‘ପିଏମ୍ ମୋଦୀଙ୍କୁ ମିଳୁ ରାଷ୍ଟ୍ର ପୁତ୍ର ଉପାଧି’; ଲକ୍ଷ୍ନୌର ବିଭିନ୍ନ ସ୍ଥାନରେ କିଏ ଲଗାଇଲା ପୋଷ୍ଟର ?

ଲକ୍ଷ୍ନୌ: ଉତ୍ତର ପ୍ରଦେଶର ରାଜଧାନୀ ଲକ୍ଷ୍ନୌରେ ରବିବାର ଅଜବ ଦୃଶ୍ୟ ଦେଖିବାକୁ ମିଳିଛି । ସହରର ବିଭିନ୍ନ ସ୍ଥାନରେ ଲାଗିଛି ବଡ଼ ବଡ଼ ପୋଷ୍ଟର । ଆପଣ ଭାବୁଥିବେ, ରାଜ୍ୟର ରାଜଧାନୀରେ ପୋଷ୍ଟର ଲାଗିବାର ଅସୁବିଧା କ’ଣ ? କିନ୍ତୁ ଏହି ପୋଷ୍ଟରକୁ ନେଇ ହଇଚଇ ସୃଷ୍ଟି ହୋଇଛି ।ଆଗ୍ରାର ଜଣେ ଯୁବ ନେତା ସଞ୍ଜୟ ଚୌଧୁରୀ ଲକ୍ଷ୍ନୌର ବିଭିନ୍ନ ସ୍ଥାନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ‘ରାଷ୍ଟ୍ର ପୁତ୍ର’ ଉପାଧି ଦାବି କରି ପୋଷ୍ଟର ଲଗାଇଛନ୍ତି । ଏହି ପୋଷ୍ଟରଗୁଡ଼ିକ ସୋସିଆଲ ମିଡିଆରେ ଭାଇରାଲ ହୋଇଛି । ଏହାକୁ ନେଇ ବିବାଦ ହେବା ପରେ ମଧ୍ୟ ନିଜ ଜିଦରେ ଅଟଳ ଅଛନ୍ତି ସଞ୍ଜୟ ଚୌଧୁରୀ । ସେ କହିଛନ୍ତି ଯେ, ପ୍ରଧାନମନ୍ତ୍ରୀ ଦେଶ ଏବଂ ବିଶ୍ୱରେ ସନାତନ ଧର୍ମର  ଧ୍ବଜା ଉଡ଼ାଇଛନ୍ତି।

ପ୍ରଧାନମନ୍ତ୍ରୀଙ୍କ ଫଟୋ ଏବଂ ରାଷ୍ଟ୍ର ପୁତ୍ର ଶୀର୍ଷକ ସମ୍ବଳିତ ଏହି ପୋଷ୍ଟରଗୁଡ଼ିକ ରାଜଧାନୀର ଅନେକ ସ୍ଥାନରେ ଲଗାଯାଇଛି। ସଞ୍ଜୟ ଚୌଧୁରୀ ନିଜେ ଏହା ସ୍ପଷ୍ଟ କରିଛନ୍ତି। ଯଦିଓ ଏହି ପୋଷ୍ଟରଗୁଡ଼ିକ ବିଷୟରେ ବିଜେପି ପକ୍ଷରୁ କୌଣସି ସରକାରୀ ପ୍ରତିକ୍ରିୟା ଆସିନାହିଁ, ତଥାପି ଏହା ଜାତୀୟ ଏବଂ ରାଜ୍ୟ ରାଜନୀତିରେ ଏକ ନୂଆ ବିତର୍କ ସୃଷ୍ଟି କରିଛି।

ରାଜଧାନୀ ଲକ୍ଷ୍ନୌର ବିଭିନ୍ନ ଅଞ୍ଚଳରେ ଏହି ପୋଷ୍ଟରଗୁଡ଼ିକ ଲାଗିଛି । ପୋଷ୍ଟରଗୁଡ଼ିକ ଆଗ୍ରାର ଜଣେ ଯୁବ ନେତା ସଞ୍ଜୟ ଚୌଧୁରୀ ଲଗାଇଛନ୍ତି । ତାଙ୍କର ଫଟୋ ମଧ୍ୟ ପୋଷ୍ଟର ତଳେ ଡାହାଣ ପାର୍ଶ୍ୱରେ ପ୍ରଦର୍ଶିତ ହୋଇଛି। ପୋଷ୍ଟରରେ ଲେଖା ଅଛି, ‘ଦେଶ ଓ ଦୁନିଆରେ ସନାତନ ଧର୍ମର ପତାକା ଉଡ଼ାଇଥିବା ଦେଶର ଲୋକପ୍ରିୟ ପ୍ରଧାନମନ୍ତ୍ରୀଙ୍କୁ ରାଷ୍ଟ୍ର ପୁତ୍ର ଉପାଧି ମିଳୁ ।’ପୋଷ୍ଟରରେ ପ୍ରଧାନମନ୍ତ୍ରୀ ମୋଦୀଙ୍କ ଏକ ବଡ଼ ଫଟୋ ମଧ୍ୟ ରହିଛି।

ସଞ୍ଜୟ ଚୌଧୁରୀ କହିଛନ୍ତି ଯେ, ସେ ଲକ୍ଷ୍ନୌର ଅନେକ ସ୍ଥାନରେ ଏହି ପୋଷ୍ଟର ଲଗାଇଛନ୍ତି। ସେ ଆହୁରି ମଧ୍ୟ କହିଛନ୍ତି, ‘ମୁଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପାଇଁ ରାଷ୍ଟ୍ର ପୁତ୍ର ଉପାଧି ଦାବି କରୁଛି ଏବଂ ମୁଁ ଏହି ଦାବିରେ ଅଟଳ ।’ ବିଜେପି ଭିତରେ ସଞ୍ଜୟ ଚୌଧୁରୀ କେଉଁ ପଦବୀରେ ଅଛନ୍ତି ଏବଂ ଆଗ୍ରାରେ ତାଙ୍କର କୌଣସି ଦାୟିତ୍ୱ ଅଛି କି ନାହିଁ ତାହା ସ୍ପଷ୍ଟ ହୋଇନାହିଁ।