ନୂଆଦିଲ୍ଲୀ: ପିଆଜ ଉପରେ ୨୦ ପ୍ରତିଶତ ରପ୍ତାନୀ ଶୁଳ୍କ ହଟାଇଲେ କେନ୍ଦ୍ର ସରକାର। ଏପ୍ରିଲ ପହିଲାରୁ ଏହା ଲାଗୁ ହେବ। ଗ୍ରାହକ ବ୍ୟାପାର ବିଭାଗ ସହ ଆଲୋଚନା କରିବା ପରେ ରାଜସ୍ୱ ବିଭାଗ ଏହି ବିଜ୍ଞପ୍ତୀ ଜାରି କରି ସୂଚନା ଦେଇଛି।
ଘରୋଇ ବଜାରରେ ନିଅଣ୍ଟିଆ ପରିସ୍ଥିତିର ମୁକାବିଲା ପାଇଁ କେନ୍ଦ୍ର ସରକାର ପୂର୍ବରୁ ରପ୍ତାନି ଶୁଳ୍କ, ସର୍ବନିମ୍ନ ରପ୍ତାନି ମୂଲ୍ୟ ଏବଂ ରପ୍ତାନି ନିଷେଧ ଭଳି କଟକଣା ଲାଗୁ କରିଥିଲେ। ଏହିସବୁ ପଦକ୍ଷେପ ୨୦୨୪ ଡିସେମ୍ବର ୮ ମେ ୩, ୨୦୨୪ ପର୍ଯ୍ୟନ୍ତ ପ୍ରାୟ ପାଞ୍ଚ ମାସ ପାଇଁ ଲାଗୁ ହୋଇଥିଲା। ୧୩ ସେପ୍ଟେମ୍ବର ୨୦୨୪ ଠାରୁ ୨୦ ପ୍ରତିଶତ ରପ୍ତାନି ଶୁଳ୍କ ଲାଗୁ କରାଯାଇଥିଲା।
ପ୍ରତିବନ୍ଧକ ସତ୍ତ୍ୱେ ବି ପିଆଜ ରପ୍ତାନି ୨୦୨୩-୨୪ ଆର୍ଥିକ ବର୍ଷରେ ୧୭.୧୭ ଲକ୍ଷ ମେଟ୍ରିକ୍ ଟନ୍ (LMT) ଏବଂ ୨୦୨୪-୨୫ରେ ମାର୍ଚ୍ଚ ୧୮ ପର୍ଯ୍ୟନ୍ତ ୧୧.୬୫ ଲକ୍ଷ ମେଟ୍ରିକ ଟନ ରପ୍ତାନୀ ହୋଇଥିଲା। ଫଳରେ ମାସିକ ରପ୍ତାନି ସେପ୍ଟେମ୍ବର ୨୦୨୪ରେ ୦.୭୨ ଲକ୍ଷ ମେଟ୍ରିକ ଟନରୁ ବୃଦ୍ଧି ପାଇ ଜାନୁଆରୀ ୨୦୨୫ରେ ୧.୮୫ ଲକ୍ଷ ମେଟ୍ରିକ ଟନ ହୋଇଛି।
ପଢନ୍ତୁ- ଏପ୍ରିଲ ପହିଲାରୁ ବନ୍ଦ ପଡ଼ିଥିବା ମୋବାଇଲ୍ ନମ୍ବରରେ କାମ କରିବନି ୟୁପିଆଇ: ବନ୍ଦ ହୋଇପାରେ ପୁଲ୍ ଟ୍ରାଞ୍ଜାକ୍ସନ
ଚାଷୀଙ୍କୁ ଅଭାବୀ ବିକ୍ରିରୁ ରକ୍ଷା କରିବା ସହିତ ବଜାରରେ ଖାଉଟିଙ୍କୁ ସୁଲଭ ମୂଲ୍ୟରେ ପିଆଜ ଉପଲବ୍ଧ କରାଇବା ପାଇଁ ଏହି ନିଷ୍ପତ୍ତି ନିଆଯାଇଛି। ବର୍ତ୍ତମାନ ରବି ଫସଲ ମାର୍କେଟ୍କୁ ଆସୁଥିବାରୁ ପିଆଜ ରପ୍ତାନୀ ସରକାର କଟକଣା ହଟାଇ ଦେଇଛନ୍ତି ବୋଲି ରାଜସ୍ୱ ବିଭାଗ ସୂଚନା ଦେଇଛି।
ସରକାରଙ୍କ ସୂଚନା ଲାସଲଗାଓଁ ଏବଂ ପିମ୍ପଲଗାଓଁ ବଜାରରେ ପିଆଜ ଷ୍ଟକ୍ ବୃଦ୍ଧି ପାଇବାରୁ ମୂଲ୍ୟ କମିଛି। ଖୁଚୁରା ମୂଲ୍ୟ ୧୦ ପ୍ରତିଶତ କମିଛି। କୃଷି ଏବଂ କୃଷକ କଲ୍ୟାଣ ବିଭାଗ ଅନୁଯାୟୀ, ଚଳିତ ବର୍ଷ ରବି ପିଆଜ ଉତ୍ପାଦନ ୨୨୭ ଲକ୍ଷ ମେଟ୍ରିକ ଟନ ହେବ ବୋଲି ଆକଳନ କରାଯାଇଛି। ଯାହା ଗତ ବର୍ଷର ୧୯୨ ଲକ୍ଷ ମେଟ୍ରିକ ଟନ ତୁଳନାରେ ୧୮ ପ୍ରତିଶତ ଅଧିକ। ଭାରତର ମୋଟ ପିଆଜ ଉତ୍ପାଦନର ୭୦-୭୫ ପ୍ରତିଶତ ରବି ପିଆଜର ଯୋଗଦାନ ରହିଛି। ଏହା ଅକ୍ଟୋବର କିମ୍ବା ନଭେମ୍ବରରେ ଖରିଫ ଫସଲ ଆସିବା ପର୍ଯ୍ୟନ୍ତ ମୂଲ୍ୟ କମ୍ କରିବାରେ ବହୁତ ସହଯୋଗ ହୋଇଥାଏ।
