ଦ୍ୱିତୀୟ ବିବାହ କରି ଫସିଗଲେ ଜେଲ୍ ଓ୍ବାର୍ଡର : ପ୍ରଥମ ପତ୍ନୀଙ୍କ ଅଭିଯୋଗ ପରେ ଦେଢ଼ ବର୍ଷ ଫେରାର, ଏବେ ଗିରଫ

ଢେଙ୍କାନାଳ ୫।୧୨: ପ୍ରଥମ ପତ୍ନୀ ଥାଉ ଥାଉ ପୁଣି ଅନ୍ୟ ଜଣଙ୍କୁ ପ୍ରେମ ବିବାହ । ନିଜ ପତ୍ନୀର ପରିଚୟ ଦେଇ ସରକାରୀ କ୍ୱାର୍ଟରରେ ରଖିଥିଲେ ଦ୍ୱିତୀୟ ପତ୍ନୀଙ୍କୁ । ଜଣେ ସରକାରୀ କର୍ମଚାରୀ ହୋଇ ସରକାରଙ୍କୁ ଠକି ଚାଲିଥିବା ବେଳେ ଆଇନ ଜାଲରେ ଫସିଛନ୍ତି ସରକାରୀ କର୍ମଚାରୀ । ପୋଲିସ ଗିରଫ କରି କୋର୍ଟ ଚାଲାଣ କରିଥିବା ବେଳେ ଜାମିନ ଖାରଜ ଯୋଗୁଁ ଝାରପଡା ଜେଲକୁ ଯାଇଛନ୍ତି ।

ସୂଚନାଯୋଗ୍ୟ ଯେ, ଢେଙ୍କାନାଳ ଜିଲ୍ଲା ହିନ୍ଦୋଳ ଉପ କାରଗାରର ୱାର୍ଡର ବିଜୟ କୁମାର ରାଉତ ପ୍ରଥମ ପତ୍ନୀ ଥାଉ ଥାଉ ଦ୍ବିତୀୟ ବିବାହ କରି ଗିରଫ ହୋଇଛନ୍ତି । ବିଜୟଙ୍କ ଘର ଆଠଗଡ଼ ଥାନା ଅନ୍ତର୍ଗତ ସାମ୍ ସେରପୁର ଗ୍ରାମରେ । ବୈଦିକ ରୀତିରେ ବିଜୟ ପ୍ରଥମ ବିବାହ କରିସାରିଥିଲେ । ମାତ୍ର ଅନ୍ୟ ଜଣେ ଯୁବତୀଙ୍କ ସହିତ ତାଙ୍କର ପ୍ରେମ ସମ୍ପର୍କ ଥିଲା । ପରେ ତାଙ୍କୁ ଲୁଚି ଛପି ବିବାହ କରିଥିଲେ । ଏପରିକି ନିଜ ପ୍ରଥମ ପତ୍ନୀ ଥାଉ ଥାଉ ବିଜୟ ଦ୍ୱିତୀୟ ପତ୍ନୀ ପରିଚୟ ଦେଇ ହିନ୍ଦୋଳ ଉପ କାରାଗାର ସରକାରୀ କ୍ୱାର୍ଟରରେ ନେଇ ରଖିଥିଲେ । ତେବେ ପ୍ରଥମ ପତ୍ନୀ ନ୍ୟାୟ ପାଇଁ ଏ ସମ୍ପର୍କରେ ଖୋର୍ଦ୍ଧା ଫ୍ୟାମିଲି କୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଏହା ପରେ ବିଜୟ ୨୦୨୪ ମସିହା ଜୁନ୍ ୬ ତାରିଖରୁ କେଉଁ ଆଡେ ଫେରାର ହୋଇଯାଇଥିଲେ । ତେବେ କୋର୍ଟ ଜାମିନ ବିହୀନ ପରୱାନା ଜାରି କରିଥିବାରୁ ପୋଲିସ ତାଙ୍କୁ ଖୋଜୁଥିଲା । ତେବେ ବିଶେଷ ସୂତ୍ରରୁ ଖବର ପାଇ ଆଠଗଡ଼ ଅଞ୍ଚଳରେ ବିଜୟଙ୍କୁ ପୋଲିସ କାବୁ କରିଛି । ପରେ ଖୋର୍ଦ୍ଧା ଫ୍ୟାମିଲି କୋର୍ଟଙ୍କୁ ଚାଲାଣ ପରେ ଜାମିନ ଖାରଜ ହେବାରୁ ବିଜୟଙ୍କୁ ଝାରପଡା ଜେଲକୁ ପଠାଇ ଦିଆଯାଇଥିବା ଜଣାପଡିଛି ।