ନୂଆଦିଲ୍ଲୀ ୨୫/୦୭: ଭାରତର ୱିକେଟ କିପର-ବ୍ୟାଟସମ୍ୟାନ୍ ରିଷଭ ପନ୍ତ । ଇଂଲଣ୍ଡ ବିପକ୍ଷ ଚତୁର୍ଥ ଟେଷ୍ଟରେ ସେ ପାଇଛନ୍ତି ଗଭୀର ଆଘାତ । ଭାଙ୍ଗିଯାଇଛି ପାଦର ଆଙ୍ଗୁଠି । ସେ ଆଗକୁ କରିବେନି ଓ୍ୱିକେଟ କିପିଂ । ମ୍ୟାଚ୍ ଅଧାରୁ ସେ ପଡିଆ ଛାଡି ରୁଲ୍ଡ ଆଉଟ୍ ହୋଇଥିଲେ । ଖେଳିବେ ଖେଳିବେନି ଏମିତି ଦେଖାଦେଇଥିଲା ଅନିଶ୍ଚିତତା । ତାଙ୍କ ସ୍ଥାନରେ ଅନେକ ଖେଳିବେ ବୋଲି ଚର୍ଚ୍ଚା ହେଉଥିଲା । ତେବେ ସବୁ ଚର୍ଚ୍ଚାରେ ପୂର୍ଣ୍ଣଛେଦ ପକାଇ ଭଙ୍ଗା ଗୋଡରେ ଚାଲିଆସିଥିଲେ ବ୍ୟାଟିଂ କରିବାକୁ ।
ହଠାତ୍ ତାଙ୍କ ମୈଦାନରେ ଏଣ୍ଟ୍ରି ସମସ୍ତଙ୍କୁ କରିଦେଇଥିଲା ଆଶ୍ଚର୍ଯ୍ୟ । ତାଙ୍କର ଅଦମ୍ୟ ସାହାସକୁ ସଲାମ କରିଥିଲା ମାଞ୍ଚେଷ୍ଟର । ଦମ୍ ଦେଖାଇ ହାସଲ କରିଥିଲେ ଅର୍ଦ୍ଧଶତକ । ତେବେ କ୍ରିକେଟର ଏହି ବିକଳ୍ପ ବ୍ୟବସ୍ଥାକୁ ନେଇ ଭଡକିଛନ୍ତି ଇଂଲଣ୍ଡର ପୂର୍ବତନ ଅଧିନାୟକ ମାଇକେଲ ଭନ୍ । ସେ ବିଶ୍ୱାସ କରନ୍ତି ଯେ ଟେଷ୍ଟ କ୍ରିକେଟରେ ମେଡିକାଲ ସବ୍ଷ୍ଟିଚ୍ୟୁଟ୍ ଅନୁମତି ନ ଦେବା ଦର୍ଶାଏ ଯେ କ୍ରିକେଟ ଏବେ ବି ସେହି ପୁରୁଣା ନିୟମରେ ଫସି ରହିଛି।
ପ୍ରକୃତରେ, କହିବାକୁ ଗଲେ ପନ୍ତ ମାଞ୍ଚେଷ୍ଟର ଟେଷ୍ଟ ମ୍ୟାଚ୍ରେ ଏକ ଭଙ୍ଗା ଗୋଡ ସହିତ ସାହସିକତାର ସହିତ ବ୍ୟାଟିଂ କରିଥିଲେ । ପ୍ରଥମ ଦିନରେ ଆହତ ହୋଇ ଅବସର ନେବା ପରେ, ସେ ପରଦିନ ପୁଣି ଥରେ ପଡ଼ିଆକୁ ଆସିଥିଲେ । ୩୭ ରନରୁ ତାଙ୍କର ଇନିଂସ ଜାରି ରଖିଲେ । ତାଙ୍କର ଅର୍ଦ୍ଧଶତକ ପୂରଣ କଲେ। ଏହି ସମୟରେ, ସେ ୨୮ ବଲ୍ର ସମ୍ମୁଖୀନ ହୋଇ ୧୭ ରନ କରିଥିଲେ।
ଭନ୍ 'ଦି ଟେଲିଗ୍ରାଫ୍'ରେ ତାଙ୍କ ସ୍ତମ୍ଭରେ ଲେଖିଛନ୍ତି, 'ତାଙ୍କୁ ଭଙ୍ଗା ଗୋଡ ସହିତ ବ୍ୟାଟିଂ କରିବା ଦେଖିବା ଆଶ୍ଚର୍ଯ୍ୟଜନକ ଥିଲା। ସେ ସାହସ ଏବଂ ଦକ୍ଷତା ଉଭୟ ଦେଖାଇଥିଲେ, କିନ୍ତୁ ସେ ସୁସ୍ଥ ନଥିଲେ। ସେ ଦୌଡ଼ି ପାରୁନଥିଲେ । ଏହା ତାଙ୍କ ଆଘାତକୁ ଆହୁରି ଖରାପ କରିଥାନ୍ତା ।'
ସେ କହିଥିଲେ ଯେ ୱିକେଟ କିପରଙ୍କ ସ୍ଥାନରେ ଜଣେ ବଦଳ ଖେଳାଳି ଖେଳିବାକୁ ଆସେ । କିନ୍ତୁ ବ୍ୟାଟିଂ କିମ୍ବା ବୋଲିଂ ପାଇଁ ନୁହେଁ - ଏହି ନିୟମ ସମ୍ପୂର୍ଣ୍ଣ ଅଜବ ଓ ଭୁଲ। କ୍ରିକେଟ୍ ହେଉଛି ଏକମାତ୍ର ଖେଳ ଯେଉଁଥିରେ ଏପରି ପରିସ୍ଥିତିରେ ଜଣେ ଖେଳାଳିଙ୍କୁ ବଦଳାଯାଇପାରିବ ନାହିଁ । ଏହା ଦର୍ଶାଉଛି ଯେ କ୍ରିକେଟ୍ ଏବେ ବି ଅନ୍ଧାର ଯୁଗରେ ବଞ୍ଚି ରହିଛି।
ଭନ୍ ବିଶ୍ୱାସ କରନ୍ତି ଯେ ଆଘାତ କ୍ଷେତ୍ରରେ, ଜଣେ ଖେଳାଳିଙ୍କୁ ସମାନ ସ୍ତରର ଖେଳାଳିଙ୍କ ସହିତ ବଦଳାଯିବା ଉଚିତ । ଯେପରିକି ବ୍ୟାଟ୍ସମ୍ୟାନଙ୍କ ପାଇଁ ବ୍ୟାଟ୍ସମ୍ୟାନ୍ କିମ୍ବା ସ୍ପିନରଙ୍କ ପାଇଁ ସ୍ପିନର। ଯଦି ଜଣେ ଖେଳାଳିଙ୍କ ହାଡ଼ ଭାଙ୍ଗିବା ଭଳି ଗମ୍ଭୀର ଆଘାତ ହୁଏ । ଏହା ଡାକ୍ତର କିମ୍ବା ସ୍କାନ ଦ୍ୱାରା ପ୍ରମାଣିତ ହୁଏ ।
ତେବେ ଅନ୍ୟ କାହାକୁ ସେହି ଖେଳାଳିଙ୍କ ସ୍ଥାନରେ ସ୍ଥାନ ଦେବାକୁ ଅନୁମତି ଦିଆଯିବା ଉଚିତ। ସେ ପରାମର୍ଶ ଦେଇଥିଲେ ଯେ ମ୍ୟାଚ୍ ପୂର୍ବରୁ ପ୍ରତ୍ୟେକ ଖେଳାଳିଙ୍କ ପାଇଁ ଜଣେ ବ୍ୟାକ୍ଅପ୍ ଖେଳାଳି ନିର୍ଣ୍ଣୟ କରାଯିବା ଉଚିତ। ଉଭୟ ଦଳ ଏହାକୁ ଅନୁମୋଦନ କରିବା ଉଚିତ। ମ୍ୟାଚ୍ ରେଫରି ଏହାକୁ ତଦାରଖ କରିବା ଉଚିତ।
