ନୂଆଦିଲ୍ଲୀ ୭।୫: ବ୍ରିଟେନର ପୂର୍ବତନ ପ୍ରଧାନମନ୍ତ୍ରୀ ଋଷି ସୁନକ ବୁଧବାର ଅପରେସନ ସିନ୍ଦୂରକୁ ନେଇ ଭାରତକୁ ସମର୍ଥନ କରିଛନ୍ତି। କହିଛନ୍ତି ଭାରତ ପକ୍ଷରୁ ଆତଙ୍କ ଭିତ୍ତିଭୂମି ଉପରେ ଆକ୍ରମଣ ‘ଯଥାର୍ଥ ’। ଏ ନେଇ ବ୍ରିଟେନର ପୂର୍ବତନ ପ୍ରଧାନମନ୍ତ୍ରୀ ଏକ୍ସ ରେ ଏକ ପୋଷ୍ଟ ମଧ୍ୟ କରିଛନ୍ତି। ଏଥିରେ ସେ ଉଲ୍ଲେଖ କରିଛନ୍ତି ‘କୌଣସି ଦେଶକୁ ଅନ୍ୟ ଦେଶ ଦ୍ୱାରା ନିୟନ୍ତ୍ରିତ ଭୂମିରୁ ନିଜ ବିରୋଧରେ ହେଉଥିବା ଆତଙ୍କବାଦୀ ଆକ୍ରମଣକୁ ସ୍ୱୀକାର କରିବା କଥା ନୁହେଁ’।
ଏହା ପୂର୍ବରୁ ସୁନକ ଜମ୍ମୁ-କାଶ୍ମୀର ପହଲଗାମରେ ହୋଇଥିବା ‘ବର୍ବର’ ଆକ୍ରମଣକୁ ନିନ୍ଦା କରିଥିଲେ। ଏହି ଆକ୍ରମଣରେ ୨୬ ଜଣ ନିରିହ ପର୍ଯ୍ୟଟକଙ୍କ ମୃତ୍ୟୁ ହୋଇଥିଲା। ସେ ଏହା ମଧ୍ୟ କହିଥିଲେ ଯେ ପ୍ରସଙ୍ଗରେ ଭାରତ ସହ ବ୍ରିଟେନ ଏକଜୁଟ ଭାବେ ଛିଡା ହୋଇଛି। ସେ କହିଥିଲେ ଯେ ପହଲଗାମରେ ହୋଇଥିବା ଆତଙ୍କବାଦୀ ଗୁଳିକାଣ୍ଡ ନବବିବାହିତ, ପିଲା ଓ ଖୁସି ହେଉଥିବା ପରିବାରଙ୍କ ଜୀବନ ନେଇଛି। ସେମାନଙ୍କ ଲାଗି ଆମ ହୃଦୟ ବିଦିର୍ଣ୍ଣ। ଶୋକ ପାଳନ କରୁଥିବା ଲୋକେ ଜାଣନ୍ତି ବ୍ରିଟେନ ଆପଣଙ୍କ ଦୁଃଖରେ ଆପଣଙ୍କ ସହିତ ଛିଡା ହୋଇଛି। ଆତଙ୍କ କେବେ ହେଲେ ଜିତିବ ନାହିଁ, ଆମେ ଭାରତ ସହିତ ଏକଜୁଟ ଭାବେ ଛିଡା ହୋଇଛୁ।
No nation should have to accept terrorist attacks being launched against it from land controlled by another country.
— Rishi Sunak (@RishiSunak) May 7, 2025
India is justified in striking terrorist infrastructure. There can be no impunity for terrorists.
ଅପରେସନ ସିନ୍ଦୂରରେ ବ୍ରିଟେନର ପ୍ରତିକ୍ରିୟା
ବ୍ରିଟେନ ବାଣିଜ୍ୟ ସଚିବ ଜୋନାଥନ ରୋନାଲଡସ୍ କହିଛନ୍ତି ଯେ ତାଙ୍କ ଦେଶ ଉତ୍ତେଜନା ହ୍ରାସ ପାଇଁ ଭାରତ ଓ ପାକିସ୍ତାନ ଉଭୟଙ୍କୁ ସମର୍ଥନ କରିବାକୁ ପ୍ରସ୍ତୁତ। ସେ ବିବିସି ରେଡିଓକୁ କହିଛନ୍ତି ଯେ ‘ଆମର ବାର୍ତ୍ତା ଏହା ଯେ ଆମେ ଉଭୟ ଦେଶଙ୍କ ମିତ୍ର ଓ ପାର୍ଟନର। ଆମେ ଉଭୟ ଦେଶଙ୍କୁ ସମର୍ଥନ କରିବାକୁ ପ୍ରସ୍ତୁତ। ଆମେ ଦୁଇ ଦେଶଙ୍କ ଆଞ୍ଚଳିକ ସ୍ଥିରତା, ବାର୍ତ୍ତା, ଉତ୍ତେଜନା ହ୍ରାସ ପାଇଁ ଯାହା କିଛି ବି କରିବା ଦରକାର କରିବାକୁ ପ୍ରସ୍ତୁତ। ଏଥିରେ ଆମର ବହୁତ ଋଚି ରହିଛି’।
ସେପଟେ ବ୍ରିଟେନ ବିଦେଶ ମନ୍ତ୍ରାଳୟ ନିଜ ନାଗରିକଙ୍କୁ ଭାରତ-ପାକିସ୍ତାନ ସୀମାର ୮ କିଲୋମିଟର ଭିତରକୁ ଓ ଏଲଓସିର ୧୬ କିଲୋମିଟର ଭିତରକୁ ଯାହା ଉଚ୍ଚ ଉଚ୍ଚତା ସମ୍ପନ୍ନ ହିମାଳୟ କ୍ଷେତ୍ର ଦ୍ୱାରା ପ୍ରାକୃତିକ ବାବେ ଅବରୋଧ ହୋଇ ରହିଛି ସେ ସବୁ କ୍ଷେତ୍ରକୁ ଯାତ୍ରା ନ କରିବାକୁ ତଥା ପାକିସ୍ତାନର ଦକ୍ଷିଣ-ପଶ୍ଚିମ ବଲୁଚିସ୍ତାନ ପ୍ରାନ୍ତକୁ ଯାତ୍ରା ନ କରିବାକୁ ଆଡଭାଇଜରୀ ଜାରି କରିଛି।
