ନୂଆଦିଲ୍ଲୀ: ଆତଙ୍କବାଦ ବିରୋଧରେ ସାରା ଦେଶ। ପୀଡ଼ିତ ପରିବାରକୁ ନ୍ୟାୟ ନିଶ୍ଚିତ ମିଳିବ। ଏକତା ହିଁ ଆମର ଶକ୍ତି। ୧୨୧ ତମ ମନ କି ବାତ୍‌ କାର୍ଯ୍ୟକ୍ରମରେ ଏହା କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ପ୍ରଧାନମନ୍ତ୍ରୀ ତାଙ୍କର ମନ କି ବାତ କାର୍ଯ୍ୟକ୍ରମରେ ପୁଣି ଥରେ ଆତଙ୍କବାଦ ପ୍ରସଙ୍ଗ ଉଠାଇଛନ୍ତି। ସେ ପହଲଗାମର ପୀଡିତ ପରିବାରକୁ ନ୍ୟାୟ ପ୍ରଦାନ କରିବାର ପ୍ରତିଶ୍ରୁତି ଦେଇଛନ୍ତି।

ମୋଦୀ କହିଛନ୍ତି, "ଆତଙ୍କବାଦୀ ଏବଂ ସେମାନଙ୍କ ମାଲିକମାନେ ଚାହାଁନ୍ତି ଯେ କାଶ୍ମୀର ପୁଣି ଥରେ ଧ୍ୱଂସ ହେଉ। ସେଥିପାଇଁ ସେମାନେ ଏତେ ବଡ଼ ଷଡ଼ଯନ୍ତ୍ର କରିଛନ୍ତି। ଆତଙ୍କବାଦ ବିରୋଧୀ ଏହି ଯୁଦ୍ଧରେ ୧୪୦ କୋଟି ଭାରତୀୟଙ୍କ ଏକତା ହେଉଛି ଆମର ସବୁଠାରୁ ବଡ଼ ଶକ୍ତି।" ସେ ଆହୁରି କହିଛନ୍ତି, "ପର୍ଯ୍ୟଟକଙ୍କ ସଂଖ୍ୟାରେ ରେକର୍ଡ ବୃଦ୍ଧି ଘଟିଛି, ଲୋକଙ୍କ ଆୟ ବୃଦ୍ଧି ପାଉଛି, ଯୁବପିଢ଼ିଙ୍କ ପାଇଁ ନୂତନ ସୁଯୋଗ ସୃଷ୍ଟି ହେଉଛି। ଦେଶର ଶତ୍ରୁ, ଜମ୍ମୁ-କାଶ୍ମୀରର ଶତ୍ରୁମାନେ ଏହାକୁ ପସନ୍ଦ କରିନଥିଲେ।"

ପ୍ରଧାନମନ୍ତ୍ରୀ ମୋଦୀ କହିଛନ୍ତି, "ସେ ଯେଉଁ ରାଜ୍ୟର ହୁଅନ୍ତୁ ନା କାହିଁକି, ସେ ଯେଉଁ ଭାଷା କହୁନ୍ତୁ ନା କାହିଁକି, ସେ ଏହି ଆକ୍ରମଣରେ ନିଜ ପ୍ରିୟଜନଙ୍କୁ ହରାଇଥିବା ଲୋକଙ୍କ ଯନ୍ତ୍ରଣା ଅନୁଭବ କରୁଛନ୍ତି। ଏପ୍ରିଲ 22 ତାରିଖରେ ପହଲଗାମରେ ଘଟିଥିବା ଆତଙ୍କବାଦୀ ଘଟଣା ଦେଶର ପ୍ରତ୍ୟେକ ନାଗରିକଙ୍କୁ ଦୁଃଖିତ କରିଛି। ପ୍ରତ୍ୟେକ ଭାରତୀୟଙ୍କ ପୀଡିତ ପରିବାର ପ୍ରତି ଗଭୀର ସମବେଦନା ଅଛି।"