ପିପିଲି ୧୧/୪: ବିଳମ୍ବିତ ରାତିରେ ଫୁଟିଲା ବୋମା । ମେଲଣରେ ବଚସାକୁ ନେଇ ବୋମା ମାଡ଼ । ବଡ ଭାଇର ବୋମା ମାଡରେ ସାନ ଭାଇ ଗୁରୁତର । ୩ଜଣ ଆହତ ହୋଇଛନ୍ତି । ଆହତଙ୍କ ଜଣେ ମଧ୍ୟରେ ୧୨ ବର୍ଷର ନାବାଳକ ଅଛନ୍ତି । ନାବାଳକ ଚନ୍ଦନ ନାୟକଙ୍କ ଡାହାଣ ଗୋଡ ପାଦରେ ଲାଗିଛି ଗଭୀର ଆଘାତ ।
ପିପିଲି ଜମାଲପୁର ମେଲଣ ପଡିଆ ନିକଟର ଗଣ୍ଡଗୋଳ। ବୁଧବାର ବିଳମ୍ବିତ ରାତିରେ ଜମାଲପୁର ଗାଁରେ ଯାତ୍ରା ହେଉଥିଲା । ତେବେ କାଳବୈଶାଖୀ ଜନିତ ବର୍ଷା ଯୋଗୁ ଲୋକେ ଅଧିକ ସମୟ ନରହି ଯିଏ ଯାହାର ଘରକୁ ପଳାଇଥିଲେ । ତେବେ ବିଳମ୍ବିତ ରାତି ପ୍ରାୟ ୨ଟାରୁ ୩ଟା ଭିତରେ ବୋମା ଫୁଟିବାର ଶବ୍ଦ ହୋଇଥିଲା । ୨ଭାଇଙ୍କ ମଧ୍ୟରେ ବଚସାରୁ ବୋମା ମାଡ ହୋଇଥିବା କୁହାଯାଉଛି ।
ବଡ ଭାଇଙ୍କ ବୋମା ମାଡରେ ସାନ ଭାଇ ରାଜକିଶୋର ଗୁରୁତର ହୋଇପଡିଥିଲେ । ତାଙ୍କୁ ଭୁବନେଶ୍ବର ସ୍ଥିତ ଏକ ଘରୋଇ ମେଡିକାଲରେ ଭର୍ତ୍ତି କରାଯାଇଛି । ଖବର ପାଇ ଜମାଲପୁର ଗାଁରେ ପହଞ୍ଚିଥିଲା ପିପିଲି ପୋଲିସ । ଘଟଣାସ୍ଥଳରୁ ଅଫୁଟା ବୋମା ଜବତ କରି ନିଷ୍କ୍ରିୟ କରାଯାଇଛି । ଘଟଣାର ଛାନ୍ଭିନ୍ ଚାଲିଛି । ତଦନ୍ତ ପରେ ସବୁକିଛି ସ୍ପଷ୍ଟ ହେବ ବୋଲି କହିଛନ୍ତି ପିପିଲି ଆଇଆଇସି ।
