ବିହାରରେ ଖାତା ଖୋଲି ପାରିଲେନି ପ୍ରଶାନ୍ତ କିଶୋର, ସୋସିଆଲ ମିଡିଆରେ ଜାଣନ୍ତୁ କ’ଣ କହୁଛନ୍ତି ୟୁଜର?

ପାଟନା ୧୪।୧୧: ବିହାର ବିଧାନସଭା ନିର୍ବାଚନ ଫଳାଫଳରେ ନିର୍ବାଚନ ରଣନୀତିକାର ପ୍ରଶାନ୍ତ କିଶୋର (ପିକେ)ଙ୍କ ଜନସୁରାଜ ପାର୍ଟିକୁ ଜୋରଦାର ଝଟକା ଲାଗିଛି। ପାର୍ଟି ରାଜ୍ୟର ସମସ୍ତ ୨୩୪ ବିଧାନସଭା ନିର୍ବାଚନମଣ୍ଡଳିରେ ନିଜର ପ୍ରାର୍ଥୀ ଦେଇଥିଲା। ହେଲେ ଭୋଟ ଗଣନା କାଳରେ ପ୍ରାରମ୍ଭିକ ବୃଦ୍ଧି ହରାଇବା ପରଠାରୁ କୌଣସି ଗୋଟିଏ ଆସନରେ ଆଗରେ ଚାଲୁଥିବାର ଦେଖାଯାଉ ନାହିଁ। ଏନଡିଏକୁ ପ୍ରଚଣ୍ଡ ବହୁମତ ମିଳିଥିବା ବେଳେ ଜନସୁରାଜ ଖାତା ବି ଖୋଲି ପାରିନି। ଏଣୁ ସୋସିଆଲ ମିଡିଆରେ ଏବେ ଜନସୁରାଜ ପାଇଁ ମିମସ୍ ଓ ଟ୍ରୋଲିଂ ଆରମ୍ଭ ହୋଇଯାଇଛି।

ନିର୍ବାଚନ ପ୍ରଚାର କାଳରେ ପିକେ କହିଥିଲେ ଯେ ଜେଡିୟୁକୁ ୨୫ରୁ ଗୋଟେବି ଆସନ ଅଧିକ ମିଳିବ ନାହିଁ। ସେ କହିଥିଲେ ଯେ ଯଦି ନିର୍ବାଚନରେ ଜେଡିୟୁ ୨୫ରୁ ଅଧିକ ଆସନ ଜିତେ ତେବେ ସେ ରାଜନୀତି ଛାଡିଦେବେ। ଏବେ ଫଳାଫଳରେ ଜେଡିୟୁ ୮୦ରୁ ୮୫ ଆସନରେ ଆଗରେ ରହିଛି। ଏଣୁ ପିକେଙ୍କ ପୁରୁଣା ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି। ଲୋକେ ଏବେ ପଚାରୁଛନ୍ତି ପିକେ ପୂର୍ବରୁ କରିଥିବା ପଣ ଏବେ ପୁରଣ କରିବେ କି? ଅର୍ଥାତ ରାଜନୀତିରୁ ସନ୍ୟାସନ ନେବେକି ପିକେ ବୋଲି ଲୋକେ ପଚାରୁଛନ୍ତି।

ସୋସିଆଲ ମିଡିଆରେ ଜନସୁରାଜର ସୋଚନୀୟ ସ୍ଥିତିକୁ ନେଇ ମିମସ୍ ର ବନ୍ୟା ଆସିଛି। କିଛି ୟୁଜର ପ୍ରଶାନ୍ତ କିଶୋରଙ୍କ ରଣନୀତିକୁ ଟାର୍ଗେଟ୍ କରୁଥିବା ବେଳେ ଆଉ କିଛି ତାଙ୍କର ପୁରୁଣା ବୟାନକୁ ମନେ ପକାଇ ଦେଉଛନ୍ତି। ଏଥିରେ ଜଣେ ୟୁଜର ଲେଖିଛନ୍ତି ଯେ ‘ ପିକେ କହିଥିଲେ ଜେଡିୟୁ ୨୫ ସିଟରୁ ଉପରକୁ ଗଲା ତ ସେ ରାଜନୀତି ଛାଡିଦେବେ, ଏବେତ ଡେଡିୟୁ ୮୫ ପାର କରିଗଲାଣି’। ତେବେ ଜନସୁରାଜ ପାର୍ଟି ମୁଖପାତ୍ର କହିଛନ୍ତି ଯେ ଏହା ରାଜ୍ୟରେ ନୂଆ ପ୍ରକାରର ରାଜନୀତି ଆଣିବାର ଏକ ଉଦ୍ୟମ ଥିଲା, ହେଲେ ଲୋକେ ବୁଝି ପାରିଲେନି। ବିହାରରେ ଭୋଟ ଗଣନା ଏବେ ଜାରି ରହିଛି, ହେଲେ ପ୍ରଶାନ୍ତ କିଶୋରଙ୍କ ଜନସୁରାଜ ପାଇଁ ସାମାନ୍ୟ ସମ୍ଭାବନା ବି ନାହିଁ।