ନୂଆଦିଲ୍ଲୀ: ମାର୍ଚ୍ଚ ୮ ତାରିଖ ଆନ୍ତର୍ଜାତିକ ମହିଳା ଦିବସ । ଏହି ସ୍ବତନ୍ତ୍ର ଦିନରେ ଦିଲ୍ଲୀ କେନ୍ଦ୍ର ଶାସିତ ପ୍ରଦେଶରେ ମହିଳାଙ୍କ ଅପେକ୍ଷାର ଅନ୍ତ ଘଟିବ । ନିର୍ବାଚନୀ ପ୍ରତିଶ୍ରୁତି ପାଳନ କରିବାକୁ ଯାଉଛନ୍ତି ରେଖା ଗୁପ୍ତା ସରକାର । ରାଜଧାନୀର ମହିଳାଙ୍କୁ ଆର୍ଥିକ୍ ସହୟତା ପ୍ରଦାନ କରାଯିବ । ପ୍ରତି ମାସରେ ମହିଳାଙ୍କୁ ୨୫୦୦ ଟଙ୍କା ଲେଖାଏଁ ଦେବାକୁ ଯୋଜନା କରିଛନ୍ତି ସରକାର । ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡାଙ୍କ ଉପସ୍ଥିତିରେ ଦିଲ୍ଲୀ ସରକାର 'ମହିଳା ସମୃଦ୍ଧି ଯୋଜନା'କୁ ଘୋଷଣା କରିବେ । ପଞ୍ଜୀକରଣ ପରେ ୨୧ରୁ ୬୦ ବର୍ଷ ମହିଳାଙ୍କୁ ଏହି ଅର୍ଥରାଶି ମିଳିବ ।
ସୂଚନା ଅନୁଯାୟୀ, ଦିଲ୍ଲୀ କେନ୍ଦ୍ର ଶାସିତ ପ୍ରଦେଶରେ ଆର୍ଥିକ୍ ଭାବେ ଅନଗ୍ରସର ମହିଳାଙ୍କୁ 'ମହିଳା ସମୃଦ୍ଧି ଯୋଜନା'ରେ ସହାୟତା ପ୍ରଦାନ କରାଯିବ । ଏଥିରେ ପ୍ରତି ମାସରେ ଯୋଗ୍ୟ ହିତାଧିକାରୀଙ୍କୁ ୨୫ଶହ ଟଙ୍କା ଲେଖାଏଁ ମିଳିବ । ଦିଲ୍ଲୀ ବିଧାନସଭା ନିର୍ବାଚନ ପ୍ରଚାର ବେଳେ ମହିଳାଙ୍କୁ ସହାୟତା ପ୍ରଦାନ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଘୋଷଣା କରିଥିଲେ । ପରେ ମାର୍ଚ୍ଚ ୮ ତାରିଖରେ ଯୋଜନାର ଶୁଭାରମ୍ଭ ହେବ ବୋଲି କୁହାଯାଇଥିଲା । ତେବେ ଆଜିଠୁ ମହିଳା ସମୃଦ୍ଧି ଯୋଜନାରପଞ୍ଜୀକରଣ ଆରମ୍ଭ ହେବ । ଏହାପରେ ସର୍ଟ ଲିଷ୍ଟ କରାଯାଇ ମହିଳାଙ୍କୁ ବ୍ୟାଙ୍କ୍ ଖାତାକୁ ଡିବିଟି ମାଧ୍ୟମରେ ପ୍ରତିମାସରେ ୨୫ଶହ ଟଙ୍କା ଲେଖାଏଁ ପ୍ରଦାନ କରାଯିବ ।
ମହିଳା ସମୃଦ୍ଧ ଯୋଜନାର ଶୁଭାରମ୍ଭ ପାଇଁ ଶନିବାର ଆନ୍ତର୍ଜାତୀୟ ମହିଳା ଦିବସରେ ଏକ ସ୍ବତନ୍ତ୍ର ସମାବେଶ ଆୟୋଜନ ହୋଇଛି । ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡାଙ୍କ ଉପସ୍ଥିତିରେ ଏହାର ଶୁଭାରମ୍ଭ ହେବ । ଏହାପୂର୍ବରୁ ଦିଲ୍ଲୀ ସରକାରଙ୍କ କ୍ୟାବିନେଟ୍ ବୈଠକ ବସିବ । ଏହି ମିଟିଂରେ ମହିଳା ସମୃଦ୍ଧି ଯୋଜନାକୁ ମଞ୍ଜୁରି ପାଇଁ ଆଗତ କରାଯିବ । କ୍ୟାବିନେଟର ଗ୍ରୀନ୍ ସିଗନାଲ୍ ମିଳିବା ପରେ ଯୋଜନାକୁ ନେଇ ବିଜ୍ଞପ୍ତି ପ୍ରକାଶ ପାଇବ । ପଞ୍ଜୀକରଣ ପରେ ଯୋଗ୍ୟ ମହିଳାଙ୍କୁ ପ୍ରତିମାସରେ ୨୫ ଶହ ଟଙ୍କା ଲେଖାଏଁ ପ୍ରଦାନ କରାଯିବ ।...
