ବେଙ୍ଗାଲୁରୁ: କନ୍ନଡ ଅଭିନେତ୍ରୀ ରନ୍ୟା ରାଓଙ୍କ ସୁନା ଚୋରା ଚାଲାଣ ମାମଲାରେ ଏକ ଅପଡେଟ ଖବର ସାମ୍ନାକୁ ଆସିଛି। ରାନ୍ୟଙ୍କର ବିମାନବନ୍ଦର ପ୍ରୋଟୋକଲ ଭାଙ୍ଗିବାରେ ତାଙ୍କ ଆଇପିଏସ୍ ବାପାଙ୍କର ଭୂମିକା ଅଛି କି ନା ସେ ନେଇ ତଦନ୍ତ କରିବାକୁ କର୍ଣ୍ଣାଟକ ସରକାର ନିର୍ଦ୍ଦେଶ ଦେଇଛନ୍ତି। ସେପଟେ ଏହିମା ମାମଲାରେ ଅଟ୍ରିୟା ହୋଟେଲ ମାଲିକଙ୍କ ନାତି ତରୁଣ ରାଜୁ ଗିରଫ। ବେଙ୍ଗାଲୁରୁ ରାଜସ୍ୱ ଗୁଇନ୍ଦା ନିର୍ଦ୍ଦେଶାଳୟ (ଡିଆରଆଇ) ତାଙ୍କୁ ଗିରଫ କରିଥିବା ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି। ରାନ୍ୟାଙ୍କ ଗିରଫର କିଛି ଦିନ ପରେ ରାଜୁଙ୍କୁ ଗିରଫ କରାଯାଇଛି। ମାର୍ଚ୍ଚ ୩ ତାରିଖରେ କେମ୍ପେଗୌଡା ଅନ୍ତର୍ଜାତୀୟ ବିମାନବନ୍ଦରରେ ଅଭିନେତ୍ରୀ ରାଓଙ୍କ ୧୨.୫୬ କୋଟି ଟଙ୍କାର ୧୪.୮ କେଜି ସୁନା ବାର ସହିତ ଅଟକ ରଖାଯାଇଥିଲା। ଏହି ମାମଲାରେ ବର୍ତ୍ତମାନ ଅଧିକ ତଦନ୍ତ ଜାରି ରହିଥିବା ବେଳେ ରାଜୁ ଗିରଫ ହେବା ମାମଲାକୁ ଆହୁରି ବଢ଼ାଇ ଦେଇଛି।
ରିପୋର୍ଟ ଅନୁସାରେ, ତରୁଣ ରାଜୁ ସୁନା ଚୋରା ଚାଲାଣ କାର୍ଯ୍ୟରେ ସମ୍ପୃକ୍ତ ଥିବା ଜଣା ପଡ଼ିବା ପରେ ତାଙ୍କୁ ଅଟକ ରଖାଯାଇଥିଲା। ଏହାପରେ ବେଙ୍ଗାଲୁରୁର ସ୍ୱତନ୍ତ୍ର ଅର୍ଥନୈତିକ ଅପରାଧ ଅଦାଲତରେ ତାଙ୍କୁ ହାଜର କରିବା ସହ ମାମଲାରେ ଅଧିକ ପଚରାଉଚରା ପାଇଁ ଅଦାଲତରେ ହାଜର କରାଯାଇଥିଲା। ମାମଲାରେ ଅଧିକ ତଦନ୍ତ ପାଇଁ ଅଦାଲତ ରାଜୁଙ୍କୁ ୫ ଦିନିଆ ଡିଆରଆଇ ହେପାଜତରେ ପଠାଇଛନ୍ତି।
ତରୁଣ ରାଜୁ ଏବଂ ରନ୍ୟା ରାଓ ଘନିଷ୍ଠ ସହଯୋଗୀ ଥିବା ଡିଆରଆଇ ସନ୍ଦେହ କରୁଛି। ଏହି ଦୁହେଁ ମିଶି ବିଦେଶରୁ ସୁନା ଚୋରା ଚାଲାଣ କାରବାର କରୁଥିଲେ। ଡିଆରଆଇକୁ ମିଳିଥିବା ସୂଚନା ଅନୁସାରେ, ରାନ୍ୟା ନିକଟରେ ସ୍ଥପତି ଜତୀନ ହୁକ୍କେରୀଙ୍କୁ ବିବାହ କରିବା ପରେ ରାଜୁଙ୍କ ସହ ତାଙ୍କ ବନ୍ଧୁତାରେ ଫାଟ ସୃଷ୍ଟି ହୋଇଥିଲା। ତା’ ସତ୍ତ୍ୱେ ବି ଦୁଇ ବନ୍ଧୁ ସୁନା ଚାଲାଣ କାରବାର ଜାରି ରଖିଥିଲେ ବୋଲି କୁହାଯାଉଛି। ରନ୍ୟା ଦୁବାଇରୁ ସୁନା ଆଣିବା ବେଳେ ତରୁଣଙ୍କୁ ଯୋଗାଯୋଗ କରିଥିବା ଜଣାପଡ଼ିଛି। ଏହା ହିଁ ତାଙ୍କ ଗିରଫଦାରୀର ପ୍ରମୁଖ କାରଣ।
