ନୂଆଦିଲ୍ଲୀ: ଭାରତ-ପାକିସ୍ତାନ ଉତ୍ତେଜନା ଭିତରେ କେନ୍ଦ୍ର ସରକାର ବଡ଼ ନିଷ୍ପତ୍ତି ନେଇଛନ୍ତି । ଭାରତୀୟ କ୍ଷେତ୍ରରେ କୌଣସି ପ୍ରକାର ଆତଙ୍କୀ କାର୍ଯ୍ୟକଳାପକୁ ଯୁଦ୍ଧ ବୋଲି ମାନି କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ସୂଚନା ଅନୁଯାୟୀ, ଗତ ଦୁଇ ଦିନ ହେଲାଣି ରାତିରେ ପାକିସ୍ତାନ ଲଗାତାର ଡ୍ରୋନ୍ ଦ୍ବାରା ହମଲା କରିବାକୁ ପ୍ରୟାସ କରୁଛି । ବିଶେଷ କରି ଭାରତୀୟ ସୀମାକୁ ଲାଗି କରିଥିବା ଗାଁ ଗୁଡ଼ିକୁ ଟାର୍ଗେଟ୍ କରୁଛି ପଡ଼ୋଶୀ ଦେଶ । ଯାହାକୁ ଭାରତର ଏୟାର ଡିଫେନ୍ସ ସିଷ୍ଟମ ନଷ୍ଟ କରିବାରେ ସଫଳ ହୋଇଛି । ଏହାଛଡ଼ା ଜମ୍ମୁ-କାଶ୍ମୀରକୁ ଲାଗିଥିବା ଏଲଓସିରେ ଭରି ମାତ୍ରାରେ ଗୁଳିଗୋଳା ମାଡ଼ କରୁଛି । ଏହାକୁ ମୁହାତୋଡ଼ ଜବାବ ଦେଉଛି ସେନା । ତେବେ ପାକିସ୍ତାନର ଏହି ନାପାକ୍ ହରକତକୁ ନେଇ ଏବେ କେନ୍ଦ୍ର ସରକାର ବଡ଼ ନିଷ୍ପତ୍ତି ନେଇଛନ୍ତି । ସରକାରୀ ସୂତ୍ରକୁ ମିଳିଥିଲା ଖବର ଅନୁଯାୟୀ, ଯଦି ଭାରତ ବିରୋଧରେ କୌଣସି ପ୍ରକାର ଆତଙ୍କାବଦୀ ହମଲା ହୁଏ, ତେବେ ଏହାକୁ ଯୁଦ୍ଧ ବୋଲି ମାନି ନିଆଯିବ ଏବଂ ସେହିଭଳି ଭାବେ କଡ଼ା ଜବାବ ଦିଆଯିବ ।
କେନ୍ଦ୍ର ସରକାର ଏହି ନିଷ୍ପତ୍ତି ନେଇ ସ୍ପଷ୍ଟ କରିଛନ୍ତି ଯେ, ଭାରତରେ ପାକିସ୍ତାନ ଦ୍ବାରା ହେଇଥିବା ଆତଙ୍କବାଦୀ ଆକ୍ରମଣକୁ ଆଉ ବରଦାସ୍ତ କରାଯିବ ନାହିଁ । ଯଦି ପଡ଼ୋଶୀ ଦେଶ ଏଥିରୁ ନିବୃତ୍ତ ରହୁନାହିଁ, ତେବେ ଏହାକୁ ଯୁଦ୍ଧ ବୋଲି ଭାବି, ସେହିଭଳି ଢଙ୍ଗରେଜବାବ ଦିଆଯିବ । ଏପ୍ରିଲ ୨୨ ତାରିଖରେ କାଶ୍ମୀର ପହଲଗାମରେ ଆତଙ୍କବାଦୀ ଆକ୍ରମଣ ହୋଇଥିଲା । ନିର୍ଦ୍ଦୋଶ ପର୍ଯ୍ୟଟକଙ୍କୁ ଧର୍ମ ପଚାରି ହମଲା କରିଥିଲେ ଆତଙ୍କୀ । ଏଥିରେ ୨୬ଜଣଙ୍କ ମୃତ୍ୟୁ ହୋଇଥିବା ବେଳେ ୧୭ଜଣ ଗୁରୁତର ଭାବେ ଆହତ ହୋଇଥିଲେ । ଯାହା ପରେ ଦେଶ ଭିତରେ ଆକ୍ରୋଶ ବଢ଼ୁଥିଲା । ଆତଙ୍କୀ ବିରୋଧରେ ଆକ୍ସନ ନେବାକୁ ସରକାରଙ୍କ ଉପରେ ଚାପ ପଡ଼ୁଥିଲା ।
ତେବେ ମେ’ ୭ ତାରିଖରେ ଭାରତୀୟ ସେନା ‘ଅପରେସନ ସିନ୍ଦୂର’ ଲଞ୍ଚ କରି କାଉଣ୍ଟର ଆଟାକ୍ କରିଥିଲା । ପାକିସ୍ତାନ ଓ ପିଓକେରେ ଥିବା ଆତଙ୍କବାଦୀ ଆଡ୍ଡା ଉପରେ ଏୟାରଷ୍ଟ୍ରାଇକ୍ କରାଯାଇଥିଲା । ଏଥିରେ ଶହେରୁ ଅଧିକ ଆତଙ୍କବାଦୀ ନିପାତ ହୋଇଥିଲେ । ଏମାନଙ୍କ ମଧ୍ୟରେ ଜୈଶ-ଇ-ମହମ୍ମଦର ମୁଖ୍ୟ ମସୁଦ ଅଝହର ପରିବାରର ୧୦ଜଣ ସଦସ୍ୟ ପ୍ରାଣ ହରାଇଛନ୍ତି । ଭାରତର ଏହି ଆକ୍ସନରେ ବିଳିବିଳି ହୋଇଛି ପାକିସ୍ତାନ ଏବଂ ଜମ୍ମୁରୁ ଜୈସଲମେର ପର୍ଯ୍ୟନ୍ତ ସୀମାବର୍ତ୍ତୀ ସହରକୁ ଟାର୍ଗେଟ୍ କରି ୪ଶହରୁ ଅଧିକ ଡ୍ରୋନ୍ ହମଲା କରିଥିଲା । ମାତ୍ର ଭାରତ ବାୟୁ ପ୍ରତିରକ୍ଷା ପ୍ରଣାଳୀ ସେଗୁଡ଼ିକୁ ଆକାଶ ମାର୍ଗରେ ନଷ୍ଟ କରିଛି । ସେହିପରି ଶୁକ୍ରବାର ରାତିରେ ପାକିସ୍ତାନ ସରକାର ପାକିସ୍ତାନ ନାଗରିକଙ୍କୁ ଢାଲ କରି ଯୁଦ୍ଧ ଘନଘୋଟା ଭିତରେ ବେସାମରିକ ବିମାନ ଚଳାଇ ଭାରତ ୩୨ଟି ସହରକୁ ଟାର୍ଗେଟ୍ କରିଥିଲା । ମାତ୍ର ଏୟାର ଡିଫେନ୍ସ ସିଷ୍ଟମ ସୁଦର୍ଶନ ଚକ୍ର ଏହାକୁ ପ୍ରତିହତ କରିବାରେ ସଫଳ ହୋଇଛି । ଅନ୍ୟପଟେ ଏହାର ପାଲଟା ଆକ୍ରମଣ କରିଛି ଭାରତୀୟ ସେନା । ଶନିବାର ଭୋରୁ ପିନ୍ ପଏଣ୍ଟ ଟାର୍ଗେଟ୍ କରି ମିସାଇଲ୍ ଦ୍ବାରା ପାକିସ୍ତାନର ୫ଟି ଏୟାର ବେସ୍ ଉଡ଼ାଇ ଦେଇଛି ।
