ହକିରେ ଓଡ଼ିଶାର ବିରାଟ ରେକର୍ଡ, ୫୦ ଗୋଲରେ ତ୍ରିପୁରାକୁ ହରାଇଲା

ଗୌହାଟୀ: ଖେଳରେ ଅସମ୍ଭବ ବୋଲି କିଛି ନଥାଏ । ଅନେକ ସମୟରେ ବିଶ୍ୱାସ ହେଉ ନଥିବା କଥା ବାସ୍ତବ ହୋଇଥାଏ । ଏହିଭଳି ଏକ ଅସମ୍ଭବକୁ ସମ୍ଭବ କରି ଏକ ବିରଳ ରେକର୍ଡର ଅଧିକାରୀ ହୋଇଛି ଓଡ଼ିଶା ହକି । ଗୋଟିଏ ମ୍ୟାଚ୍‌ରେ ଓଡିଶା ହକି ଟିମ୍ ୫୦ ଗୋଲ୍ ସ୍କୋର କରିଛି । ବିଶ୍ୱାସ ହେଉ ନ ଥିଲେ ବି ଏହା ସତ୍ୟ । ଅସ୍ମିତା ପୂର୍ବାଂଚଳ ବାଳିକା ସବଜୁନିୟର ହକିରେ ଓଡିଶା ୫୦-୦ ଗୋଲରେ ତ୍ରିପୁରାକୁ ପରାସ୍ତ କରିଛି ।

ଅସ୍ମିତା ପୂର୍ବାଞ୍ଚଳ ସବଜୁନିୟର ବାଳିକା ହକି ଲଗରେ ଜାତୀୟ ଚମ୍ପିଅନ ଓଡ଼ିଶା ବାଳିକା ଦଳ ରେକର୍ଡ କରିଛି । ଗୌହାଟୀର ଭେଟପାଡ଼ା ମହମ୍ମଦ ତୈବୁଲା ହକି ଷ୍ଟାଡିୟମରେ ଖେଳାଯାଇଥିବା ମ୍ୟାଚ୍‌ରେ ତ୍ରିପୁରାକୁ ୫୦-୦ ଗୋଲରେ ହରାଇଛି । ଜାତୀୟ ପ୍ରତିଯୋଗିତରେ ବିଶେଷ କରି ଅସ୍ମିତା ହକିରେ ଏହା ଏକ ଜାତୀୟ ରେକର୍ଡ । ହକି ଇଣ୍ଡିଆ ପକ୍ଷରୁ ଆୟୋଜିତ ଯେକୌଣସି ବୟସବର୍ଗର ଟୁର୍ଣ୍ଣାମେଣ୍ଟରେ ଗୋଟିଏ ମ୍ୟାଚରେ ୫୦ ଗୋଲ୍ କରିବା ଏକ ବିରଳ ରେକର୍ଡ ।

ମ୍ୟାଚରେ ପ୍ରଥମ ମିନିଟରୁ ଗୋଲ୍ ଆରମ୍ଭ କରିଥିବା ଓଡ଼ିଶା ଦଳ ୬୦ ମିନିଟରେ ଶେଷ ଗୋଲ ଦେଇଥିଲା । ମ୍ୟାଚ୍‌ର ପ୍ରତି ୫ ମିନିଟରେ ହାରାହାରି ୪ଟି ଗୋଲ୍ ଦେଇଥିଲେ । ପ୍ରତି ୧.୨ ମିନିଟରେ ଗୋଟିଏ ଲେଖାଏଁ ଗୋଲ କରିଥିଲେ । ଓଡ଼ିଶା ପକ୍ଷରୁ ପ୍ରିୟଙ୍କା ମିଞ୍ଜ, ବ୍ୟକ୍ତିଗତ ୮ଟି ଗୋଲ ଦେଇଥିଲାବେଳେ ପ୍ରିୟଙ୍କା ଅସୀମା ଏକ୍କା ୬ଟି, ରଶ୍ମି କୁଜୁର ୫ଟି ବ୍ୟକ୍ତିଗତ ଗୋଲ କରିଥିଲେ । ତ୍ରିପୁରା ବିପକ୍ଷ ମ୍ୟାଚରେ ଓଡିଶା ପ୍ରଥମ କ୍ୱାର୍ଟରରେ ୧୦ଟି, ଦ୍ୱିତୀୟ କ୍ୱାର୍ଟରରେ ୮ ଗୋଲ ସ୍କୋର କରିଥିଲା । ପ୍ରଥମାର୍ଦ୍ଧ ଶେଷ ବେଳକୁ ୧୮-୦ର ଅଗ୍ରଣୀ ହାସଲ କରିଥିବା ଓଡିଶା ବାକି ୨ଟି କ୍ୱାର୍ଟରରେ ୧୭ ଓ ୧୫ ଗୋଲ ସ୍କୋର କରିଥିଲା ।