ନୂଆଦିଲ୍ଲୀ ୧୪।୦୮; ପ୍ରବର୍ତ୍ତନ ନିର୍ଦ୍ଦେଶାଳୟ (ED) ଏକ ହାଇ-ପ୍ରୋଫାଇଲ୍ ମନି ଲଣ୍ଡରିଂ ମାମଲାରେ ଇନଷ୍ଟାଗ୍ରାମ ଇନଫ୍ଲୁଏନ୍ସର ସନ୍ଦିପା ଭିର୍କଙ୍କୁ ଗିରଫ କରିଛି। ୪୦ କୋଟି ଟଙ୍କାର ମନି ଲଣ୍ଡରିଂ ମାମଲାରେ ଇଡି ନିଜ କଡ଼ା ନଜରକୁ ଆଣିଛି। ତାଙ୍କର ଇନଷ୍ଟାଗ୍ରାମରେ ୧୨ ଲକ୍ଷରୁ ଅଧିକ ଫଲୋଅର୍ସ ଥିବା ଜଣାପଡିଛି। ସନ୍ଦୀପା ଭିର୍କଙ୍କ ବିରୋଧରେ ଭାରତୀୟ ଦଣ୍ଡ ସଂହିତାର ଧାରା ୪୦୬ ଏବଂ ୪୨୦ ଅଧୀନରେ ମୋହାଲିର ଏକ ପୋଲିସ ଷ୍ଟେସନରେ ମାମଲା ରୁଜୁ ହୋଇଥିଲା। ଏଥିରେ ତାଙ୍କ ଉପରେ ମିଥ୍ୟା ଦାବି କରି ଲୋକଙ୍କ ଠାରୁ ଟଙ୍କା ଆଦାୟ କରିବାର ଅଭିଯୋଗ ହୋଇଥିଲା।

ଦିଲ୍ଲୀର ବିଭିନ୍ନ ସ୍ଥାନରେ ଚଢାଉ

ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ୨୦୦୨ ମସିହାର ମନି ଲଣ୍ଡରିଂ ନିବାରଣ ଆଇନ (ପିଏମଏଲଏ) ଅନୁଯାୟୀ ମନି ଲଣ୍ଡରିଂ ମାମଲାରେ ମଙ୍ଗଳବାର ଏବଂ ବୁଧବାର ଦିଲ୍ଲୀ ଏବଂ ମୁମ୍ବାଇର ବିଭିନ୍ନ ସ୍ଥାନରେ ଯାଞ୍ଚ କରିଥିଲା। ଇଡି ଅନୁଯାୟୀ, ସନ୍ଦୀପା ଭିର୍କଙ୍କ ଉପରେ ଠକେଇ ଟଙ୍କା ନେବାର ଅଭିଯୋଗ ହୋଇଛି। ସେ ନିଜକୁ hyboocare.com ନାମକ ଏକ ୱେବସାଇଟ୍ ର ମାଲିକ ବୋଲି ଦାବି କରିଥିଲେ। ଯାହା FDA-ଅନୁମୋଦିତ ବ୍ୟୁଟି ପ୍ରଡକ୍ଟ ବିକ୍ରି କରିବାର ଦାବି କରିଥିଲା।

ତଥାପି, ତଦନ୍ତକାରୀମାନେ ଜାଣିପାରିଲେ ଯେ ଏହି ପ୍ରଡକ୍ଟ ଗୁଡ଼ିକ କେଉଁଠି ବି ମିଳୁନାହିଁ। ୱେବସାଇଟରେ ବ୍ୟବହାରକାରୀ ପଞ୍ଜିକରଣ ବୈଶିଷ୍ଟ୍ୟ ନଥିଲା, ପେମେଣ୍ଟ ଗେଟୱେ ଲଗାତାର ବିଫଳ ହେଉଥିଲା ଏବଂ ଏଥିରେ ସୋସିଆଲ ମିଡିଆ ଉପସ୍ଥିତି ନଥିଲା। ଏହା ବ୍ୟତୀତ, ସନ୍ଦୀପାଙ୍କ ହ୍ୱାଟସଆପ୍ ନମ୍ବର ବନ୍ଦ ରହୁଥିଲା ଏବଂ କମ୍ପାନୀର କୌଣସି ଯୋଗାଯୋଗ ନମ୍ବର ଉପଲବ୍ଧ ନଥିଲା। ଯାହା ସ୍ପଷ୍ଟ ଭାବରେ ମନି ଲଣ୍ଡରିଂ ଆଡ଼କୁ ଇଙ୍ଗିତ କରୁଥିଲା।