ଭୁବନେଶ୍ବର ୧୬।୮: ଓଡ଼ିଶା ଯାତ୍ରୀ ଆପ୍ ଉପଭୋକ୍ତାଙ୍କ ମଧ୍ୟରୁ ୫୭ ପ୍ରତିଶତରୁ ଅଧିକ କେବଳ ମହିଳା । ଏହା ଓଡ଼ିଶାର ସାର୍ବଜନୀନ ପରିବହନ ଇକୋସିଷ୍ଟମ ପ୍ରତି ବଢୁଥିବା ଆସ୍ଥାର ଏକ ଦୃଢ଼ ସଙ୍କେତ । ତଥ୍ୟରୁ ଜଣାପଡିଛି ଯେ ଅକ୍ଟୋବର ୨୦୨୪ରୁ ଜୁଲାଇ ୨୦୨୫ ମଧ୍ୟରେ ଓଡ଼ିଶା ଯାତ୍ରୀ ପ୍ଲାଟଫର୍ମରେ ମୋଟ୍ ଉପଭୋକ୍ତାଙ୍କ ମଧ୍ୟରୁ ୫୭.୪୪ ପ୍ରତିଶତ ମହିଳା ଥିଲେ । ପ୍ଲାଟଫର୍ମ ବ୍ୟବହାର କରିଥିବା ୨.୫୭ ଲକ୍ଷ ଯାତ୍ରୀଙ୍କ ମଧ୍ୟରୁ ୧.୪୮ ଲକ୍ଷରୁ ଅଧିକ ମହିଳା ଉପଭୋକ୍ତା ଥିଲେ ।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଦ୍ୱାରା ଜାନୁଆରୀ ୨୦୨୫ରେ ଆରମ୍ଭ ହୋଇଥିବା ଓଡ଼ିଶା ଯାତ୍ରୀ ଆପ୍ । ଅକ୍ଟୋବର ୨୦୨୪ରେ ଏହାର ପାଇଲଟ୍ କାର୍ଯ୍ୟ ଆରମ୍ଭ କରିଥିଲା । ଜାନୁଆରୀ ୨୦୨୫ ସୁଦ୍ଧା ଏହାର ମହିଳା ବ୍ୟବହାରକାରୀ ୬୧.୬୩ ପ୍ରତିଶତରେ ପହଞ୍ଚିଥିଲା । ଜୁଲାଇ ୨୦୨୫ର ତଥ୍ୟରେ ମଧ୍ୟ, ମହିଳା ମାନେ ୫୫.୩୮ ପ୍ରତିଶତ ବ୍ୟବହାରକାରୀ ଥିଲେ । ଯାହା ପୁରୁଷ ଯାତ୍ରୀଙ୍କ ସଂଖ୍ୟାରୁ ଯଥେଷ୍ଟ ଅଧିକ ଥିଲା ।
ପ୍ରବର୍ତ୍ତନ ଏବଂ ପରିବହନ କର୍ତ୍ତୃପକ୍ଷଙ୍କ ସହିତ ଆପ୍ ର ସମନ୍ୱୟ ବିଶେଷକରି ମହିଳା ଏବଂ ଅନ୍ୟାନ୍ୟ ଦୁର୍ବଳ ଗୋଷ୍ଠୀଙ୍କ ପାଇଁ ଏକ ସୁରକ୍ଷିତ ଏବଂ ଦାୟିତ୍ୱପୂର୍ଣ୍ଣ ଯାତାୟାତ ଅଭିଜ୍ଞତା ସୃଷ୍ଟି କରିଛି। ମହିଳାମାନେ କେବଳ ଅଂଶଗ୍ରହଣ କରୁନାହାନ୍ତି, ସେମାନେ ଓଡ଼ିଶା ଯାତ୍ରୀ ଗ୍ରହଣ କରିବାରେ ନେତୃତ୍ୱ ନେଉଛନ୍ତି । ଏହା ପରିବହନ ପ୍ରତି ସରକାରଙ୍କ ଦୃଢ଼ ପ୍ରତିବଦ୍ଧତାକୁ ପ୍ରତିଫଳିତ କରେ ବୋଲି ଗୃହ ଏବଂ ନଗର ଉନ୍ନୟନ ବିଭାଗ ପ୍ରମୁଖ ସଚିବ ଉଷା ପାଢ଼ୀ କହିଛନ୍ତି ।
ଓଡ଼ିଶା ଯାତ୍ରୀ ଆପ୍ ରାଜ୍ୟ ପରିବହନ ପ୍ରାଧିକରଣ ସହିତ ମିଳିତ ଭାବରେ ୩୦ ହଜାରରୁ ଅଧିକ ତୀର୍ଥଯାତ୍ରୀଙ୍କୁ ମାଗଣା ଅଟୋ ଯାତ୍ରା ପ୍ରଦାନ କରିଛି । ରାଜ୍ୟ ସାରା ଅଧିକ ସହରକୁ ଓଡ଼ିଶା ଯାତ୍ରୀଙ୍କୁ ବିସ୍ତାର କରିବା ଏବଂ ପ୍ଲାଟଫର୍ମ ଅଧୀନରେ ଆମ୍ବୁଲାନ୍ସ ଏବଂ ଡଙ୍ଗା ସେବା ପ୍ରଚଳନ କରିବା ପାଇଁ ଯୋଜନା ଚାଲିଛି ।
You Can Read:
