ଶସ୍ତା ହେବ ଇମ୍ପୋର୍ଟେଡ୍‌ ବାଇକ୍‌, ଆମଦାନୀ ଶୁଳ୍କ ହଟାଇବା ନେଇ ବଜେଟରେ ଘୋଷଣା

Published By : Prameya-News7 Bureau | February 02, 2025 IST

ନୂଆଦିଲ୍ଲୀ: ଶନିବାର ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୨୫-୨୬ ଆର୍ଥିକ ବର୍ଷ ପାଇଁ ବଜେଟ ଉପସ୍ଥାପନ କରିଛନ୍ତି। ବଜେଟରେ ସବୁ ବର୍ଗଙ୍କ ହିତକୁ ଧ୍ୟାନ ଦିଆଯାଇଥିବାବେଳେ, ୧୨ ଲକ୍ଷ ପର୍ଯ୍ୟନ୍ତ ଆୟ ଉପରେ ଟ୍ୟାକ୍ସ ଛାଡ଼ ଚାକିରିଆଙ୍କୁ ବଡ଼ ଆଶ୍ବସ୍ତି ଦେଇଛି। ଖାଲି ସେତିକି ନୁହେଁ ଜୀବନରକ୍ଷାକାରୀ ଔଷଧ ସମେତ ଅନେକ ସାମଗ୍ରୀ ଉପରୁ ମଧ୍ୟ ଶୁଳ୍କ ହ୍ରାସ କରିବାକୁ ନିଷ୍ପତ୍ତି ନେଇଛନ୍ତି ସରକାର। ଯେଉଁଥିରୁ ଗୋଟିଏ ହେଉଛି ଇମ୍ପୋର୍ଟେଡ ବାଇକ୍‌ ଉପରୁ ଆମଦାନୀ ଶୁଳ୍କ ହ୍ରାସ। ଯାହା ବାଇକ୍‌ ପ୍ରେମୀଙ୍କ ବେଶ୍‌ ଖୁସି କରାଇବ। 

ବଜେଟରେ ହୋଇଥିବା ଘୋଷଣା ଅନୁଯାୟୀ, ଆମଦାନୀ ହେଉଥିବା ଆମେରିକୀୟ ବାଇକ୍‌ ହାର୍ଲ-ଡେଭିଡସନ୍ ଭଳି ବାଇକ୍‌ ଶସ୍ତା ହୋଇପାରେ। କାରଣ ୨୦୨୫-୨୬ ବଜେଟରେ ଅର୍ଥମନ୍ତ୍ରୀ ନର୍ମଳା ସୀତାରମଣ ଆମଦାନୀ ହେଉଥିବା ମୋଟର ସାଇକେଲ ଉପରୁ ଆମଦାନୀ ଶୁକ୍ଳ ହ୍ରାସ ନେଇ ଘୋଷଣା କରିଛନ୍ତି । ବିଶେଷ କରି ଅଧିକ କ୍ଷମତା ବିଶିଷ୍ଟ ଇଞ୍ଜିନର।

ଅର୍ଥମନ୍ତ୍ରୀ କହିଛନ୍ତି ସଂପୂର୍ଣ୍ଣ ଭାବରେ ଆମଦାନୀ ହେଉଥିବା ୧୬୦୦ ସିସି ପର୍ଯ୍ୟନ୍ତ ଇଞ୍ଜିନ ବିଶିଷ୍ଟ ମୋଟରସାଇକେଲ ଉପରେ ଲାଗୁଥିବା ଇମ୍ପୋର୍ଟ ଡ୍ୟୁଟିକୁ ୫୦ ପ୍ରତିଶରୁ ୪୦ ପ୍ରତିଶତକୁ କରାଯିବ। ଏହା ସହ ସେମି ନକ୍‌ଡ ଡାଉନ (SKD) କିଟ୍‌ ଉପରେ ୨୫ ପ୍ରତିଶତରୁ ୨୦ ପ୍ରତିଶତ ଏବଂ ସଂପୂର୍ଣ୍ଣ କନ୍‌ଡ ଡାଉନ (CKD) ୟୁନିଟ୍ ଉପରେ ଟ୍ୟାକ୍ସ ୧୦ ପ୍ରତିଶତ କରାଯାଇଛି, ଯାହା ପୂର୍ବରୁ ୧୫ ପ୍ରତିଶତ ରହିଥିଲା। ହାର୍ଲେ ଡେଭିଡସନ ଭଳି ବାଇକ ନିଜର ଅଧିକ କ୍ଷମତା ବିଶିଷ୍ଟ ଇଞ୍ଜିନ ପାଇଁ ଲୋକପ୍ରିୟ।

