ୍ଲାରେ ୧ ଲକ୍ଷ ୬୩ ହଜାରରୁ ଅଧିକ ଚାଷୀ ପଞ୍ଜିକରଣ କରିଥିବା ବେଳେ ବର୍ତ୍ତମାନ ସୁଦ୍ଧା କେବଳ ୭୩ ହଜାର ଚାଷୀଙ୍କୁ ମିଳିଛି ଟୋକନ୍ । ବରଗଡ଼ରେ ୨୩୦ ମଣ୍ଡି ୧୧୯ ରାଇସ ମିଲ ଏବଂ ୫୮ ସୋସାଇଟି ଜରିଆରେ ୧ ଲକ୍ଷ ୬୪ ହଜାର ଚାଷୀଙ୍କ ଧାନ ସଂଗ୍ରହ ଲକ୍ଷ୍ୟ ରହିଛି ।

ତେବେ ମଣ୍ଡିରେ ୭ ଲକ୍ଷ ପ୍ୟାକେଟରୁ ଅଧିକ ଧାନ ପଡ଼ିରହିଥିବା ବେଳେ ସେଥିରୁ ମାତ୍ର ୩୦ ହଜାର କୁଇଣ୍ଟାଳ ଧାନ ଉଠିଛି । ଧାନକିଣାକୁ ସୁବ୍ୟବସ୍ଥିତ କରିବାକୁ ସରକାରୀସ୍ତରରେ ବିଭିନ୍ନ ପଦକ୍ଷେପ ନିଆଯାଇଥିବା କଥା କୁହାଯାଉଥିବା ବେଳେ ଏବେ କଳାହାଣ୍ଡି ଓ ବରଗଡ଼ରେ ମଣ୍ଡିଗୁଡ଼ିକରେ ଅଚଳାଅବସ୍ଥା ସବୁ ବ୍ୟବସ୍ଥାର ପୋଲ୍ ଖୋଲିଦେଇଛି ।