ସୁପ୍ରିମକୋର୍ଟଙ୍କ ଦ୍ୱାରସ୍ଥ ହେଲେ ସୋନମ ୱାଙ୍ଗଚୁକଙ୍କ ପତ୍ନୀ ଗୀତାଞ୍ଜଳି, ମୁକ୍ତି ପାଇଁ କଲେ ଆବେଦନ

ନୂଆଦିଲ୍ଲୀ ୦୩/୧୦: ପରିବେଶବିତ୍ ଓ ଶିକ୍ଷାବିତ୍ ସୋନମ ୱାଙ୍ଗଚୁକଙ୍କ ଗିରଫଦାରୀକୁ ଚ୍ୟାଲେଞ୍ଜ । ସୁପ୍ରିମକୋର୍ଟଙ୍କ ଦ୍ୱାରସ୍ଥ ହେଲେ ପତ୍ନୀ ଗୀତାଞ୍ଜଳି ଜେ. ଆଙ୍ଗମୋ । ତାଙ୍କ ସ୍ୱାମୀଙ୍କ ମୁକ୍ତି ଆବେଦନ କରି ସର୍ବୋଚ୍ଚ ନ୍ୟାୟାଳୟର ଦ୍ୱାରସ୍ଥ ହୋଇଛନ୍ତି। ଗୀତାଞ୍ଜଳି ସୋନମ ୱାଙ୍ଗଚୁକଙ୍କ ମୁକ୍ତି ପାଇଁ ଦାବି କରିଛନ୍ତି । ସେପ୍ଟେମ୍ବର ୨୪ ତାରିଖରେ ଲଦାଖରେ ହୋଇଥିବା ହିଂସାତ୍ମକ ସଂଘର୍ଷ ପରେ ତାଙ୍କୁ ଅଟକ ରଖିବା ପରଠାରୁ ଜଳବାୟୁ କର୍ମୀ ରାଜସ୍ଥାନର ଯୋଧପୁର ଜେଲରେ ଅଛନ୍ତି। ସରକାରୀ ରେକର୍ଡ ଅନୁଯାୟୀ, ଆଙ୍ଗମୋ ଗୁରୁବାର, ଅକ୍ଟୋବର ୧ ତାରିଖରେ ସୁପ୍ରିମକୋର୍ଟରେ ତାଙ୍କର ଆବେଦନ ଦାଖଲ କରିଥିଲେ।

ଗୀତାଞ୍ଜଳିଙ୍କ କାର୍ଯ୍ୟାନୁଷ୍ଠାନ ସୋନମ ୱାଙ୍ଗଚୁକଙ୍କ ମୁକ୍ତି ପାଇଁ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ତୁରନ୍ତ ହସ୍ତକ୍ଷେପ ଲୋଡ଼ିବାର ଗୋଟିଏ ଦିନ ପରେ ଆସିଛି। ସେ ତାଙ୍କ ସ୍ୱାମୀଙ୍କ ମୁକ୍ତି ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମଧ୍ୟ ନିବେଦନ କରିଛନ୍ତି। ତାଙ୍କ ଚିଠିରେ ସେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ଲଦାଖର ଲେଫ୍ଟନାଣ୍ଟ ଗଭର୍ଣ୍ଣର କବିନ୍ଦର ଗୁପ୍ତା, କେନ୍ଦ୍ର ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲ ଏବଂ ଲେହ ଜିଲ୍ଲା କଲେକ୍ଟରଙ୍କୁ ମଧ୍ୟ ନିବେଦନ କରିଛନ୍ତି। ସେ 'X' ରେ ତାଙ୍କର ଚିଠି ସେୟାର କରିଛନ୍ତି ।

