ପିଟର ନାଭାରୋଙ୍କ ଉପରେ ବର୍ଷିଲେ ଆମେରିକୀୟ ବିଶେଷଜ୍ଞ, କହିଲେ ଲଗାମହୀନ ପ୍ରତିଟି ଶବ୍ଦ

ନୂଆଦିଲ୍ଲୀ ୩୧/୦୮: ଟ୍ରମ୍ପଙ୍କ ଟାରିଫ୍ ଝଡ ନେଇ ଭାରତ-ଆମେରିକା ସମ୍ପର୍କ ତିକ୍ତ ହେବାରେ ଲାଗିଛି । ଏହାରି ଭିତରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବାଣିଜ୍ୟ ପରାମର୍ଶଦାତା ପିଟର ନାଭାରୋ ଲଗାତାର ଭାରତ ବିରୋଧୀ ବୟାନ ଦେଇ ଆସୁଛନ୍ତି । ସେ ଭାରତ ଉପରେ ରୁଷ-ୟୁକ୍ରେନ ଯୁଦ୍ଧକୁ ପ୍ରୋତ୍ସାହିତ କରୁଥିବା ଅଭିଯୋଗ ଆଣିଥିଲେ । ଏହା ମଧ୍ୟ କହିଥିଲେ ଯେ ୟୁକ୍ରେନରେ ଶାନ୍ତିର ପଥ ନୂଆଦିଲ୍ଲୀ ଦେଇ ଯାଇଛି ।

ତେବେ ନାଭାରୋଙ୍କ ଭାରତୀ ବିରୋଧୀ ବୟାନ ନିଜ ପାଇଁ ମହଙ୍ଗା ହୋଇଛି । ନିଜ ଦେଶରେ ସମାଲୋଚନାର ସମ୍ମୁଖୀନ ହେଉଛନ୍ତି ପିଟର । ଏସିଆ ବିଶେଷଜ୍ଞ ଓ ଦୁଇ ଆମେରିକା ବୈଦେଶିକ ମନ୍ତ୍ରୀଙ୍କ ପୂର୍ବତନ ପରାମର୍ଶଦାତା ଇଭାନ ଏ. ଫିଗେନବାଉମ୍ ଭାରତ ବିରୁଦ୍ଧରେ ପିଟର ନାଭାରୋଙ୍କ କଡ଼ା ବକ୍ତବ୍ୟର କଡ଼ା ସମାଲୋଚନା କରିଛନ୍ତି। ସେ ହ୍ୱାଇଟ୍ ହାଉସ୍ ବାଣିଜ୍ୟ ପରାମର୍ଶଦାତା ପିଟର ନାଭାରୋଙ୍କୁ 'ଏକ ବେଲଗାମ ତୋପ' ବୋଲି ବର୍ଣ୍ଣନା କରିଛନ୍ତି । ଯାହାଙ୍କ ବୟାନ ଆମେରିକା-ଭାରତ ସମ୍ପର୍କରେ ଦଶନ୍ଧି ଧରି ଚାଲିଥିବା ପ୍ରଗତିକୁ ପରାଜିତ କରିବାକୁ ଧମକ ଦେଉଛି।

ୟୁକ୍ରେନରେ ରୁଷର ଯୁଦ୍ଧ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦାୟୀ ବୋଲି ନାଭାରୋଙ୍କ ବୟାନ ପରେ, ଫିଗେନବାଉମ୍ ଏକ ପୋଷ୍ଟରେ କହିଛନ୍ତି, "ଏହି ଲୋକମାନେ ଆମେରିକା-ଭାରତ ସମ୍ପର୍କକୁ ଫଳପ୍ରଦ କରିବା ପାଇଁ ୨୫ ବର୍ଷର କଠିନ ଓ ଦ୍ୱିପାକ୍ଷିକ ପରିଶ୍ରମକୁ ଖରାପ୍ କରିଛି । ସେ ଆହୁରି କହିଛନ୍ତି, "ୟୁକ୍ରେନରେ ଶାନ୍ତିର ପଥ ନିଶ୍ଚିତ ଭାବରେ ନୂଆଦିଲ୍ଲୀ ଦେଇ ଯାଏ ନାହିଁ, ଏବଂ ଏପରି କହିବା ସମ୍ପୂର୍ଣ୍ଣ ଅବାନ୍ତର।

ଟ୍ରମ୍ପ ପ୍ରଶାସନର ଜଣେ ବରିଷ୍ଠ ବାଣିଜ୍ୟ ପରାମର୍ଶଦାତା ନାଭାରୋ ଭାରତ ବିରୋଧରେ ଏକ ନୂତନ ଆକ୍ରମଣାତ୍ମକ ମନୋଭାବ ଗ୍ରହଣ କରିଛନ୍ତି । ଋଷରୁ ତୈଳ କ୍ରୟକୁ ୟୁକ୍ରେନରେ ଚାଲିଥିବା ଯୁଦ୍ଧ ସହିତ ଯୋଡ଼ିଛନ୍ତି। ଏକ ସାକ୍ଷାତକାର ଓ ଅନେକ ସୋସିଆଲ ମିଡିଆ ପୋଷ୍ଟ ସମେତ ସାର୍ବଜନୀନ ବିବୃତ୍ତିରେ, ନାଭାରୋ ଭାରତକୁ କ୍ରେମଲିନ ପାଇଁ 'ତେଲର ପାଣ୍ଠି କେନ୍ଦ୍ର'ରେ ପରିଣତ କରିବାର ଅଭିଯୋଗ କରିଛନ୍ତି । ଦାବି କରିଛନ୍ତି ଯେ ୟୁକ୍ରେନୀୟମାନେ ମରୁଥିବାବେଳେ ଭାରତୀୟ ରିଫାଇନରମାନେ କଳାବଜାର ତେଲରୁ ଲାଭ ପାଉଛନ୍ତି।'