ନୂଆଦିଲ୍ଲୀ ୨୪।୩: କର୍ଣ୍ଣାଟକ ସରକାର ମୁସଲମାନଙ୍କୁ ସରକାରୀ ଠିକାରେ ୪ ପ୍ରତିଶତ ସଂରକ୍ଷଣ ଦେଇଛନ୍ତି। ଏହାକୁ ନେଇ ବିଜେପି ଏବେ ଆକ୍ରମକ ହୋଇ ଉଠିଛି। ବିଜେପିର କହିବା କଥା ହେଉଛି କଂଗ୍ରେସ ସମ୍ବିଧାନର ଅବମାନନା କରିଛି। ବିଜେପିର ଏହି ଅଭିଯୋଗ ଉପରେ ଏଆଇସିସି ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ସୋମବାର ପାଲଟା ଆକ୍ରମଣ କରିଛନ୍ତି। ସେ କହିଛନ୍ତି ଧର୍ମ ଆଧାରରେ ବିଜେପି ଆଇନ ତିଆରି କରେ, ହେଲେ ଆଜି ଏହି ପ୍ରସଙ୍ଗ ଉଠାଇ ନିଜର ଦୁର୍ନୀତିକୁ ଲୁଚେଇବାକୁ ଚେଷ୍ଟା କରୁଛି।
ମଲ୍ଲିକାର୍ଜୁନ ଖଡଗେ କହିଛନ୍ତି ଯେ ଏହା ପୂର୍ବରୁ କର୍ଣ୍ଣାଟକରେ ଯେଉଁ ବି ଦଳ ଶାସନ କରୁଥିଲେ ସେମାନେ ସେହି ସମୟର ରିଜର୍ଭେସନକୁ ସ୍ୱୀକାର କରିଥିଲେ, ଯାହା ୧୯୯୪ ମସିହାରେ ଆରମ୍ଭ ହୋଇଥିଲା ଓ ଏପର୍ଯ୍ୟନ୍ତ ରହିଛି। ମୁସଲମାନମାନଙ୍କୁ ପୂର୍ବରୁ କୌଣସି ଅଲଗା ରିଜର୍ଭେସନ ଦିଆଯାଉ ନଥିଲା କି ଆଜି ବି ଦିଆଯାଉନି। ଆମେ ସମ୍ବିଧାନକୁ ପାଳନ କରୁଛୁ, ସମ୍ବିଧାନ ବିରୋଧରେ କେହି ଯଦି କିଛି କହେ କଂଗ୍ରେସ ସୁପ ବସିବନି।
ସେପଟେ କର୍ଣ୍ଣାଟକ ଉପମୁଖ୍ୟମନ୍ତ୍ରୀ ଡି.କେ.ଶିବକୁମାର ରାଜ୍ୟରେ ମୁସଲମାନଙ୍କ ନିମନ୍ତେ ୪% ସଂରକ୍ଷଣ ବ୍ୟବସ୍ଥା କରିବା ପାଇଁ ସମ୍ବିଧାନ ବଦଳାଇବା ସମ୍ପର୍କରେ ଦେଇଥିବା ବୟାନକୁ ସୋମବାର ଅସ୍ୱୀକାର କରିଛନ୍ତି। ସେ କହିଛନ୍ତି ଯେ ତାଙ୍କ କଥାକୁ ଭୁଲ ଭାବେ ଉପସ୍ଥାପନା କରାଯାଇଛି। ସେ କହିଛନ୍ତି ମୁଁ ଜଣେ ସମ୍ବେଦନଶୀଳ ନେତା, ଗତ ୩୬ ବର୍ଷ ହେଲା ବିଧାନସଭାକୁ ଆସୁଛି। ମୁଁ ସମ୍ବିଧାନ ବଦଳାଇବା କଥା ଆଦୌ କହି ନାହିଁ।
ତେବେ ସେ କହିଛନ୍ତି ଯେ ମୁଁ ସାଧାରଣ ଭାବେ କହିଥିଲି ବିଭିନ୍ନ ନିଷ୍ପତ୍ତି ପରେ ଅନେକ ପରିବର୍ତ୍ତନ ହେବ। ଯାହା ବି ରିଜର୍ଭେସନ ଦିଆଯାଇଛି ତାହା ପଛୁଆ ବର୍ଗଙ୍କ ରିଜର୍ଭେସନ ଅନୁସାରେ ଦିଆଯାଇଛି। ତେବେ ମୁଁ କହିନାହିଁ ଆମେ ସମ୍ବିଧାନ ବଦଳାଇ ଦେବୁ। ମୋ କଥାକୁ ଭୁଲ ଭାବେ ଉପସ୍ଥାପନ କରାଯାଇଛି ଓ ଏଥି ପାଇଁ ବିଧାନସଭାରେ ସ୍ୱାଧୀକାର ଭଙ୍ଗ ନୋଟିସ ଦେବି ଏବଂ ଏହି ମାମଲାକୁ ନେଇ ଲଢିବି। ସେପଟେ ସଂସଦୀୟ ବ୍ୟାପାର ମନ୍ତ୍ରୀ କିରେଣ ରିଜିଜୁ ସାମ୍ବିଧାନିକ ପଦରେ ବସିଥିବା ବ୍ୟକ୍ତିଙ୍କ ଦ୍ୱାରା ମୁସଲମାନଙ୍କୁ ୪ ପ୍ରତିଶତ ସଂରକ୍ଷଣ ଦେବା ପାଇଁ ସମ୍ବିଧାନ ବଦଳାଇବାର କଥା କହିବା ଆଦୌ ସ୍ୱୀକାରଯୋଗ୍ୟ ନୁହେଁ ବୋଲି କହିଛନ୍ତି।
କିରେଣ ରିଜିଜୁ କହିଛନ୍ତି ଯେ ଏ କଥାକୁ ସଂସଦ ଚୁଚାପ ବସି ଦେଖି ପାରିବନି। ପ୍ରସଙ୍ଗରେ କଂଗ୍ରେସକୁ ସ୍ପଷ୍ଟିକରଣ ଦେବାକୁ ପଡିବ। ଏପରି ମତମନ୍ତବ୍ୟ ଦେଇଥିବା ବ୍ୟକ୍ତିକୁ ବହିଷ୍କାର କରିବା ଦରକାର। ଗୋଟିଏ ପଟେ ମୁସଲମାନଙ୍କୁ ସଂରକ୍ଷଣ ଦେବା କଥା କହୁଛନ୍ତି ଅନ୍ୟପଟେ ବାବା ସାହେବଙ୍କ ଫଟୋ ଓ ସମ୍ବିଧାନ ବହି ପକେଟରେ ରଖି ନାଟକ କରୁଛନ୍ତି।
