ଭାରତ-ଆମେରିକାର ଅସ୍ଥିରତା ପୂର୍ଣ୍ଣ ସଂପର୍କ ମଧ୍ୟରେ ଜୟଶଙ୍କରଙ୍କୁ ଭେଟିଲେ ଆମେରିକାର ରାଷ୍ଟ୍ରଦୂତ

ନୂଆଦିଲ୍ଲୀ : ଭାରତ-ଆମେରିକା ମଧ୍ୟରେ ଅସ୍ଥିରତାପୂର୍ଣ୍ଣ ସଂପର୍କ ମଧ୍ୟରେ ଆମେରିକାର ନିଯୁକ୍ତ ରାଷ୍ଟ୍ରଦୂତ ସର୍ଗିଓ ଗୋର , ବୈଦେଶିକ ମନ୍ତ୍ରୀ ଏସ୍‌ ଜୟଶଙ୍କରଙ୍କୁ ଶନିବାର ନୂଆଦିଲ୍ଲୀ ସ୍ଥିତ ବୈଦେଶିକ ମନ୍ତ୍ରଣାଳୟରେ ଭେଟି ଥିଲେ। ଏହି ସମୟରେ ଉଭୟ ଭାରତ-ଆମେରିକା ସଂପର୍କ ଓ ଏହାର ବର୍ଦ୍ଧିତ ବିଶ୍ୱ ସ୍ତରୀୟ ଗୁରୁତ୍ୱ ଉପରେ ଆଲୋଚନା ହୋଇ ଥିଲେ। ଏକ୍ସରେ ଏକ ପୋଷ୍ଟରେ ଜୟଶଙ୍କର କହିଛନ୍ତି, ଆଜି ନୂଆଦିଲ୍ଲୀରେ ଆମେରିକାର ନିଯୁକ୍ତ ରାଷ୍ଟ୍ରଦୂତ ସର୍ଗିଓ ଗୋରଙ୍କୁ ଭେଟି ଖୁସି ହେଲି। ଭାରତ-ଆମେରିକା ସମ୍ୱନ୍ଧରେ ଓ ଏହାର ବିଶ୍ୱ ସ୍ତରର ମହତ୍ତ୍ୱ ଉପରେ ଆଲୋଚନା ହୋଇଛି। ତାଙ୍କୁ ତାଙ୍କର ନୂଆ ଦାୟିତ୍ୱ ପାଇଁ ଶୁଭେଚ୍ଛା ।

ବିଦେଶ ସଚିବ ବିକ୍ରମ ମିସ୍ରୀ ମଧ୍ୟ ଆଜି ଭାରତରେ ଆମେରିକାର ମନୋନୀତ ରାଷ୍ଟ୍ରଦୂତ ସର୍ଗିଓ ଗୋରଙ୍କୁ ସାକ୍ଷାତ କରିଛନ୍ତି। ଏକ୍ସରେ ଏକ ପୋଷ୍ଟରେ , ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜାୟସୱାଲ କହିଛନ୍ତି , ବିଦେଶ ସଚିବ ବିକ୍ରମ ମିସ୍ରୀ ଆଜି ସକାଳେ ଭାରତରେ ଆମେରିକାର ମନୋନୀତ ରାଷ୍ଟ୍ରଦୂତ ସର୍ଗିଓ ଗୋରଙ୍କୁ ସାକ୍ଷାତ୍‌ କରିଥିଲେ। ତାଙ୍କ ମଧ୍ୟରେ ଭାରତ-ଆମେରିକା ବ୍ୟାପକ ବିଶ୍ୱସ୍ତରୀୟ ରଣନୀତିକ ପାର୍ଟନରସିପ୍‌ ଓ ଏହାର ମିଳିତ ପ୍ରାଥମିକତା ଉପରେ ଉପଯୋଗୀ ଆଲୋଚନା ହୋଇଛି। ବିଦେଶ ସଚିବ ନିଯୁକ୍ତ ରାଷ୍ଟ୍ରଦୂତ ଗୋରଙ୍କୁ ତାଙ୍କର କାର୍ଯ୍ୟଭାର ପାଇଁ ଶୁଭେଚ୍ଛା।

ଏହା ପୂର୍ବରୁ , ଜୟଶଙ୍କର ୨୪ ସେପ୍ଟେମ୍ୱରରେ ନ୍ୟୁୟର୍କରେ ଅନୁଷ୍ଠିତ ଜାତିସଂଘ ସାଧାରଣ ପରିଷଦ (ୟୁଏନଜିଏ) ର ସାଇଡଲାଇନ୍‌ରେ ଗୋରଙ୍କୁ ଭେଟି ଥିଲେ , ସେଠାରେ ଦୁଇ ନେତା ଭାରତ-ଆମେରିକାର ରଣନୀତିକ ସହଭାଗିତାକୁ ଆହୁରି ନିବିଡ଼ କରିବା ଉପରେ ଆଲୋଚନା କରିଥିଲେ। ସାକ୍ଷାତ୍‌ ପରେ , ଆମେରିକୀୟ ବିଦେଶ ବିଭାଗ ଏକ୍ସରେ ସେୟାର କରିଥିଲେ, ଦକ୍ଷିଣ ଓ ମଧ୍ୟ ଏସିଆ ପାଇଁ ଆମେରିକାର ସ୍ୱତନ୍ତ୍ର ଦୂତ ଓ ଭାରତରେ ରାଷ୍ଟ୍ରଦୂତ ନାମିତ ସର୍ଗିଓ ଗୋର ଜାତିସଂଘ ସାଧାରଣ ସଭା ବେଳେ ଭାରତର ବିଦେଶ ମନ୍ତ୍ରୀ ଜୟଶଙ୍କର ଭେଟିଥିଲେ । ସେମାନେ ଆମେରିକା-ଭାରତ ସଂପର୍କର ସଫଳତାକୁ ଆହୁରି ବୃଦ୍ଧି କରିବା ପାଇଁ ତତ୍ପର ଅଛନ୍ତି।

ଏହା ପୂର୍ବରୁ ,ସିନେଟ୍‌ରେ ନିଜର ପୃଷ୍ଟିକରଣ ଶୁଣାଣି ବେଳେ , ଗୋର ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ୟରେ ନିବିଡ଼ ବନ୍ଧୁତା ଉପରେ ଆଲୋକପାତ କରିଥିଲେ ଏବଂ ଏହାକୁ ଦ୍ୱିପାକ୍ଷୀୟ ସଂପର୍କକୁ ଆଗରୁ ବଢାଇବାରେ ଏକ ନିଆରା ଶକ୍ତି କହିଥିଲେ। କହି ରଖୁଛୁ କି , ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱିତୀୟ କାର୍ଯ୍ୟକାଳ ବେଳେ ଭାରତ ଓ ଆମେରିକା ମଧ୍ୟରେ ସଂପର୍କରେ କିଛି ମାତ୍ରାରେ ହ୍ରାସ ଘଟିଛି। ରୁଷ୍‌ ଠାରୁ ଭାରତ ତୈଳ ଆମଦାନୀ କରିବା ଯୋଗୁଁ ଟ୍ରମ୍ପ ପୂରା ବିରକ୍ତ ହୋଇଥିବା ବେଳେ ଭାରତ ସ୍ପଷ୍ଟ କରି ଦେଇଛି ଯେ,ସେ ଦେଶର ହିତ ପାଇଁ ଏମିତି ପଦକ୍ଷେପରୁ ଓହରିବ ନାହିଁ।