ଦିଘା: ଅବିକଳ ପୁରୀ ଶ୍ରୀ ଜଗନ୍ନାଥଙ୍କ ମନ୍ଦିର ଭଳି କରିବାକୁ ଚେଷ୍ଟା କରି ଦିଘାରେ ତିଆରି ହୋଇଥିବା ଜଗନ୍ନାଥ ମନ୍ଦିରକୁ ଉଦ୍ଘାଟନ କରିବାକୁ ଯାଉଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ। ଏପ୍ରିଲ ୩୦ ତାରିଖ ବୁଧବାର ଅକ୍ଷୟ ତୃତୀୟାରେ ଏହି ମନ୍ଦିରର ଶୁଭଉଦ୍ଘାଟନ ହେବ। ନବନିର୍ମିତ ମନ୍ଦିରଟି ପ୍ରସିଦ୍ଧ ପୁରୀ ଜଗନ୍ନାଥ ମନ୍ଦିରର ଏକ ଚମତ୍କାର ପ୍ରତିକୃତି। ବେଙ୍ଗଲ ସରକାର ଏହି ଅଞ୍ଚଳକୁ ପର୍ଯ୍ୟଟନ କ୍ଷେତ୍ରରେ ମଜଭୁତ କରିବା ସହିତ ଓ ତୀର୍ଥ ସ୍ଥଳରେ ପରିଣତ କରିବାକୁ ଚେଷ୍ଟା କରୁଛନ୍ତି।
ପାରମ୍ପରିକ କଳିଙ୍ଗ ସ୍ଥାପତ୍ୟ ଶୈଳୀରେ ନିର୍ମିତ, ଏହି ଭବ୍ୟ ମନ୍ଦିରଟି ରାଜସ୍ଥାନର ଉତ୍କୃଷ୍ଟ ଗୋଲାପୀ ବାଲିପଥରରେ ନିର୍ମିତ ହୋଇଛି। ୨୦ ଏକର ପରିମିତିରେ ବ୍ୟାପ୍ତ ଏହି ମନ୍ଦିର ପାଇଁ ରାଜ୍ୟ ସରକାର ୨୫୦ କୋଟି ଟଙ୍କା ଖର୍ଚ୍ଚ କରିଛନ୍ତି। ରାଜସ୍ଥାନର ୮୦୦ ରୁ ଅଧିକ କୁଶଳୀ କାରିଗର ଏହି ମନ୍ଦିର ନିର୍ମାଣ କରିଛନ୍ତି।
ଦୀଘାର ମନ୍ଦିରରେ ପୁରୀ ଶ୍ରୀ ଜଗନ୍ନାଥ ମନ୍ଦିର ପରି ପ୍ରମୁଖ ବୈଶିଷ୍ଟ୍ୟ ଯଥା ଭୋଗ ମଣ୍ଡପ, ନାଟମଣ୍ଡପ, ଜଗମୋହନ ଏବଂ ପବିତ୍ର ଗର୍ଭଗୃହ ଆଦି ଅତି ନିଖୁଣ କାରୁକାର୍ଯ୍ୟ କରାଯାଇଛି। ଯେଉଁଥିରେ ଜଗନ୍ନାଥ ବିଦ୍ୟାମାନ ଅଛନ୍ତି। ମନ୍ଦିର ପ୍ରବେଶ ଦ୍ୱାରରେ ଏକ ଉଚ୍ଚ ୩୪ ଫୁଟର ଲମ୍ବା, ୧୮ ମୁଖା ବିଶିଷ୍ଟ ଅରୁଣ ସ୍ତମ୍ଭ ନିର୍ମାଣ କରାଯାଇଛି। ଯେଉଁଠାରେ କଳା ପଥରରେ ମୁକୁଟ ପିନ୍ଧିଥିବା ଅରୁଣ ମୂର୍ତ୍ତି ତିଆରି ହୋଇଛି।
ପୁରୀ ମନ୍ଦିରକୁ କପି କରିବାକୁ ଚେଷ୍ଟା କରି ଦୀଘା ଦୀଘାରେ ସିଂହଦ୍ୱାର, ବ୍ୟାଘ୍ରଦ୍ୱାର, ହସ୍ତୀଦ୍ୱାର ଏବଂ ଅଶ୍ୱଦ୍ୱାର ପରି ସମାନ ୪ ଦୁଆର କରାଯାଇଛି। ତା ସିହତ ଲକ୍ଷ୍ମୀ ମନ୍ଦିର ଏବଂ ପ୍ରଭୁ ଜଗନ୍ନାଥଙ୍କ ପବିତ୍ର ଭୋଗ ନୈବେଦ୍ୟ ପ୍ରସ୍ତୁତ କରିବା ପାଇଁ ଏକ ପୃଥକ ଭୋଗଶାଳା ମଧ୍ୟ ରହିଛି।
