ନୂଆଦିଲ୍ଲୀ ୧୪/୦୮: ସାରା ଦେଶରେ SIR ତାତି । ପଲ୍ଲୀରୁ ଦିଲ୍ଲୀ ଉଠୁଛି ପଡୁଛି । ଶାସକ-ବିରୋଧୀ ମୁହାଁମୁହିଁ । ସଡକରୁ ସଂସଦ ତମୁମ୍ୱିତୋଫାନ । ଏହାରି ଭିତରେ କଂଗ୍ରେସ ସାଂସଦ ରାହୁଲ ଗାନ୍ଧୀ ଶାସକଙ୍କୁ ଘେରିବାକୁ ପୁଣି ଚାଲିଛନ୍ତି ଚାଲ୍ । ବୁଧବାର ସୋସିଆଲ ମିଡିଆରେ ସେୟାର କରିଛନ୍ତି ଚା ପିଉଥିବାର ଫଟୋ । ଜଣେ ନୁହେଁ ଅନେକ ଭୋଟରଙ୍କ ସହ ଚା’ ପିଉଥିବାର ଭିଡିଓ ବି ସେୟାର କରିଛନ୍ତି । ଯାହାକୁ ବିହାର ଭୋଟର ତାଲିକାରେ ଦର୍ଶାଯାଇଛି ମୃତ ।
ପୋଷ୍ଟରେ ରାହୁଲ ଲେଖିଛନ୍ତି, ଜୀବନରେ ଅନେକ ଅନୁଭବ ଅଛି, କିନ୍ତୁ ‘ମୃତ ଲୋକ’ଙ୍କ ସହ ଚା’ ପିଇବାର ସୁଯୋଗ ପ୍ରଥମ ଥର ମିଳିଛି । ଏଭଳି ନିଆରା ଅନୁଭବ ପାଇଁ ନିର୍ବାଚନ କମିଶନଙ୍କୁ ଧନ୍ୟବାଦ । ବିହାରରେ ଭୋଟର ତାଲିକାର ସ୍ୱତନ୍ତ୍ର ଗଭୀର ପୁନଃନିରୀକ୍ଷଣ (ଏସ୍ଆଇଆର୍) ଚାଲିଥିବାବେଳେ କଂଗ୍ରେସ ସମେତ ସମସ୍ତ ବିରୋଧୀ ଦଳ ଏହାକୁ ଜୋରଦାର ବିରୋଧ କରୁଛନ୍ତି । ଏଥିସହ ଭୋଟର ତାଲିକାରେ ଏହା ଦ୍ୱାରା ବଡ଼ଧରଣର ଜାଲିଆତି କରାଯାଉଥିବା ସେମାନେ ଅଭିଯୋଗ ଆଣିଛନ୍ତି ।
जीवन में बहुत दिलचस्प अनुभव हुए हैं,
— Rahul Gandhi (@RahulGandhi) August 13, 2025
लेकिन कभी 'मृत लोगों' के साथ चाय पीने का मौका नहीं मिला था।
इस अनोखे अनुभव के लिए, धन्यवाद चुनाव आयोग! pic.twitter.com/Rh9izqIFsD
ତାଲିକାରେ ନକଲି ନାଁ ଯୋଡ଼ା ଯାଇଥିବା, ଜୀବନ୍ତ ବ୍ୟକ୍ତିଙ୍କୁ ମୃତ କହି ସେମାନଙ୍କ ନାଁ ଭୋଟର ତାଲିକାରୁ କଟାଯାଇଥିବା ନେଇ ରାହୁଲ ଗତ ୭ ତାରିଖରେ ନିର୍ବାଚନ କମିଶନଙ୍କ ବିରୋଧରେ ଅଭିଯୋଗ ଆଣିଥିଲେ । ଉଦାହରଣ ଭାବେ ସେ କର୍ଣ୍ଣାଟକ ଭୋଟର ତାଲିକା ଦେଖାଇଥିଲେ ।
ସେୟାର କରିଥିବା ଭିଡିଓରେ ରାହୁଲ ଲୋକଙ୍କୁ କହୁଛନ୍ତି ଯେ, ଆପଣମାନେ ବଞ୍ଚିଛନ୍ତି କିନ୍ତୁ ନିର୍ବାଚନ କମିଶନ ଆପଣଙ୍କୁ ମୃତ ବୋଲି କହିଛନ୍ତି । ଜଣେ ବ୍ୟକ୍ତି କହୁଛନ୍ତି, ଏ କଥା ଭୋଟର ତାଲିକା ଆସିବା ପରେ ସେ ଜାଣିବାକୁ ପାଇଛନ୍ତି । ସେହିପରି ତାଙ୍କ ପଞ୍ଚାୟତରେ ଏପରି ୫୦ ମାମଲା ଥିବା ମଧ୍ୟ ବ୍ୟକ୍ତି ଜଣକ ଦାବି କରୁଥିବା ଏଥିରେ ଶୁଣିବାକୁ ମିଳିଛି ।
