ନୂଆଦିଲ୍ଲୀ ୦୩।୦୭; ପାକିସ୍ତାନର ଖାଇବର ପଖତୁନଖ୍ୱାରେ ପୁଣି ବୋମା ବିସ୍ଫୋରଣ। ଏହି ବିସ୍ଫୋରଣରେ କମିଶନରଙ୍କ ସମେତ ଚାରି ଜଣ ସରକାରୀ ଅଧିକାରୀ ପ୍ରାଣ ହରାଇଛନ୍ତି । ଏହା ସହ ୧୧ ଜଣ ଆହତ ହୋଇଛନ୍ତି। ଏହି ବିସ୍ଫୋରଣ ସମ୍ପର୍କରେ ପୋଲିସ ନିଜେ ସୂଚନା ଦେଇଛି। ଆଫଗାନିସ୍ତାନ ସୀମାନ୍ତବର୍ତ୍ତୀ ଆଦିବାସୀ ଜିଲ୍ଲା ବାଜୌରର ଖାର ତହସିଲର ମେଳା ନିକଟରେ ନୱାଗାଇ ତହସିଲର ସହାୟକ କମିଶନର ଫୈସଲ ସୁଲତାନଙ୍କ ଗାଡ଼ିକୁ ଟାର୍ଗେଟ କରାଯାଇଥିଲା। ସୁରକ୍ଷା ବାହିନୀ ଘଟଣାସ୍ଥଳକୁ ଘେରାବନ୍ଦୀ କରିଛନ୍ତି। ଆକ୍ରମଣର ସର୍ଚ୍ଚ ଅପରେସନ ଏବଂ ତଦନ୍ତ ଚଳାଇଛନ୍ତି।
ଖାଇବର ପଖତୁନଖ୍ୱା ମୁଖ୍ୟମନ୍ତ୍ରୀଙ୍କ ସୂଚନା ପରାମର୍ଶଦାତା ବୋମା ବିସ୍ଫୋରଣକୁ ନିନ୍ଦା କରିଛନ୍ତି ଏବଂ ଏହାକୁ 'ଅତ୍ୟନ୍ତ ଦୁଃଖଦ ଘଟଣା' ବୋଲି କହିଛନ୍ତି। ସେ ଏକ ପ୍ରେସ୍ ବିଜ୍ଞପ୍ତିରେ କହିଛନ୍ତି, "ସହାୟକ କମିଶନର ଏବଂ ତହସିଲଦାରଙ୍କ ସମେତ ଗୁରୁତ୍ୱପୂର୍ଣ୍ଣ ଲୋକଙ୍କ ମୃତ୍ୟୁ ଅତ୍ୟନ୍ତ ଦୁଃଖଦ। "ଆମେ ଦେଶ ବିରୋଧୀ ତତ୍ତ୍ୱମାନଙ୍କୁ ସେମାନଙ୍କର ଘୃଣ୍ୟ ଯୋଜନାକୁ ସଫଳ ହେବାକୁ ଦେବୁ ନାହିଁ। ମୁଖ୍ୟମନ୍ତ୍ରୀ ଅଲି ଅମିନ୍ ଘଟଣାର ପୁଙ୍ଖାନୁପୁଙ୍ଖ ତଦନ୍ତ ନିର୍ଦ୍ଦେଶ ଦେଇଛନ୍ତି ଏବଂ ଆହତମାନଙ୍କୁ ତୁରନ୍ତ ଚିକିତ୍ସା ସହାୟତା ଯୋଗାଇବାକୁ ନିର୍ଦ୍ଦେଶ ଦେଇଛନ୍ତି।
ପୂର୍ବରୁ ମଙ୍ଗଳବାର ପାକିସ୍ତାନରେ ଆତଙ୍କବାଦୀମାନେ ଆକ୍ରମଣ କରିଥିଲେ। ଏହି ଆତଙ୍କବାଦୀ ଆକ୍ରମଣ ଅଶାନ୍ତ ଦକ୍ଷିଣ-ପଶ୍ଚିମ ପାକିସ୍ତାନରେ ଘଟିଥିଲା। ବନ୍ଧୁକ ଏବଂ ରକେଟ୍ ଧରି ଅନେକ ଆତଙ୍କବାଦୀ ପ୍ରଥମେ ଏକ ପୋଲିସ ଷ୍ଟେସନ୍ ଉପରେ ଆକ୍ରମଣ କରିଥିଲେ ଏବଂ ପରେ ୨ଟି ବ୍ୟାଙ୍କରେ ନିଆଁ ଲଗାଇ ଦେଇଥିଲେ। ଏହି ଆତଙ୍କବାଦୀ ଆକ୍ରମଣରେ ଜଣେ ଯୁବକର ମୃତ୍ୟୁ ହୋଇଥିଲା ଏବଂ ଅନ୍ୟ ୯ ଜଣ ଆହତ ହୋଇଥିଲେ।
