ଭୁବନେଶ୍ଵର ୨୯।୧୧ : ସୋଆ ସାହିତ୍ୟ ସମ୍ମାନ ୨୦୨୫। ସୋଆ ସାହିତ୍ୟ ମହାକୁମ୍ଭରେ ଜାଭେଦ ଅଖତରଙ୍କ ବଡ଼ ବୟାନ। 'ଏହି ଧରାପୃଷ୍ଠରୁ ସାହିତ୍ୟ, ସଂସ୍କୃତିର ସୃଷ୍ଟି। ସେଥିପାଇଁ ସମସ୍ତେ ମାତୃଭାଷା ଶିଖିବା ଜରୁରୀ। ସବୁ ଜିନିଷ ଯାନ୍ତ୍ରିକ ହେବା ଜରୁରୀ ନୁହଁ। ଏଆଇ ଭିତରେ ଭାବପ୍ରବଣତା କି ସୃଜନଶୀଳତା ନାହିଁ। ଏଆଇ ଡାଟାର ପରିସୀମା ଭିତରେ ବନ୍ଧା। ନିଜ ଭିତରେ ସୃଜନଶୀଳତା ସୃଷ୍ଟି କରିବା ପାଇଁ ପାଗଳାମୀ ଆବଶ୍ୟକ।

ଜାଭେଦ ଅଖତର ଆହୁରି ମଧ୍ୟ କହିଛନ୍ତି ଯେ, ଭାବନାତ୍ମକ ଅଭିବୃଦ୍ଧି ସିଡି ଭଳି ହେବା ଉଚିତ୍। ଆମ ଶିକ୍ଷା ବ୍ୟବସ୍ଥାରେ ସଂସ୍କାର ଆସିବା ଜରୁରୀ। ଏହା ଆମ ପିଲାଙ୍କ ସୃଜନାଶୀଳତାକୁ ମାରି ଦେଉଛି। ଆମ ଭାଷା, ସାହିତ୍ୟ, ସଂସ୍କୃତି ସହ ପିଲାମାନେ ଯୋଡ଼ି ହୁଅନ୍ତୁ। 'ସ୍ଵାଧୀନତା ପରଠାରୁ ଭାରତ ବହୁତ ବିକାଶ କରିଛି। ଭୌତିକ ଲାଭ ପଛରେ ଦୌଡ଼ି ଆମେ ମୂଳକୁ ଭୁଲି ଗଲୁଣି। ଆମର ଭାଷା, ସାହିତ୍ୟ, ସଂସ୍କୃତି ପଛରେ ରହିଯାଇଛି। ଏସବୁ ବିଷୟରେ ଯୁବଗୋଷ୍ଠୀ ଅବଗତ ହେବା ଜରୁରୀ। ସାହିତ୍ୟ ମହାକୁମ୍ଭ ସଭ୍ୟତା ସହ ଯୋଡ଼ି ହେବାର ସୁଯୋଗ। ଗଛ ଯେତେ ବଡ଼ ହେଉନା କାହିଁକି ମୂଳ ସୁଦୃଢ ରହିବା ଦରକାର।'

ବର୍ତ୍ତମାନ ସମୟରେ ଇଂରାଜୀ ଶିଖିବା ଜରୁରୀ। ଯେଉଁ ଅଭିଭାବକମାନେ ନିଜ ପିଲାମାନଙ୍କୁ ଇଂରାଜୀ ଶିଖାଇ ପାରୁନାହାନ୍ତି ସେମାନେ ବଡ଼ ଭୁଲ୍ କରୁଛନ୍ତି। ସେହିପରି ଯେଉଁମାନେ ମାତୃଭାଷା ଶିଖାଇ ପାରୁନାହାନ୍ତି ସେମାନେ ବି ବଡ଼ ଭୁଲ୍ କରୁଛନ୍ତି। କାରଣ ମାତୃଭାଷା ଠାରୁ ବଡ଼ କିଛି ନାହିଁ। ଇଂରାଜୀ ଶିଖିବା ଉଚିତ୍ କିନ୍ତୁ ମାତୃଭାଷା ବି ସେତିକି ଜରୁରୀ। ପିଲାମାନେ ବହୁଭାଷୀ ହେବା ଜରୁରୀ। ପିଲାମାନେ ଖୁବ୍ ଶୀଘ୍ର ଶିଖିବାର କ୍ଷମତା ବି ରଖନ୍ତି। ବୟସ୍କମାନେ ହିଁ ଥକି ଯାଆନ୍ତି। ବାଇ-ଲାଙ୍ଗୁଆଲ୍ ହେବା ପିଲାମାନଙ୍କ ପାଇଁ ମାମୁଲି କଥା।

ସୂଚନାଯୋଗ୍ୟ ଯେ, ତୃତୀୟ ସୋଆ ସାହିତ୍ୟ ଉତ୍ସବ-୨୦୨୫ ଶୁଭାରମ୍ଭ ହୋଇଛି । ଦୁଇଦିନିଆ ଲିଟେରାରୀ ଫେଷ୍ଟିଭାଲକୁ ରାଜ୍ୟପାଳ ହରିବାବୁ କମ୍ଭମପାଟି ଉଦ୍‌ଘାଟନ କରିଛନ୍ତି । ଏହି ଅବସରରେ ଶବ୍ଦର ଯାଦୁଗର ଜାଭେଦ୍‌ ଅଖ୍‌ତରଙ୍କୁ ସୋଆ ସାହିତ୍ୟ ସମ୍ମାନରେ ସମ୍ମାନିତ କରାଯାଇଛି। ଏହି କାର୍ଯ୍ୟକ୍ରମରେ ଦେଶର କୋଣ ଅନୁକୋଣରୁ ପ୍ରାୟ ୧୦୦ରୁ ଅଧିକ ବିଶିଷ୍ଟ ଲେଖକ, କବି, ଚିତ୍ରକର, ଔପନ୍ୟାସିକ, ଅନୁବାଦକ, ପ୍ରକାଶକ, ଚିନ୍ତକ, ନାଟକ ଏବଂ ଗଣମାଧ୍ୟମ ଜଗତର ବିଶିଷ୍ଟ ବ୍ୟକ୍ତି ଯୋଗ ଦେଇଛନ୍ତି। ଦୁଇଦିନ ଧରି ଭାଷା, ସାହିତ୍ୟ, ସଂସ୍କୃତି, ସମାଜ, ସିନେମା ଓ ଶିକ୍ଷା ସହ ବିଭିନ୍ନ ବିଷୟରେ ଚର୍ଚ୍ଚା, ଆଲୋଚନା ଓ ମାନସମନ୍ଥନ ଚାଲିବ। ଫୋକସ୍‌ରେ କୃତ୍ରିମ ବୁଦ୍ଧିମତା (ଏଆଇ) ରହିବ।