ରୁଷ୍‌ର ବିରଳ ଏକ୍ସପେରିମେଣ୍ଟ, ମସ୍କୋ ଆକାଶରେ ଉଡ଼ିଲେ ରିମୋଟ୍ କଂଟ୍ରୋଲଡ୍ ଜୀବନ୍ତ ପାରା

ମସ୍କୋ: ଏଲନ ମସ୍କଙ୍କ କମ୍ପାନି ନ୍ୟୁରାଲିଙ୍କ ପାରାଲିସିସ୍ ରୋଗୀଙ୍କ ମସ୍ତିଷ୍କରେ ଚିପ୍ ଲଗାଇ ନୂଆ ରେକର୍ଡ କରିଥିଲା । ଏଭଳି ରୋଗୀଙ୍କ ଭାବନାକୁ କମ୍ପ୍ୟୁଟରରେ ପ୍ରକାଶ କରିପାରୁଛି ନ୍ୟୁରାଲିଙ୍କ । କିନ୍ତୁ ଏବେ ରୁଷିଆ ଏଭଳି ଏକ ସିଷ୍ଟମ ବିକଶିତ କରିଛି । ଆଉ ଏହାକୁ ନିଜ ଦେଶର ସର୍ଭିଲାନ୍ସ ବୃଦ୍ଧି କରିବାକୁ ପ୍ରୟାସ କରୁଛି । ରୁଷର ବୈଜ୍ଞାନିକମାନେ ଜୀବନ୍ତ ପାରାକୁ ରିମୋଟରେ ନିୟନ୍ତ୍ରଣ କରୁଛନ୍ତି । ଆଉ ଏହି ପାରା କମାଣ୍ଡ ଅନୁସାରେ କାର୍ଯ୍ୟ କରିପାରୁଛି । ଏହି ପାରାଙ୍କ ଏକ ଗ୍ରୁପକୁ ‘ବାର୍ଡ-ବାୟୋଡ୍ରୋନ୍ସ’ ବା ଜେଏନ-ଓ୍ବାନ ବୋଲି କୁହାଯାଉଛି । ଏଣିକି ରୁଷର ବୈଜ୍ଞାନିକମାନେ ଯେମିତି ଏବଂ ଯେଉଁଆଡେ ଚାହିଁବେ, ଠିକ୍ ସେହିଭଳି ଗତି ଓ ଦିଗ ପରିବର୍ତ୍ତନ କରିବେ ପାରା । ପୁଟିନଙ୍କ ଇସାରାରେ ତିଆରି ହୋଇଥିବା ଏହି ପାରାଙ୍କ ଆର୍ମି ସମଗ୍ର ରୁଷରେ ନଜର ରଖିବାକୁ ବେଶ ଉପଯୋଗୀ ହେବ ବୋଲି କୁହାଯାଉଛି ।

ଏବେ ପାରାଗୁଡ଼ିକର ପରୀକ୍ଷଣ କରାଯାଇଛି । ପାରା ଦେହରେ ଗୋଟିଏ ଛୋଟ ସୌରଶକ୍ତି ଚାଳିତ ବ୍ୟାକପ୍ୟାକ୍ ରହିଛି, ଯାହା ବିଦ୍ୟୁତ ଶକ୍ତି ଉତ୍ପନ କରିପାରୁଛି । ଏହା ସହ ଏଥିରେ ଜିପିଏସ୍ ଟ୍ରାକିଂ ଏବଂ ଗୋଟିଏ ରିସିଭର ରହିଛି । ଏହା ସାହାଯ୍ୟରେ ଅପରେଟ ପାରାର ମସ୍ତିଷ୍କକୁ ସିଗନାଲ୍ ପଠାଇ ଲକ୍ଷ୍ୟସ୍ଥଳ ସ୍ଥିର କରିପାରିବେ । ଫଳରେ ପାରାର ମସ୍ତିଷ୍କକୁ ଲାଗିବ ଯେ, ଏହା ଉଡ଼ିବାକୁ ଚାହୁଁଛି । ସେପଟେ ପାରା ଦେହରେ ଲାଗିଥିବା ଷ୍ଟିମୁଲେଟର ପାରାକୁ ଡାହାଣ କିମ୍ବା ବାମ ପାର୍ଶକୁ ମୋଡ଼ିବାକୁ ପ୍ରେରିତ କରିବ । ଜିପିଏସ୍ କିମ୍ବା ଅନ୍ୟ ପ୍ରଣାଳୀ ସାହାଯ୍ୟରେ ଏହାକୁ ନିୟନ୍ତ୍ରଣ କରାଯାଇ ପାରିବ ବୋଲି ରୁଷର ଟେକ୍ ଫାର୍ମ ନେରି କହିଛି ।

