ନୂଆଦିଲ୍ଲୀ: ଭାରତୀୟ ସେୟାର ବଜାର ବୁଧବାର ପୁଣି ଥରେ ଲାଲ୍ ସଂକେତରେ ବନ୍ଦ ହୋଇଛି । ସେନ୍ସେକ୍ସ ପ୍ରାୟ ୪୦୦ ଅଙ୍କ ଖସି ବନ୍ଦ ହୋଇଛି । ଅନ୍ୟପଟେ ନିଫ୍ଟି ହ୍ରାସ ପାଇ ୨୨,୪୦୦ ତଳେ ବନ୍ଦ ହୋଇଛି । ଆଇଟି, ମେଟାଲ୍, ଫାର୍ମା ଓ ପିଏସୟୁ ବ୍ୟାଙ୍କର ସେୟାର ମୂଲ୍ୟରେ ବଡ଼ ଧରଣ ହ୍ରାସ ଦେଖିବାକୁ ମିଳିଛି । ଏହି କାରଣରୁ ନିବେଶକଙ୍କୁ ଆଜି ପ୍ରାୟ ଅଢେଇ ଲକ୍ଷ କୋଟି ଟଙ୍କା କ୍ଷତି ହୋଇଛି । ବିଏସଇ ମିଡ୍କ୍ୟାପ୍ ଓ ସ୍ମଲକ୍ୟାପ୍ ଇଣ୍ଡେକ୍ସ ବି ୧ ପ୍ରତିଶତରୁ ଅଧିକ ଖସି ବନ୍ଦ ହୋଇଛି ।
ଆଜିର କାରବାର ଶେଷରେ ବିଏସ୍ଇ ସେନ୍ସେକ୍ସ ୩୭୯.୯୩ ଅଙ୍କ ବା ୦.୫୧ ପ୍ରତିଶତ ହ୍ରାସ ପାଇ ୭୩,୮୪୭.୧୫ ସ୍ତରରେ ବନ୍ଦ ହୋଇଛି । ଅନ୍ୟପଟେ ଏନ୍ଏସ୍ଇର ୫୦ ସେୟାର ବିଶିଷ୍ଟ ସୂଚକାଙ୍କ ନିଫ୍ଟି ୧୩୬.୭୦ ଅଙ୍କ ବା ୦.୬୧ ପ୍ରତିଶତ ହ୍ରାସ ପାଇ ୨୨,୩୯୯.୧୫ ସ୍ତରରେ ବନ୍ଦ ହୋଇଛି ।
ବିଏସ୍ଇରେ ସୂଚୀବଦ୍ଧ କମ୍ପାନିଗୁଡ଼ିକର ମୋଟ ମାର୍କେଟ୍ କ୍ୟାପ୍ ଆଜି ହ୍ରାସ ପାଇ ୩୯୩.୯୬ ଲକ୍ଷ କୋଟି ଟଙ୍କା ହୋଇଛି । ପୂର୍ବ କାରବାର ଦିନ ଅର୍ଥାତ୍ ଏପ୍ରିଲ୍ ୮ରେ ୩୯୬.୫୭ ଲକ୍ଷ କୋଟି ଟଙ୍କା ଥିଲା । ଏହିପରି ବିଏସ୍ଇରେ ସୂଚୀବଦ୍ଧ କମ୍ପାନିର ମାର୍କେଟ୍ କ୍ୟାପ୍ ଆଜି ପ୍ରାୟ ୨.୬୧ ଲକ୍ଷ କୋଟି ଟଙ୍କା ହ୍ରାସ ପାଇଛି । ଅନ୍ୟ ଶବ୍ଦରେ କହିବାକୁ ଗଲେ ନିବେଶକଙ୍କୁ ଆଜି ପ୍ରାୟ ୨.୬୧ ଲକ୍ଷ କୋଟି ଟଙ୍କା କ୍ଷତି ହୋଇଛି । ବିଏସ୍ଇ ସେନ୍ସେକ୍ସର ୩୦ ମଧ୍ୟରୁ ୧୩ ସେୟାର ଆଜି ସବୁଜ ସଂକେତରେ ବନ୍ଦ ହୋଇଛି । ଏଥିରେ ନେସଲେ୍ ଇଣ୍ଡିଆର ସେୟାରରେ ସବୁଠୁ ଅଧିକ ୩.୨୪ ପ୍ରତିଶତ ବୃଦ୍ଧି ଘଟିଛି । ଏସ୍ବିଆଇ ସେୟାରରେ ସବୁଠୁ ଅଧିକ ୩.୪୦ ପ୍ରତିଶତ ହ୍ରାସ ରେକର୍ଡ କରାଯାଇଛି ।
