ଉତ୍ତରପ୍ରଦେଶ୧୧/୦୪: ନା ତାଙ୍କର ସାବରା । ଘର ଉତ୍ତର ପ୍ରଦେଶର ଫିରୋଜାବାଦର ଖୈରାଗଡ଼ । ସବାରା ଏବଂ ତାଙ୍କ ସ୍ୱାମୀ ଶାମସୁଦ୍ଦିନ୍ ପେଶାରେ ଦିନ ମଜୁରିଆ । ବସ୍ତିର ଝାଟିମାଟି ଘରେ ରୁହନ୍ତି ପରିବାର । ଦୈନିକ ଯାହା ରୋଜଗାର ସେଥିରୁ ଚଳେ ପରିବାର । ମାସିକ ରୋଜଗାର ଲକ୍ଷେ ହେବା ତ ଦୂରର କଥା ହଜାର ହଜାର ହେଲେ ବି ଢେର୍ । ଦିନେ ଖାଇଲେ ଆଉ ଦିନ ଉପାସ । ଏପରି ସ୍ଥିତିରେ ଘରେ ପଡିଛି ଚଡକ । କାରଣ ଘରକୁ ଆସିଛି ଇନକମ୍ ଟ୍ୟାକ୍ସ ନୋଟିସ୍ । ଲକ୍ଷେ କି ଦୁଇ ଲକ୍ଷ ନୁହେଁ ଏକାଥରେ କୋଟି କୋଟିର ନୋଟିସ୍ । ଆଉ ଏତେ ଟଙ୍କାର ନୋଟିସ୍ ଦେଖି ସାରା ପରିବାରର ଉଡିଯାଇଛି ହୋସ୍ । ଏପ୍ରିଲ ୧୭ ସୁଦ୍ଧା ଦାଖଲ ନକଲେ କଣ ହେବ କିଏ କହିବ । 

ଏପ୍ରିଲ୍ ୧, ୨୦୨୫ । ୧୯୬୧ ଧାରା ୧୪୮(୧) ଅନୁଯାୟୀ ଆସିଥିଲା ନୋଟିସ୍ । ଯେହେତୁ ନୋଟିସ୍ ଥିଲା ଇଂରାଜୀରେ, ପାଠ ପଢିନଥିବାରୁ ସାବରା ଦେଇଥିଲେ ଆଙ୍ଗୁଠି ଛାପ । କାରଣ ସାବରାଙ୍କ ନାରେ ଆସିଥିଲା ୪.୮୮ କୋଟି ଟଙ୍କାର ଆୟକର ନୋଟିସ୍ । ଯେଉଁଥିରେ ଲେଖାଥିଲା, ୨୦୨୧-୨୨ ମୂଲ୍ୟାଙ୍କନ ବର୍ଷରେ ତାଙ୍କ ନାମରେ ହୋଇଛି କୋଟି କୋଟିର ହେରଫେର । ଯାହାର ଫଳସ୍ୱରୁପ ୧୭ ଏପ୍ରିଲ ସୁଦ୍ଧା ପୈଠ କରିବାକୁ ପଡିବ ପାଖାପାଖି ୫ କୋଟି ଟଙ୍କା । ସଂଗେ ସଂଗେ ଖବର ଆଖପାଖ ଚାରିଆଡେ ବ୍ୟାପିଥିଲା । କେହି କେହି କହିଥିଲେ ପ୍ୟାନ୍ କାର୍ଡର ଅପବ୍ୟବହାରରୁ ଘଟିଛି ଏପରି । 
ସେପଟେ ଏତେବଡ ଘଟଣା ପରେ ଭାଙ୍ଗିପଡିଛନ୍ତି ସାବରା ଓ ତାଙ୍କ ପରିବାର । ତାଙ୍କ କହିବା କଥା ଗରୀବ ଲୋକେ ଏତେ ଟଙ୍କା ଦେଖିନୁ, ଆଣିବୁ କେଉଁଠି । ପ୍ୟାନ୍ କାର୍ଡ ତ ତାଙ୍କ ପାଖରେ, ତାହେଲେ ଜାଲ୍ କଲା କିଏ । ପ୍ରଶାସନ ଘଟଣାରେ ହସ୍ତକ୍ଷେପ କରୁ, ତଦନ୍ତ ଲାଗି ନିବେଦନ କରିଛନ୍ତି ସାବରା । କାରଣ ଯାହା ଘରେ ଦାନା ଖାଇବାକୁ ଦାନା ଗଣ୍ଡେ ନାହିଁ ସେ କେଉଁଠୁ ଦବ ଏତେ ଟଙ୍କା । ଏମିତିକି ଘରେ ଗ୍ୟାସ୍ ଚୂଲା ଟିଏ ବି ନାହିଁ । ସବୁଠାରୁ ଆଶ୍ଚର୍ଯ୍ୟ କଥା ସରକାର ସୁବିଧା ସୁଯୋଗ ବି ମିଳୁନି । ସେପଟେ ମାମଲାକୁ ଗମ୍ଭୀର କହିଛନ୍ତି FCA ଓ ଆୟକର ବିଶେଷଜ୍ଞ ଆର.ପି ଗୋୟଲ୍ । 

ସ୍ପଷ୍ଟ ଅନୁମାନ, ଆଧାର ଓ ପ୍ୟାନ୍ କାର୍ଡ ବ୍ୟବହାରରେ ହୋଇଛି ଠକେଇ । କେହି ଜାଲ୍ କରି କୋଟି କୋଟିର କାରବାର କରିଛି । ଫଳରେ ଫସିଛନ୍ତି ଉତ୍ତରପ୍ରଦେଶ ସାବରା । ଏବେ ପ୍ରଶ୍ନ, ଯଦି ନୀରିହ ବଳିପଡୁଛନ୍ତି ତେବେ ଚାକିରିଆଙ୍କ ଅବସ୍ଥା କଣ ହେବ ?