ଗୁଇନ୍ଦା ପାରା ପ୍ରତି ଦିନ ୩୧୦ ମାଇଲ ଏବଂ ସପ୍ତାହରେ ୧୮୫୦ ମାଇଲ୍ ଗତି କରିପାରିବ । କମ୍ପାନି ଦାବି କରିଛି ଯେ, ଆଗକୁ ବଡ଼ ପକ୍ଷୀଙ୍କୁ ଗୁଇନ୍ଦାଗିରି ଲାଗି ପ୍ରସ୍ତୁତ କରାଯିବ । ପ୍ରଯୁକ୍ତିବିଦ୍ୟା ଦ୍ବାରା ପାରାଗୁଡ଼ିକୁ ପରିଚାଳିତ କରାଯାଇ ପାରୁଛି । ଏଥିପାଇଁ କୌଣସି ପ୍ରଶିକ୍ଷଣର ଆବଶ୍ୟକତା ନାହିଁ ବୋଲି କହିଛି, ଏହି ସିଷ୍ଟମ ବିକଶିତ କରିଥିବା ରୁଷର ନ୍ୟୁରୋ ଟେକନୋଲୋଜି ଫାର୍ମ ନେରି ।

କମ୍ପାନିର ପ୍ରତିଷ୍ଠାତା ଆଲେକଜାଣ୍ଡର ପାନୋଭ କହିଛନ୍ତି ଯେ, ବର୍ତ୍ତମାନ ସମୟରେ ପାରାଙ୍କୁ ବ୍ୟବହାର କରାଯାଉଛି । ଆଗକୁ ଯେକୌଣସି ପକ୍ଷୀକୁ ସର୍ଭିଲାନ୍ସ ପାଇଁ ବ୍ୟବହାର କରାଯାଇ ପାରିବ । ଉପକୂଳବର୍ତ୍ତୀ ଅଞ୍ଚଳରେ ନଜର ରଖିବାକୁ ବଡ଼ ପକ୍ଷୀ ରାଭେନକୁ ପ୍ରସ୍ତୁତ କରାଯାଇପାରିବ । ସେହିଭଳି ଏହି କାମରେ ଆଲବାଟ୍ରସ୍ ମଧ୍ୟ ନିୟୋଜିତ ହୋଇପାରିବ ।

ନେରି ରୁଷ ସରକାରଙ୍କ ସହ ମିଳିତ ଭାବରେ କାର୍ଯ୍ୟ କରୁଛି । ଏହା ନ୍ୟାସପାଲ୍ ଟେକନୋଲୋଜି ଇନିସିଏଟିଭ୍ର ମାଲିକାନାରେ ରହିଛି । ଯାହା ଆରଡିଆଇଏଫ ସହ ଜଡ଼ିତ । ସବୁଠାରୁ ବଡ଼ କଥା ହେଲା, ଆରଡିଆଇଏଫ ପୁଟିନଙ୍କ ଘନିଷ୍ଠ କିରିଲ ଦିମିତ୍ରେଭ ଚଳାଉଛନ୍ତି । ସେ ୟୁକ୍ରେନ୍ ଯୁଦ୍ଧକୁ ନେଇ ଆମେରିକା ସହ ଆଲୋଚନାରେ ମୁଖ୍ୟ ଭୂମିକା ନେଉଛନ୍ତି ।

ପାରା ମୁଣ୍ଡରେ ସୁକ୍ଷ୍ମ ସର୍ଜରୀ ମାଧ୍ୟମରେ ଚିପ ଲଗାଯାଇଛି । କମ୍ପାନି ଦାବି କରିଛି, ଏହି ସର୍ଜରୀ ସମୟରେ ପାରା ମୃତ୍ୟୁ ସଂଖ୍ୟା ଖୁବ ନଗଣ୍ୟ । ସେପଟେ ଏହି ପ୍ରୟୋଗ କ୍ଷତିକାରକ ନୁହେଁ । ତେଣୁ ଏହାକୁ ସହରରେ ବ୍ୟବହାର କରାଯାଇ ପାରିବ । ମସ୍କୋର ଭଳି ରୁଷୀୟ ସହରରେ ପାରା ସଂଖ୍ୟା ଖୁବ ଅଧିକ । ଏଭଳି ସ୍ଥିତିରେ ପିଜିଏନ-ଓ୍ବାନକୁ ଚିହ୍ନଟ କରିବା କଷ୍ଟକର । ଏହାକୁ ଅନ୍ୟ କେହି ଟ୍ରାକ୍ କରିପାରିବେ ନାହିଁ ବୋଲି କମ୍ପାନି କହିଛି । ମସ୍କୋ ଅନେକ ଜୀବଙ୍କୁ ନେଇ ଏକ୍ସପେରିମେଣ୍ଟ କରି ସମାଲୋଚିତ ହୋଇଛି । ପୂର୍ବରୁ ଏହି କମ୍ପାନି ଗାଈର ମସ୍ତିସ୍କରେ ସର୍ଜରୀ କରି କ୍ଷୀର ଉତ୍ପାଦନ ବୃଦ୍ଧି କରିବାକୁ ଚେଷ୍ଟା କରିଥିଲା । ପ୍ରଯୁକ୍ତିବିଦ୍ୟା କ୍ଷେତ୍ରରେ ରୁଷ ବହୁ ଆଗରେ ଥିବା ବେଳେ, ଅନେକ ବିରଳ ଉଦ୍ଭାବନ କରି ବିଶ୍ବର ଦୃଷ୍ଟି ଆକର୍ଷଣ କରିଛି ।