ବାରବାଟୀ ଟି-୨୦ ମୁକାବିଲା ପାଇଁ ଉଚ୍ଚସ୍ତରୀୟ ବୈଠକ, ଖେଳାଳି ଓ ଦର୍ଶକଙ୍କ ସୁରକ୍ଷା ଉପରେ ଗୁରୁତ୍ଵ

କଟକ: ଡିସେମ୍ବର ୯ ତାରିଖରେ ଅନୁଷ୍ଠିତ ହେବାକୁ ଯାଉଛି ଭାରତ ବନାମ ଦକ୍ଷିଣ ଆଫ୍ରିକା ଟି ୨୦ ମ୍ୟାଚ୍। ଏଥିପାଇଁ ସବୁ ଆଡେ ପ୍ରସ୍ତୁତି ଜୋରଦାର ଚାଲିଥିବା ବେଳେ ଆଜି ଓସିଏ କନଫରେନ୍ସ ହଲରେ କେନ୍ଦ୍ରାଞ୍ଚଳ ରାଜସ୍ଵ ଆୟୁକ୍ତ ଗୁହା ପୁନମ ତାପସ କୁମାରଙ୍କ ନେତୃତ୍ୱରେ ଏକ ଉଚ୍ଚ ସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି। ବୈଠକରେ ଖେଳାଳି ଆସିବା ଠାରୁ ଆରମ୍ଭ କରି ମ୍ୟାଚ୍ ଚାଲିବା ଓ ଖେଳାଳି ଷ୍ଟାଡିୟମରୁ ଫେରିବା ପର୍ଯ୍ୟନ୍ତ ସମସ୍ତ ବିଷୟରେ ଆଲୋଚନା କରାଯାଇଥିଲା।

ଏହି ବୈଠକରେ କଟକ ଜିଲ୍ଲାପାଳ, କଟକ ଡିସିପି,ସି ଆଇ ଏସ ଏଫ୍ ଅଧିକାରୀ, ସିଡିଏମଓ ,ଅଗ୍ନିଶମ ଅଧିକାରୀଙ୍କ ସମେତ ବିଭିନ୍ନ ବିଭାଗର ଅଧିକାରୀ ମାନେ ସାମିଲ ଥିଲେ। ବିଶେଷ କରି ଖେଳାଳି ଆସିବା ଠାରୁ ଆରମ୍ଭ କରି ମ୍ୟାଚ୍ ଚାଲିବା ଓ ଖେଳାଳି ଷ୍ଟାଡିୟମରୁ ଫେରିବା ପର୍ଯ୍ୟନ୍ତ ସମସ୍ତ ବିଷୟରେ ଆଲୋଚନା କରାଯାଇଥିଲା। ଏହା ସହ ଶୃଙ୍ଖଳିତ ଭାବେ ଟିକେଟ୍ ବିକ୍ରି, ଗ୍ରୀନ୍ କରିଡ଼ର ସହ ଫ୍ୟାନ ଗ୍ୟାଲେରୀର କିପରି ଭାବେ ସୁବନ୍ଦୋବସ୍ତ କରାଯିବ ସେ ନେଇ ଆଲୋଚନା କରାଯାଇଥିଲା।

ଏହା ସହ ଖେଳାଳିମାନେ କଟକ ଆସିବା ବେଳେ ଓଡ଼ିଆ ଅସ୍ମିତାର ଝଲକ ଦେଖିବାକୁ ମିଳିବ। ପାରମ୍ପରିକ ନୃତ୍ୟ ସହ ସାଂସ୍କୃତିକ କାର୍ଯ୍ୟକ୍ରମ ମାଧ୍ୟମରେ ଷ୍ଟାଡିୟମ୍ ବାହାରେ ସ୍ଵାଗତ କରାଯିବ। ସେହିଭଳି ଅଗ୍ନି ନିରାପତ୍ତା ବ୍ୟବସ୍ଥା ଗ୍ରହଣ କରାଯିବ। ଆବଶ୍ୟକ ପଡିଲେ ସିଭିଲ ଡିଫେନ୍ସ ଓ ଅତିରିକ୍ତ କର୍ମଚାରୀ ମାନଙ୍କୁ ନିୟୋଜିତ କରାଯିବ।

ସୂଚନାଯୋଗ୍ୟ, ବାରବାଟୀ ଷ୍ଟାଡିୟମରେ ଚଳିତ ବର୍ଷ  ଦ୍ଵିତୀୟ ଅନ୍ତର୍ଜାତୀୟ ମ୍ୟାଚ୍ ଆୟୋଜନ ହେବ। ଫେବୃଆରୀ ୯ରେ ଭାରତ ଓ ଇଂଲଣ୍ଡ ମଧ୍ୟରେ ମ୍ୟାଚ୍ ଖେଳା ଯାଇଥିଲା। ଏବେ ଡିସେମ୍ବର ୯ରେ ଟି-୨୦ରେ ମୁହାଁମୁହିଁ ହେବେ ଭାରତ ଓ ଦକ୍ଷିଣ ଆଫ୍ରିକା। ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦  ସିରିଜର ପ୍ରଥମ ମ୍ୟାଚ୍ କଟକରେ ଖେଳା ଯାଉଛି। ​​​​​​​