ଟ୍ରେନର ବଗିକୁ ଯୁବତୀଙ୍କୁ ଟାଣିନେଇ ଦୁଷ୍କର୍ମ କଲେ ଯବାନ, ମାଡ଼ିବସିଲା ଆରପିଏଫ

ରାଞ୍ଚି: ରକ୍ଷକ ହୋଇ ଭକ୍ଷକ ସାଜିଲେ ଜଣେ ସେନା ଯବାନ । ଜଣେ ମହିଳାଙ୍କୁ ଏକୁଟିଆ ପାଇ ତାଙ୍କୁ ଦୁଷ୍କର୍ମ କରି ଗିରଫ ହୋଇଛନ୍ତି ଯବାନ । ଡ୍ୟୁଟିରେ ଥିବା ବେଳେ ଅଭିଯୁକ୍ତ ଯବାନ ଜଣେ ୨୨ ବର୍ଷୀୟା ଯୁବତୀଙ୍କୁ ଛିଡ଼ା ହୋଇଥିବା ଟ୍ରେନ୍ର ବଗି ବିତରେ ଦୁଷ୍କର୍ମ କରିଛନ୍ତି । ରେଳ ସୁରକ୍ଷା ବଳ ତାଙ୍କୁ ଗିରଫ କରି କୋର୍ଟ ଚାଲାଣ କରିଛି । ଝାଡ଼ଖଣ୍ଡ ରାଞ୍ଚିର ଏହି ହୃଦୟ ବିଦାରକ ଘଟଣା ସାରା ଦେଶରେ ଆଲୋଡନ ସୃଷ୍ଟି କରିଛି ।

ଗୁରୁବାର ସନ୍ଧ୍ୟା ପ୍ରାୟ ସାଢ଼େ ୫ଟାରେ ତାତିସିଲୱାଇ ରେଳ ଷ୍ଟେସନରେ ଏହି ଘଟଣା ଘଟିଥିଲା । ଯୁବତୀ ଜଣଙ୍କ ରାଞ୍ଚି ଯିବାକୁ ଟ୍ରେନ୍ ଚଢ଼ିବାକୁ ଅପେକ୍ଷା କରିଥିଲେ। ଏହି ସମୟରେ ସେଠାରେ ଏକ ସେନା ଉପକରଣ ନେଇ ଯାଉଥିବା ଟ୍ରେନକୁ ସୁରକ୍ଷା ଦେଉଥିବା ଜଣେ ଯବାନ ଯୁବତୀଙ୍କ ଉପରେ ଖରାପ ନଜର ପକାଇଥିଲେ । ୪୨ ବର୍ଷୀୟ ଯବାନ ତାଙ୍କୁ ଏକ ଖାଲି ଟ୍ରେନ କୋଚକୁ ନେଇ ଯାଇଥିଲେ ଏବଂ ଦୁଷ୍କର୍କ କରିଥିଲେ ବୋଲି ଅଭିଯୋଗ ହୋଇଛି।

ଘଟଣା ସମୟରେ ଅଭିଯୁକ୍ତ ଯବାନ ନିଶାଗ୍ରସ୍ତ ଥିଲେ ବୋଲି ଆରପିଏଫ ଅଧିକାରୀ କହିଛନ୍ତି । ଅଭିଯୁକ୍ତ ଉତ୍ତର ପ୍ରଦେଶର ପ୍ରୟାଗରାଜ ଜିଲ୍ଲାର ବାସିନ୍ଦା । ସେ ପଞ୍ଜାବର ପଟିଆଲା ମିଡିୟମ ରେଜିମେଣ୍ଟରେ ପୋଷ୍ଟିଂ ହୋଇଥିଲେ । ମିଳିଥିବା ସୂଚନା ଅନୁସାରେ, ପୀଡ଼ିତାଙ୍କ ଚିତ୍କାର ଶୁଣି ସେଠାରେ ଥିବା ଲୋକେ ଆଲାରାମ ବଜାଇ ଦେଇଥିଲେ । ସଙ୍ଗେସଙ୍ଗେ ଆରପିଏଫ ଅଧିକାରୀ ଘଟଣାସ୍ଥଳରେ ପହଞ୍ଚିଥିଲେ ଏବଂ ଅଭିଯୁକ୍ତକୁ କାବୁ କରିଥିଲେ ।

ପୀଡ଼ିତାଙ୍କ ବୟାନ ଆଧାରରେ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ ହୋଇଛି । ଶୁକ୍ରବାର ତାଙ୍କୁ କୋର୍ଟରେ ହାଜର କରାଯାଇଥିଲା । କୋର୍ଟ ତାଙ୍କୁ ନ୍ୟାୟିକ ହେପାଜତକୁ ପଠାଇ ଦେଇଛନ୍ତି ।