ନୂଆଦିଲ୍ଲୀ: ଦିଲ୍ଲୀରେ ମଙ୍ଗଳବାର ହାଇଭୋଲଟେଜ୍ ଗେମ୍ । ସଂଘର୍ଷ କରି ଶେଷରେ ମ୍ୟାଚ୍ ହାରିଛି ଦିଲ୍ଲୀ କ୍ୟାପିଟାଲ୍ସ । ଫଳରେ ୧୪ ରନରେ ବିଜୟୀ ହୋଇଛି କୋଲକାତା ନାଇଟ୍ ରାଇଡର୍ସ । ଶେଷ ଓଭରରେ ଡିସିକୁ ମ୍ୟାଚ୍ ଜିତିବାକୁ ୨୫ ରନ୍ ଥିଲା । ହେଲେ ଦିଲ୍ଲୀ କ୍ୟାପିଟାଲ୍ ମାତ୍ର ୧୦ ରନ୍ ସଂଗ୍ରହ କରିପାରିଥିଲା । ୨୦୫ ରନ୍ ବିଜୟ ଲକ୍ଷ୍ୟକୁ ପିଛା କରି କ୍ୟାପିଟାଲ୍ସ ୧୯୦ ରନ୍ରେ ଅଟକିଯାଇଥିଲା । ସେପଟେ ଚଳିତ ଆଇପିଏଲରେ କେକେଆର୍ ଏହା ଚତୁର୍ଥ ବିଜୟ ହୋଇଥିବା ବେଳେ ପଏଣ୍ଟ ଟେବୁଲରେ ସପ୍ତମ ସ୍ଥାନରେ ରହିଛି ।
୨୦୫ ରନ୍ ଜବାବରେ ଦିଲ୍ଲୀର ଆରମ୍ଭ ଭଲ ନଥିଲା । ପ୍ରଥମ ଓଭରର ଦ୍ୱିତୀୟ ବଲ୍ରେ ଅଭିଷେକ୍ ପୋରେଲଙ୍କୁ ଅନୁକୂଳ ରୟ ଆଉଟ୍ କରିଥିଲେ । ଏହା ପରେ, କରୁଣ ନାୟାର ୫ମ ଓଭରରେ ଆଉଟ୍ ହୋଇଥିଲେ । କରୁଣଙ୍କ ମାତ୍ର ୧୫ ରନ୍ କରିଥିଲେ । ପରେ କେଏଲ ରାହୁଲଙ୍କଠାରୁ ଏକ ବଡ଼ ଇନିଂସ ଆଶା କରୁଥିଲା ଦିଲ୍ଲୀ କ୍ୟାପିଟାଲ୍ସ । କିନ୍ତୁ ୭ମ ଓଭରରେ ରାହୁଲ ୭ ରନ୍ କରି ରନ୍ଆଉଟ ହୋଇଥିଲେ । ମାତ୍ର ଅଧିନାୟକ ଅକ୍ଷର ପଟେଲ ଓ ଫାଫ୍ ଡୁ ପ୍ଲେସିଙ୍କ ଲଢ଼େଇ କରିଥିଲେ । ସୁନିଲ୍ ନାରିନ୍ ପ୍ରଥମେ ତାଙ୍କୁ ପାଭିଲିୟନ ପଠାଇଥିଲେ। ଅକ୍ଷର ୪୩ ରନର ଇନିଂସ ଖେଳି ଆଉଟ୍ ହୋଇଥିଲେ । ପରେ, ଫାଫ୍ ୧୬ତମ ଓଭରରେ ୬୨ ରନ୍ କରି ଆଉଟ୍ ସୁନିଲ୍ ନାରିନଙ୍କ ଶିକାର ହୋଇଥିଲା । ଦିଲ୍ଲୀକୁ ଲଗାତାର ଝଟକା ଲାଗିବାରୁ ଦଳକୁ କେହି ସମ୍ଭାଳି ପାରିନଥିଲେ । ଫଳରେ ଡିସି ୯ ୱିକେଟ୍ ହରାଇ ୧୯୦ ରନ୍ ସଂଗ୍ରହ କରିପାରିଥିଲା । ଯାହାଫଳରେ କେକେଆର୍ ଏହି ମ୍ୟାଚକୁ ୧୪ରନ ରେ ଜିତି ନେଇଛି ।
