ଭୁବନେଶ୍ଵର: ଟିକେଟକୁ ନେଇ କଂଗ୍ରେସରେ ଜାରି ରହିଛି ଅସନ୍ତୋଷ । ଟିକେଟ୍ ପାଇନଥିବା ଆଶାୟୀଙ୍କ ସମର୍ଥକ କଂଗ୍ରେସ ଭବନ ଆଗରେ ହୋହଲ୍ଲା କରିବା ସହ ଗେଟ୍ରେ ତାଲା ପକାଇଛନ୍ତି । ଉପକୂଳରୁ ଉପାନ୍ତ ଚାରିଆଡେ ଏଭଳି ଅସନ୍ତୋଷର ନିଆଁ ଲାଗିଥିବା ବେଳେ ପ୍ରଭାରୀ କହିଛନ୍ତି କିଛି ସ୍ଥାନରେ ସମସ୍ୟା ରହିଛି । ଏହା ଉପରେ ବିଚାର ବିମର୍ଷ ଚାଲିଛି ।
ରାଜଧାନୀର ଖରା ତାତିକୁ ବଳି ପଡିଛି କଂଗ୍ରେସ ଭବନରେ ଟିକେଟ୍ ତାତି । ଟିକେଟକୁ ନେଇ ରାଜ୍ୟ କଂଗ୍ରେସ ଭବନରେ ଅସନ୍ତୋଷ ବଢିବାରେ ଲାଗିଛି। ଏହାର ଦୃଶ୍ୟ କଂଗ୍ରେସ ଭବନରେ ଦେଖିବାକୁ ମିଳିଛି। ଧାରଣା ସହ ହଲ୍ଲାବୋଲରେ କମ୍ପୁଛି କଂଗ୍ରେସ ଭବନ। ଆଜି ପିପିଲି ଏବଂ ବ୍ରହ୍ମଗିରି ନିର୍ବାଚନ ମଣ୍ଡଳିର ଆଶାୟୀଙ୍କ ସମର୍ଥକ କଂଗ୍ରେସ ଭବନ ଗେଟରେ ତାଲା ପକାଇ ପ୍ରାର୍ଥୀ ବଦଳାଇବା ପାଇଁ ଦାବି କରିଛନ୍ତି । ରାଜ୍ୟ କଂଗ୍ରସ ପ୍ରଭାରୀ ଅଜୟ କୁମାର କଂଗ୍ରେସ ଭବନରେ ପହଞ୍ଚିବା ପରେ ଟିକେଟରୁ ବଞ୍ଚିତ ଆଶାୟୀଙ୍କ ସମର୍ଥକ ତାଙ୍କୁ ଘେରିଥିଲେ। ପିପିଲିରେ କଂଗ୍ରେସ ଜ୍ଞାନ ରଂଜନ ପଟ୍ଟନାୟକଙ୍କୁ ପ୍ରାର୍ଥୀ କରିଛି । ସେପଟେ ଦୀର୍ଘ ଦିନ ଧରି ସଂଗଠନ କରୁଥିବା ନିଶିକାନ୍ତ ମିଶ୍ର ଟିକେଟରୁ ବଞ୍ଚିତ ହୋଇଛନ୍ତି। ଯାହାକୁ ନେଇ ନିଶିକାନ୍ତଙ୍କ ସମର୍ଥକ ମାନେ ତାତିଥିଲେ । ନିଜେ ନିଶିକାନ୍ତ ପ୍ରଭାରୀଙ୍କ ସହ ଆଲୋଚନା କରିବା ପରେ ବିବାଦ ଥମିଥିଲା।
ସେହିପରି ବ୍ରହ୍ମଗିରିରେ ମିତ୍ରଭାନୁ ମହାପାତ୍ରଙ୍କୁ ପ୍ରାର୍ଥୀ କରିଛି ଦଳ। ଅନ୍ୟତମ ଆଶାୟୀ ସଫିକ ଉଦ୍ଦିନଙ୍କ ସମର୍ଥକ କଂଗ୍ରେସ ଭବନ ଆଗରେ ପ୍ରତିବାଦ କରିଥିଲେ । ଟିକେଟ ପରିବର୍ତ୍ତନ କରିବା ପାଇଁ ଦାବି କରିଥିଲେ । ସେହିପରି କୋରାପୁଟର ପୂର୍ବତନ ବିଧାୟକ କୃଷ୍ଣ ଶଗରିଆଙ୍କୁ ଭୁବନେଶ୍ବର ଜୟଦେବ ଆସନରୁ ପ୍ରାର୍ଥୀ କରିବା ପରେ ଟିକେଟ ପାଇନଥିବା ଜୟନ୍ତ ଭୋଇ କଂଗ୍ରେସ ଭବନରେ ପ୍ରତିବାଦ କରିଥିଲେ । ଏପରିକି ଯୁବ କଂଗ୍ରେସର କୈଣସି ନେତାଙ୍କୁ ଟିକେଟ ଦିଆଯାଇନଥିବା ଅଭିଯୋଗ ଆଣି ଯୁବ କଂଗ୍ରେସ କର୍ମୀବି ଟିକେଟ ଘୋଷଣା ଦିନ ତାଲା ପକାଇ ପ୍ରତିବାଦ କରିଥିଲେ ।
କେବେଳ ସେତିକି ନୁହେଁ ଟିକେଟ ଦେଇ ଟିକେଟ କାଟିବାକୁ ନେଇ ମଧ୍ୟ ଚର୍ଚ୍ଚାକୁ ଆସିଛି କଂଗ୍ରେସ । ତଲସରା ବିଧାନସଭା ନିର୍ବାଚନ ମଣ୍ଡଳିରୁ ହକି ତାରକା ପ୍ରବୋଧ ତିର୍କିଙ୍କୁ ଟିକେଟ ଦେଇ ଟିକେଟ କାଟିବା ପରେ ସେ କଂଗ୍ରେସରୁ ଇସ୍ତଫା ଦେଇଛନ୍ତି । ସେହିଭଳି କବିସୂର୍ଯ୍ୟନଗର ବିଧାନସଭା ଆସନରେ ବି କଂଗ୍ରେସ ଦୁଇ ଥର ପ୍ରାର୍ଥୀ ବଦଳାଇଛି। ଆଗକୁ କଂଗ୍ରେସର ଆହୁରୀ ୯ ଆସନ ଗୋଷଣା ବାକି ଥିବାରୁ ଏହି ତାଲିକା ଲମ୍ବିପାରେ ବୋଲି ଚର୍ଚ୍ଚା ହେଉଛି।
ସେପଟେ ରାଜ୍ୟ ପ୍ରଭାରୀ ବି ସ୍ବୀକାର କରିଛନ୍ତି ୧୦ରୁ ୧୫ ଟି ଆସନରେ ସମସ୍ୟା ରହିଛି । ଏହା ଉପରେ ବିଚାର ବିମର୍ଶ ଚାଲିଛି । କଂଗ୍ରେସ ୧୪୭ ଆସନରୁ ୧୩୮ ଆସନ ପାଇଁ ପ୍ରାର୍ଥୀ ଘୋଷଣା କରିସାରିଛି । ଲୋକସଭାରେ କଟକ ଏବଂ ମୟୁରଭଞ୍ଜ ଆସନ ପାଇଁ କଂଗ୍ରେସ ଏ ପର୍ଯ୍ୟନ୍ତ ପ୍ରାର୍ଥୀ ଘୋଷଣା କରିନାହିଁ ।
