ନୂଆ ବର୍ଷରେ ମହଙ୍ଗା ହୋଇଯିବ ରିଚାର୍ଜ ପ୍ଲାନ ! ଅନଲିମିଟେଡ୍ ପ୍ଲାନରେ ଗଣିବାକୁ ପଡ଼ିବ ଅଧିକ ୧୦୦ ଟଙ୍କା

ନୂଆଦିଲ୍ଲୀ: ମୋବାଇଲ ଉପଭୋକ୍ତାଙ୍କ ପାଇଁ ଗୁରୁତ୍ୱପୂର୍ଣ୍ଣ ଖବର। ପୁଣି ଥରେ ମହଙ୍ଗା ହୋଇପାରେ ମୋବାଇଲ୍ ରିଚାର୍ଜ ପ୍ଲାନ୍। ରିପୋର୍ଟ ଅନୁଯାୟୀ, ରିଲାଏନ୍ସ ଜିଓ, ଭାରତୀ ଏୟାରଟେଲ୍ ଏବଂ ଭୋଡାଫୋନ୍ ଆଇଡିଆ ସେମାନଙ୍କର ପ୍ରିପେଡ୍ ଏବଂ ପୋଷ୍ଟପେଡ୍ ପ୍ଲାନର ମୂଲ୍ୟ ୨୦ ପ୍ରତିଶତ ପର୍ଯ୍ୟନ୍ତ ବୃଦ୍ଧି କରିପାରନ୍ତି। କିଛି ପ୍ଲାନ ପାଇଁ ଶୁଳ୍କ ବୃଦ୍ଧି ସମ୍ପର୍କରେ କର୍ତ୍ତୃପକ୍ଷଙ୍କୁ ସୂଚିତ କରାଯାଇଛି। ଟେଲିକମ୍ କମ୍ପାନୀଗୁଡ଼ିକ ଗତ ମାସ ଧରି ସେମାନଙ୍କର ପ୍ଲାନଗୁଡ଼ିକୁ ସଂଶୋଧନ କରୁଛନ୍ତି। ଏହା ସାଧାରଣ ଉପଭୋକ୍ତାଙ୍କ ପକେଟ ଉପରେ ସିଧାସଳଖ ପ୍ରଭାବ ପକାଇବ। ବିଶେଷକରି ଯେଉଁମାନେ ୫ଜି ବ୍ୟବହାର କରୁଛନ୍ତି, ସେମାନଙ୍କ ରିଚାର୍ଜ ଯଥେଷ୍ଟ ମହଙ୍ଗା ହୋଇପାରେ।

ରିସର୍ଚ୍ଚ ଫାର୍ମ ମୋର୍ଗାନ୍ ଷ୍ଟାନଲିର ଏକ ରିପୋର୍ଟ ଅନୁଯାୟୀ, ଭାରତୀୟ ଟେଲିକମ୍ କମ୍ପାନୀଗୁଡ଼ିକ ୨୦୨୬ରେ ସେମାନଙ୍କର ଶୁଳ୍କ ୧୬ ରୁ ୨୦ ପ୍ରତିଶତ ବୃଦ୍ଧି କରିପାରନ୍ତି। ଏହା କମ୍ପାନୀଗୁଡ଼ିକର ପ୍ରତି ଉପଭୋକ୍ତାଙ୍କ ହାରାହାରି ରାଜସ୍ୱ (ARPU) ବୃଦ୍ଧି କରିବା ଲକ୍ଷ୍ୟରେ କରାଯାଇଛି। ଶେଷ ଟାରିଫ୍ ବୃଦ୍ଧି ଜୁଲାଇ ୨୦୨୪ରେ ହୋଇଥିଲା। ବର୍ତ୍ତମାନ, ଦୁଇ ବର୍ଷ ପରେ, ମୂଲ୍ୟ ପୁଣି ଥରେ ବୃଦ୍ଧି ପାଇବାକୁ ଯାଉଛି।

ୟୁଜର କ୍ରାନ୍ତି କୁମାରଙ୍କ ଦ୍ୱାରା X ରେ ସେୟାର କରାଯାଇଥିବା ଆକଳନ ଅନୁଯାୟୀ, ଏୟାରଟେଲର ୨୮ ଦିନିଆ ଅନଲିମିଟେଡ 5G ପ୍ଲାନ ୩୧୯ ଟଙ୍କାରୁ ୪୧୯ ଟଙ୍କାକୁ ବୃଦ୍ଧି ପାଇପାରେ। ସେହିପରି ଜିଓର ୨୯୯ ପ୍ଲାନ୍ 1.5GB ଦୈନିକ ଡାଟା ସହିତ ୩୫୯ ଟଙ୍କାରେ ପହଞ୍ଚିପାରେ। ଏହା ସହିତ, 28 ଦିନିଆ 5G ପ୍ଲାନ ୩୪୯ରୁ ୪୨୯ ଟଙ୍କାକୁ ବୃଦ୍ଧି ପାଇପାରେ। ଏହାର ଅର୍ଥ ହେଉଛି ୟୁଜର୍ସମାନଙ୍କୁ ପ୍ରତି ମାସରେ ୮୦ରୁ ୧୦୦ଟଙ୍କା ଅଧିକ ଖର୍ଚ୍ଚ କରିବାକୁ ପଡ଼ିପାରେ।

Vodafone Idea ୟୁଜର୍ସଙ୍କୁ ମଧ୍ୟ କୌଣସି ଆଶ୍ୱସ୍ତି ମିଳିବ ନାହିଁ। ରିପୋର୍ଟ ଅନୁଯାୟୀ, Viର ୨୮ ଦିନିଆ 1GB ଦୈନିକ ଡାଟା ପ୍ଲାନ୍ ₹340 ରୁ ₹419 କୁ ବୃଦ୍ଧି ପାଇପାରେ। ଏହି ସମୟରେ, ୫୬ ଦିନର ବୈଧତା ସହିତ 2GB ଦୈନିକ ଡାଟା ପ୍ଲାନ୍ ₹579 ରୁ ₹699 କୁ ବୃଦ୍ଧି ପାଇପାରେ।