ସୋମବାର ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ମନ୍ଦିର ଓ ଏହାର ପରିସର ପରିଦର୍ଶନରେ ଆସିଥିଲେ। ମନ୍ଦିର ଉଦଘାଟନ ପରେ ଦୀଘା ଏକ ଅନ୍ତର୍ଜାତୀୟ ପର୍ଯ୍ୟଟନ ସ୍ଥଳରେ ପରିଣତ ହେବ ପର୍ଯ୍ୟଟକଙ୍କୁ ଆକର୍ଷଣ କରିବ ବୋଲି ସେ କହିଥିଲେ। ମନ୍ଦିରକୁ ଆଗାମୀ କିଛି ହଜାର ବର୍ଷ ପାଇଁ ଲୋକ ଆସିବେ ବୋଲି ସେ କହିଥିଲେ।
ପିଟିଆଇକୁ ପ୍ରତିକ୍ରିୟା ଦେଇ ମମତା କହିଥିଲେ “ଦୀଘା ଏକ ଆନ୍ତର୍ଜାତୀୟ ପର୍ଯ୍ୟଟନ ଆକର୍ଷଣରେ ପରିଣତ ହେବ। ଏହା ସମନ୍ୱୟର ସ୍ଥାନ ଭାବରେ କାର୍ଯ୍ୟ କରିବ। ସମୁଦ୍ର ଯୋଗୁ, ଦୀଘାର ଏକ ସ୍ୱତନ୍ତ୍ର ଆକର୍ଷଣ ରହିଛି। ଏବେ, ଯଦି ଏହା ତୀର୍ଥସ୍ଥାନ ହୋଇଯାଏ, ତେବେ ଅଧିକ ପର୍ଯ୍ୟଟକ ଆସିବେ। ମୁଁ ଭାବୁଛି ମୂର୍ତ୍ତିକାରମାନେ ଏକ ଚମତ୍କାର କାମ କରିଛନ୍ତି।”
ସୂଚନା ଅନୁସାରେ, ମୁଖ୍ୟମନ୍ତ୍ରୀ ମମତା ବାନାର୍ଜୀ ମନ୍ଦିର ପାଇଁ ନିଜେ ସ୍ଥାନ ଚିହ୍ନଟ କରିଥିଲେ। ଏବଂ ୨୦୧୯ରେ ଏହାର ପ୍ରତିଷ୍ଠା ଘୋଷଣା କରିଥିଲେ। କୋଭିଡ-୧୯ ମହାମାରୀ ଯୋଗୁ ମନ୍ଦିର କାର୍ଯ୍ୟ ବିଳମ୍ବରେ ଆରମ୍ଭ ହୋଇଥିଲେ ବର୍ତ୍ତମାନ ଏହେ ଉଦ୍ଘାଟନ ପାଇଁ ପ୍ରସ୍ତୁତ ହୋଇ ସାରିଛି।
ପୁରୀର ଦକ୍ଷ କାରିଗରମାନେ ମୂର୍ତ୍ତି ପ୍ରତିଷ୍ଠା ଉତ୍ସବ ପରିଚାଳନା କରିବେ ଏବଂ ପୁରୁଣା ପରମ୍ପରାକୁ ପାଳନ କରି ଦୈନନ୍ଦିନ ପତାକା ପରିବର୍ତ୍ତନ ରୀତିନୀତି ଆଦି କରିବେ। ଦୀଘାରେ ଜଗନ୍ନାଥ ଧାମର ଉଦଘାଟନ ପଶ୍ଚିମବଙ୍ଗ ପାଇଁ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ସାବ୍ୟସ୍ତ ହୋଇପାରେ। ଏହାର ଆଧ୍ୟାତ୍ମିକ ପରିବେଶ ଓ ସ୍ଥାପତ୍ୟ ଚମତ୍କାରିତା ପର୍ଯ୍ୟଟକଙ୍କୁ ଏଠାକୁ ଆକର୍ଷଣ କରିପାରେ ବୋଲି ବେଙ୍ଗଲ ସରକାର ଆଶା ପୋଷଣ କରିଛନ୍ତି।
ସୂଚନା ଥାଉକି ରାଜ୍ୟ ପାଣ୍ଠି ଉପରେ ପ୍ରଶ୍ନ କରି ମନ୍ଦିର ପ୍ରକଳ୍ପକୁ ବିଜେପି ବିରୋଧ କରିଥିଲା। ଦଳ ଅଭିଯୋଗ କରିଥିଲା ଯେ ଏହି ଯୋଜନା ମନ୍ଦିର ପାଇଁ ନୁହେଁ, ବରଂ ଏକ ସାଂସ୍କୃତିକ କେନ୍ଦ୍ର ପାଇଁ ଥିଲା। ଏଥିସହିତ ପୁରୀ ମନ୍ଦିର ପ୍ରଶାସନ ପକ୍ଷରୁ ମଧ୍ୟ ଏହି ମନ୍ଦିରର ନିତିକାନ୍ତି ଅବେଳରେ କରିବା ନେଇ ପ୍ରଶ୍ନ ଉଠିଥିଲା।