ପଢନ୍ତୁ- ଅପରାଧୀ ଅମନ ସାହୁକୁ ଏନକାଉଣ୍ଟର; ଏନଟିପିସି ଡିଜିଏମ ହତ୍ୟା ମାମଲାରେ ଥିଲା ଲିଙ୍କ୍
ରନ୍ୟା ପୂର୍ବରୁ ହେପାଜତରେ ଥିବା ବେଳେ, ମାମଲାର ମୂଳ ପର୍ଯ୍ୟନ୍ତ ପହଞ୍ଚିବା ପାଇଁ ଡିଆରଆଇ ଡିଆରଆଇ ତରୁଣ ରାଜୁଙ୍କୁ ତାଙ୍କ ସାମ୍ନାକୁ ଆଣି ପଚାରଉଚରା କରିଥିଲା। ପୋଲିସ ମହାନିର୍ଦ୍ଦେଶକ (କର୍ଣ୍ଣାଟକ ରାଜ୍ୟ ପୋଲିସ ହାଉସିଂ କର୍ପୋରେସନ) ରାମଚନ୍ଦ୍ର ରାଓଙ୍କ ଦ୍ୱିତୀୟ ପତ୍ନୀଙ୍କ ଝିଅ ରନ୍ୟା ରାଓ ମାମଲାରେ ଆଂଶିକ ଦୋଷ ସ୍ୱୀକାର କରିଥିବା ଜଣାପଡ଼ିଛି।
କର୍ତ୍ତୃପକ୍ଷ ତାଙ୍କ ନିକଟରୁ ୧୭ଟି ସୁନା ବାର୍ ଜବତ କରିବା ସହିତ ଦୁବାଇ, ସାଉଦି ଆରବ, ୟୁରୋପ ଏବଂ ଆମେରିକାକୁ ତାଙ୍କର ବ୍ୟାପକ ଟ୍ରାଭେଲ ହିଷ୍ଟ୍ରି ଥିବା ଜଣାପଡ଼ିଛି। ସେ ଗତ ବର୍ଷ ପ୍ରାୟ ୩୦ ଥର ଦୁବାଇ ଯାତ୍ରା କରିଥିଲେ, ଯେଉଁଥିରେ ୧୫ ଦିନ ମଧ୍ୟରେ ୪ ଥର ଯାତ୍ରା କରିଥିଲେ, ପ୍ରତ୍ୟେକ ଥର ସୁନା ଚୋରା ଚାଲାଣ କରୁଥିବା ଅଭିଯୋଗ ହୋଇଛି।
ଏପଟେ ରାନ୍ୟା ତଦନ୍ତକୁ ସମ୍ପୁର୍ଣ୍ଣ ଗୋପନୀୟ ରଖିବାକୁ ଅନୁରୋଧ କରିବା ସହିତ ତଦନ୍ତରେ କର୍ତ୍ତୃପକ୍ଷଙ୍କୁ ପୂର୍ଣ୍ଣ ସହଯୋଗ କରିବେ ବୋଲି ପ୍ରତିଶ୍ରୁତି ଦେଇଛନ୍ତି। ସେପଟେ ତାଙ୍କ ବାସଭବନରେ ତଲାସି କରି ୨.୦୬ କୋଟି ଟଙ୍କାର ସୁନା ଅଳଙ୍କାର ଏବଂ ୨.୬୭ କୋଟି ଟଙ୍କାର ଭାରତୀୟ ମୁଦ୍ରା ଜବତ କରିଛି ଡିଆର୍ଆଇ।
ସେପଟେ ମୋମବାର ମାମଲାର ଶୁଣାଣି ବେଳେ ଡିଆରଆଇ ଅଫିସରଙ୍କ ବିରୋଧରେ ଗାଳିଗୁଲଜ କରୁଥିବା ଅଭିଯୋଗ ଆଣିଛନ୍ତି ରାନ୍ୟା । ମୁଁ ସମ୍ପୂର୍ଣ୍ଣ ସହଯୋଗ କଲେ ବି ଅଫିସରମାନେ ଗାଳିଗୁଳଜ କରିଥିବା ସେ ଅଭିଯୋଗ କରିଛନ୍ତି। ଅନ୍ୟପଟେ ଡିଆରଆଇ ଅଭିଯୋଗକୁ ଖଣ୍ଡନ କରିବା ସହିତ ରାନ୍ୟା ତଦନ୍ତରେ ସହଯୋଗ କରୁ ନାହାନ୍ତି ବୋଲି କହିଛି।
