ବ୍ରହ୍ମପୁର: ଦୀପିକାଙ୍କୁ ନେଇ ପୁଣି ଚର୍ଚ୍ଚା। ସୋମବାର ବ୍ରହ୍ମପୁର ଏସପିଙ୍କ ନିକଟରେ ନୂଆ ଅଭିଯୋଗ କରିଛନ୍ତି ଦୀପିକା। ସେ ଅଭିଯୋଗ କରିଛନ୍ତି ଦିନେଶ ଅନ୍ୟ ଜଣେ ମହିଳାଙ୍କୁ ବିବାହ କରିଛନ୍ତି। ବର୍ତ୍ତମାନ ଦୀପିକା- ଦିନେଶ ମାମଲା କୋର୍ଟରେ ବିଚାରାଧୀନ ଥିବାବେଳେ ଦିନେଶ କେମିତି ବିବାହ କଲେ ? ଏହା ଏହି ପ୍ରଶ୍ନ ଉଠାଇବା ସହ ଦିନେଶ ବର୍ତ୍ତମାନ ଯେଉଁ ମହିଳାଙ୍କୁ ବିବାହ କରିଛନ୍ତି ତାଙ୍କୁ ଏବଂ ତାଙ୍କ ପରିବାରକୁ ଗିରଫ କରିବା ପାଇଁ ଏସପିଙ୍କ ନିକଟରେ ଅଭିଯୋଗ ମଧ୍ୟ କରିଛନ୍ତି ଦୀପିକା।
ସୂଚନାଥାଉକି, କେ.ଦୀପିକା ପୂର୍ବରୁ ଦିନେଶଙ୍କ ନାଁରେ ପ୍ରେମ ଓ ପ୍ରତାରଣ ଅଭିଯୋଗ ଆଣିଥିଲେ। ଏମିତିକି ଦୀପିକା ସ୍ତ୍ରୀର ମାନ୍ୟତା ଓ ଛୁଆକୁ ବାପାର ପରିଚୟ ଦେବାକୁ ଦିନେଶଙ୍କ ଘର ଆଗରେ ଧାରଣାରେ ବସିଥିଲେ। ଏହି ମାମଲାକୁ ନେଇ ସେତେବେଳେ ଖୁବ୍ ଚର୍ଚ୍ଚା ହୋଇଥିବାବେଳେ, ଘଟଣାରେ ଗିରଫ ହୋଇ ଜେଲଯାଇଥିଲେ ଦିନେଶ। ଅବଶ୍ୟ ସେ ଏବେ ଜାମିନରେ ଆସିଛନ୍ତି।
ସେପଟେ କୋର୍ଟରେ ଦୁଷ୍କର୍ମ ମାମଲାକୁ ଉଠାଇଦିଆଯାଇଥିବାବେଳେ ପୁଲିସ ପୁଣି ଥରେ ମାମଲାରେ ଦୁଷ୍କର୍ମକୁ ଯୋଡ଼ିବା ପାଇଁ କୋର୍ଟକୁ ନିବେଦନ କରିବ ଏବଂ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବ୍ରହ୍ମପୁର ଏସପି କହିଛନ୍ତି।