ତେବେ ଏହି ନିଷ୍ପତ୍ତି ଏଭଳି ସମୟରେ ଆସିଛି ଯେତେବେଳେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିକଟରେ ଭାରତ ଭଳି ଦେଶକୁ ଧମକ ଦେଇଥିଲେ। ଟ୍ରମ୍ପ କହିଥିଲେ, ଆମେରିକୀୟ ସାମଗ୍ରୀ ଉପରେ ଅଧିକ ଟାରିଫ୍‌ ଲଗାଉଥିବା ଦେଶଙ୍କ ଉପରେ ଆମେରିକା ମଧ୍ୟ ଅଧିକ ଟ୍ୟାକ୍ସ ଲଗାଇବ। ଟ୍ରମ୍ପ ଗତବର୍ଷ ଡିସେମ୍ବରରେ କହିଥିଲେ ଯେ, ଭାରତ ଅତ୍ୟଧିକ କର ଲଗାଉଛି।ସେ କହିଥିଲେ, ଯଦି ସେମାନେ ଆମେ ଉପରେ କର ଲଗାଉଛନ୍ତି, ତେବେ ଆମେ ମଧ୍ୟ ସେମାନଙ୍କ ଉପରେ ସେତିକି କର ଲଗାଇବୁ। ଏମିତିକି ରବିବାର ଡୋନାଲ୍ଡ ପ୍ରଥମ ପର୍ଯ୍ୟାୟରେ ଟାରିଫ୍‌ର ଘୋଷଣା କରିଥିଲେ। ଯେଉଁଥିରେ ମେକ୍ସିକୋ ଏବଂ କାନାଡା ଉପରେ ୨୫ ପ୍ରତିଶତ ଏବଂ ଚୀନ ଉପରେ ୧୦ ପ୍ରତିଶତ ଟାରିଫ୍ ବୃଦ୍ଧି କରାଯାଇଛି। ଅବଶ୍ୟ ଏଥିରେ ଭାରତର ନାଁ ନାହିଁ।

ବାଣିଜ୍ୟ ମନ୍ତ୍ରଣାଳୟ ଅନୁଯାୟୀ, ଗତ ଆର୍ଥିକ ବର୍ଷରେ ଭାରତ ଆମେରିକାର ସବୁଠୁ ବଡ଼ ବାଣିଜ୍ୟିକ ସହଯୋଗୀ ଥିଲା। ଏମିତିରେ ବି ହାର୍ଲେ ଡେଭିଡସନ ଉପରେ ଟାରିଫ ଭାରତ ଏବଂ ଆମେରିକା ମଧ୍ୟରେ ଅନେକ ବର୍ଷରୁ ବିବାଦର ବିଷୟ ରହିଛି। ଟ୍ରମ୍ପ ଏହାକୁ କମ୍ କରିବା ପକ୍ଷରେ ଅଛନ୍ତି।

ସୂଚନାଥାଉକି, ହାର୍ଲେ ଡେଭିଡସନ ଭାରତରେ ୧୦ଟି ଇମ୍ପୋର୍ଟେଡ ବାଇକ୍‌ ବିକ୍ରି କରୁଛି। ଯାହାର ମୂଲ୍ୟ ୧୩-୧୯ ଲକ୍ଷ । ହିରୋ ମୋଟୋକର୍ପ ସହ ସହଭାଗିତାରେ । ଟ୍ରାୟମ୍ଫ, ସୁଜକୀ, ଡୁକାଟି ଏବଂ କାଓ୍ବାସାକୀ ମଧ୍ୟ ଭାରତରେ ପ୍ରିମିୟମ ବାଇକ୍‌ ବିକ୍ରି କରୁଛନ୍ତି।

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.