ଗୀତାଞ୍ଜଳି ଆଙ୍ଗମୋ ପୂର୍ବରୁ ତାଙ୍କ ସ୍ୱାମୀଙ୍କ ଅଟକକୁ ନେଇ ସରକାରଙ୍କୁ ଟାର୍ଗେଟ କରିଥିଲେ । ଅଭିଯୋଗ କରିଥିଲେ ଯେ ତାଙ୍କୁ "ବିଶ୍ୱାସଘାତକ" ଓ ଗୁପ୍ତଚର ଭାବରେ ଚିତ୍ରିତ କରାଯାଉଛି । ସେ କହିଥିଲେ, ଆମ ବିରୋଧରେ ଏକ ପ୍ରକାର ଗୁପ୍ତଚର କାର୍ଯ୍ୟ ଚାଲିଛି । ଆମେ CBI ଠାରୁ ଆରମ୍ଭ କରି ଆୟକର ବିଭାଗ ପର୍ଯ୍ୟନ୍ତ ଅଧିକାରୀମାନଙ୍କୁ ଅଭିଯୋଗ ସ୍ପଷ୍ଟ କରୁଥିବା ସମସ୍ତ ଦସ୍ତାବିଜ ଦାଖଲ କରିଛୁ । ତଥାପି ସୋନମଙ୍କୁ ବଦନାମ କରିବା ଓ ଷଷ୍ଠ ସୂଚୀ ଆନ୍ଦୋଳନକୁ ଦୁର୍ବଳ କରିବା ପାଇଁ ଏକ ଆବରଣ ସୃଷ୍ଟି କରାଯାଉଛି। 

ଲେହ ପୋଲିସ ସୋନମ ୱାଙ୍ଗଚୁକଙ୍କ ପାକିସ୍ତାନ ଗସ୍ତର ଉଲ୍ଲେଖ କରିବା ଓ ପଡ଼ୋଶୀ ଦେଶ ସହିତ ତାଙ୍କର ସମ୍ପର୍କ ଥିବା ଅଭିଯୋଗ କରିବା ପରେ ତାଙ୍କର ମନ୍ତବ୍ୟ ଆସିଥିଲା। ଆଙ୍ଗମୋ ପ୍ରତିକ୍ରିୟା ଦେଇଥିଲେ, "ସୋନମ ପାକିସ୍ତାନରେ ଏକ ସମ୍ମିଳନୀରେ ଯୋଗ ଦେଇଥିଲେ। ଏଥିରେ କ'ଣ ଭୁଲ?" ଫେବୃଆରୀରେ, ଜାତିସଂଘ ଏବଂ ଡନ୍ ମିଡିଆ ଜଳବାୟୁ ପରିବର୍ତ୍ତନ ଉପରେ ଏକ ସମ୍ମିଳନୀ ଆୟୋଜନ କରିଥିଲେ... ସେହି ବୈଠକରେ କିଛି ଭୁଲ ନଥିଲା, ଯଦିଓ ସେ ମଞ୍ଚରୁ ପ୍ରଧାନମନ୍ତ୍ରୀ ମୋଦିଙ୍କ "ମିଶନ ଲାଇଫ୍"କୁ ପ୍ରଶଂସା କରିଥିଲେ।

ସୋନମ ୱାଙ୍ଗଚୁକଙ୍କୁ ସେପ୍ଟେମ୍ବର ୨୬ ତାରିଖରେ ଜାତୀୟ ସୁରକ୍ଷା ଆଇନ (NSA) ଅଧୀନରେ ଗିରଫ କରାଯାଇଥିଲା । କିଛି ସମୟ ପରେ ଯୋଧପୁର ଜେଲକୁ ପଠାଯାଇଥିଲା। ଗିରଫଦାରୀ ଲେହରେ ବିରୋଧ ପ୍ରଦର୍ଶନ ସମୟରେ ହିଂସା ପରେ ହୋଇଥିଲା, ଯେଉଁଥିରେ ଅତି କମରେ ଚାରି ଜଣଙ୍କ ଜୀବନ ଯାଇଥିଲା।

ମଙ୍ଗଳବାର ଦିନ ଏହି ଅଞ୍ଚଳରେ BNSSର ଧାରା ୧୬୩ ଅନୁଯାୟୀ ଲାଗୁ ହୋଇଥିବା କଟକଣା କିଛି ଘଣ୍ଟା ପାଇଁ କୋହଳ କରାଯାଇଥିଲା । ଯାହା ଫଳରେ ଲୋକମାନେ ଅତ୍ୟାବଶ୍ୟକ ସାମଗ୍ରୀ କିଣିପାରିବେ । ପ୍ରତିବାଦକାରୀମାନେ ଏହି ଅଞ୍ଚଳକୁ ସମ୍ବିଧାନର ଷଷ୍ଠ ଅନୁସୂଚୀରେ ଅନ୍ତର୍ଭୁକ୍ତ କରିବାକୁ ଦାବି କରୁଛନ୍ତି। ହିଂସାକାଣ୍ଡରେ ମୋଟ ୪୪ ଜଣଙ୍କୁ ଗିରଫ କରାଯାଇଛି।