ମଣ୍ଡିକୁ ଆସୁନି ଗାଡ଼ି, ସ୍ଵାଭାବିକ ହୋଇ ପାରୁନାହିଁ ଧାନ କିଣା ବିକା; ଚିନ୍ତାରେ ଚାଷୀ

ବରଗଡ଼: ଓଡ଼ିଶାର ଭାତ ହାଣ୍ଡି ବରଗଡ଼ ଜିଲ୍ଲାରେ ଧାନ କିଣା ବିକା ପ୍ରକ୍ରିୟାକୁ ୨ ମାସ ହେବାକୁ ବସିଲାଣି କିନ୍ତୁ ବର୍ତ୍ତମାନ ପର୍ଯ୍ୟନ୍ତ ଚାଷୀଙ୍କ ସମସ୍ୟା ସମାଧାନ ହୋଇ ପାରୁ ନାହିଁ। ପ୍ରଥମ ପର୍ଯ୍ୟାୟରେ ଧାନ କିଣା ବିଳମ୍ବିତ ହୋଇଥିବା ବେଳେ, ଅନ୍ୟ ପଟେ ଚାଷୀଙ୍କ ଟୋକେନ୍ ଆସିନ ନ ଥିବା ବେଳେ ଅନ୍ୟ ପଟେ ରାଇସ ମିଲ ଆସୋସିଏସନ୍ ଆନ୍ଦୋଳନକୁ ଓହ୍ଲାଇଥିଲେ। ରାଜ୍ୟ ସରକାରଙ୍କ ସହିତ ଆଲୋଚନା ପରେ ଆଜି ଠାରୁ ପୁଣି ଧାନ କିଣା ବିକା ପ୍ରକ୍ରିୟା ଆରମ୍ଭ କରାଯିବ ବୋଲି ସୂଚନା ଦେଇଥିଲେ। କିନ୍ତୁ ମିଲର୍ସ ମଣ୍ଡିଗୁଡ଼ିକୁ ଗୋଟିଏ ଦୁଇଟି ଲେଖାଏଁ ଗାଡ଼ି ପଠାଇ ନିଜ କାମ ସାରି ଦେଇଛନ୍ତି। ଅନ୍ୟପଟେ ମଣ୍ଡି ଭିତରେ ଲକ୍ଷ ଲକ୍ଷ ବସ୍ତା ଧାନ କିପରି ଉଠା ଯାଇ ପାରିବ ଏବଂ ଚାଷୀ ଧାନ ବିକ୍ରି କରି ତାର ପ୍ରାପ୍ୟ ପାଇବ ନା ନାହିଁ ତାକୁ ନେଇ ମଧ୍ୟ ସନ୍ଦେହ ସୃଷ୍ଟି ହୋଇଛି।

ଜିଲ୍ଲାରେ ବଢୁଛି ଧାନ ବିକ୍ରି ସମସ୍ୟା, ବଢିବାରେ ଲାଗିଛି ଚାଷୀ ଅସନ୍ତୋଷ, ମିଲର୍ସ ଓ ରାଜ୍ୟ ସରକାରଙ୍କ ଭିତରେ ଲାଗି ଥିବା ବିବାଦକୁ ନେଇ ପେଶି ହଉଛି ଚାଷୀ କୂଳ। ଦିନ ରାତି କଷ୍ଟ ଉପାର୍ଜିତ କରିଥିବା ଧାନକୁ ବିକ୍ରି ପାଇଁ ଶୀତ କାକରରେ ବସି ରହିଛି ଚାଷୀ। ଅନ୍ୟପଟେ କେତେ ବେଳେ ଟୋକନ ଆସୁନି ତ କେତେବେଳେ ଗାଡ଼ି ସମସ୍ୟା ଘେରରେ ଚାଷୀ। କେବେ ବିକିବ ଧାନ ? କେବେ ପୁଣି ରବି ଋତୁ ପାଇଁ ସାର,ବିହନ ଓ ଔଷଧ କିଣିବ ଚାଷୀ ? ଅପେକ୍ଷା କରିଛି ଧାନ ବିକ୍ରି କରି ତାର ପ୍ରାପ୍ୟ ପାଇବ।

ଚଳିତ ଖରିଫ ଋତୁରେ ଧାନ କିଣା ବିକା ପାଇଁ ୧ ଲକ୍ଷ ୬୩ ହଜାରରୁ ଉର୍ଦ୍ଧ୍ବ ଚାଷୀ ପଞ୍ଜୀକୃତ ହୋଇଥିବା ବେଳେ ବର୍ତ୍ତମାନ ପର୍ଯ୍ୟନ୍ତ ୭୩ ହଜାର ଚାଷୀ ଧାନ ବିକ୍ରି କରିଛନ୍ତି। ଅନ୍ୟପଟେ ବହୁ ଚାଷୀଙ୍କ ଟୋକନ ବର୍ତ୍ତମାନ ପର୍ଯ୍ୟନ୍ତ ଆସି ନାହିଁ ଯାହାକୁ ନେଇ ଚିନ୍ତାରେ ଭାତ ହାଣ୍ଡିର ଚାଷୀ। ମିଲର୍ସ ଓ ସରକାରଙ୍କ ଭିତରେ ଲାଗି ରହିଥିବା ଦ୍ଵନ୍ଦ୍ଵକୁ ନେଇ ପେଶି ହଉଛି ଚାଷୀ। ଅନ୍ୟପଟେ ଖୁବ୍ ଶୀଘ୍ର ଧାନ ଉଠିବ, ଧାନ କିଣା ପ୍ରକ୍ରିୟା ତ୍ଵରାନ୍ଵିତ କରାଯାଇଛି ବୋଲି ମୁଖ୍ୟ ଖାଦ୍ୟ ଯୋଗାଣ ବିଭାଗ ଅଧିକାରୀ କହିଛନ୍ତି।