ନୂଆଦିଲ୍ଲୀ: ବଲିଉଡ୍ ଅଭିନେତ୍ରୀ କଙ୍ଗନା ରଣାୱତ ମଙ୍ଗଳବାର ହିମାଚଳ ପ୍ରଦେଶର ମଣ୍ଡି ଲୋକସଭା ଆସନରୁ ବିଜେପି ପ୍ରାର୍ଥୀ ରୂପେ ନିଜ ନାମାଙ୍କନ ଦାଖଲ କରିଛନ୍ତି । ପ୍ରଥମ ଥର ରାଜନୀତିରେ ନିଜ ଭାଗ୍ୟ ପରୀକ୍ଷା କରିବାକୁ ଯାଉଥିବା କଙ୍ଗନାଙ୍କ ପାଖରେ ୯୧ କୋଟି ଟଙ୍କାରୁ ଅଧିକ ସମ୍ପତ୍ତି ରହିଛି । ନିର୍ବାଚନୀ ସତ୍ୟପାଠରେ କଙ୍ଗନା ନିଜର ଚଳ ଏବଂ ଅଚଳ ସମ୍ପତ୍ତି ୯୧ କୋଟି ୬୬ ଲକ୍ଷ ଟଙ୍କା ଥିବା ଦର୍ଶାଇଛନ୍ତି । ଏଥିରେ ଚଳ ସମ୍ପତ୍ତି ୨୮.୭୩ କୋଟି ଟଙ୍କା ଏବଂ ଅଚଳ ସମ୍ପତ୍ତି ୬୨.୯୨ କୋଟି ଟଙ୍କା ରହିଛି । କଙ୍ଗନାଙ୍କ ଉପରେ ୧୭.୩୮ କୋଟି ଟଙ୍କା ଋଣ ରହିଛି ।
କଙ୍ଗନା ରଣାୱତ ଲଗଜରୀ ଗାଡ଼ିର ସଉକ ମଧ୍ୟ ରଖନ୍ତି । ତାଙ୍କ ପାଖରେ ଦୁଇଟି ମର୍ସିଡିଜ୍ ଏବଂ ଗୋଟିଏ ବିଏମଡବ୍ଲୁ ସମେତ ଚାରି ଗାଡ଼ି ରହିଛି । ଏଥିରେ ୩.୯୧ କୋଟି ଏବଂ ୫୮.୬୫ ଲକ୍ଷ ଟଙ୍କାର ମର୍ସିଡିଜ୍ ଏବଂ ୯୮.୨୫ ଲକ୍ଷ ଟଙ୍କାର ବିଏମଡବ୍ଲୁ ଗାଡ଼ି ରହିଛି । କଙ୍ଗନାଙ୍କ ୮ଟି ବ୍ୟାଙ୍କ ଆକାଉଣ୍ଟ ଏବଂ ୫୦ ଏଲଆଇସି ପଲିସି ଅଛି । କଙ୍ଗନା ସେୟାର ମାର୍କେଟରେ ପ୍ରାୟ ଏକ କୋଟି ୨୧ ଲକ୍ଷ ଟଙ୍କା ନିବେଶ କରିଛନ୍ତି । ସେ ଫିଲ୍ମ କମ୍ପାନି ସମେତ ୧୧ ଜଣଙ୍କୁ ପର୍ସନାଲ୍ ଲୋନ୍ ମଧ୍ୟ ଦେଇଛନ୍ତି ।
ପଢନ୍ତୁ: କୁଇନଙ୍କ ବଡ ଘୋଷଣା: କହିଲେ ମୁଁ ଯଦି ନିର୍ବାଚନ ଜିତିବି ତେବେ ଛାଡିଦେବି ବଲିଉଡ !
କଙ୍ଗନାଙ୍କ ପାଖରେ ୬ କେଜିରୁ ଅଧିକ ସୁନା ଅଳଙ୍କାର ଅଛି, ଯାହାର ମୂଲ୍ୟ ପ୍ରାୟ ୫ କୋଟି ଟଙ୍କା । ତାଙ୍କ ପାଖରେ ୬୦ କେଜି ଟଙ୍କାର ରୁପା ଅଳଙ୍କାର ଅଛି, ଯାହାର ମୂଲ୍ୟ ୫୦ ଲକ୍ଷ ଟଙ୍କା । ଏହା ବ୍ୟତୀତ କଙ୍ଗନାଙ୍କ ପାଖରେ ୩ କୋଟି ଟଙ୍କାର ହୀରା ମଧ୍ୟ ରହିଛି । ତାଙ୍କ ପାଖରେ ୨ ଲକ୍ଷ ଟଙ୍କାର ନଗଦ ରାଶି ରହିଛି । କଙ୍ଗନାଙ୍କ ପାଖରେ ଚଣ୍ଡିଗଡ଼ର ଜୀରକପୁରରେ ଚାରି, କୁଲ୍ଲୁର ମନାଲୀ ଏବଂ ମହାରାଷ୍ଟ୍ରର ବାନ୍ଦ୍ରାରେ ଏକ ଆପାର୍ଟମେଣ୍ଟ ଅଛି । ବାନ୍ଦ୍ରାର ଆପାର୍ଟମେଣ୍ଟର ମୂଲ୍ୟ ୨୩.୯୮ କୋଟି ଟଙ୍କା ଏବଂ ମନାଲୀ ଆପାର୍ଟମେଣ୍ଟର ମୂଲ୍ୟ ୪.୯୭ କୋଟି ଟଙ୍କା ।
କଙ୍ଗନାଙ୍କ ବିରୋଧରେ ମହାରାଷ୍ଟ୍ରର ମୁମ୍ୱାଇ ସ୍ଥିତ ଦୁଇଟି ପୋଲିସ ଥାନାରେ ୩ ମାମଲା ଅଛି । ଏଥିରୁ ଦୁଇଟି ମାମଲା ମାନହାନୀ ଏବଂ ଗୋଟିଏ କପିରାଇଟ୍ ଏବଂ ଧାର୍ମିକ ଭାବନାକୁ ଆଘାତ ଦେବା ଅଭିଯୋଗ ରହିଛି । ତେବେ କଙ୍ଗନା କୌଣସି ମାମଲାରେ ଦୋଷୀ ସାବ୍ୟସ୍ତ ହୋଇ ନାହାନ୍ତି । ୩୭ ବର୍ଷୀୟ କଙ୍ଗନା ଦ୍ୱାଦଶ ଯାଏ ପଢିଛନ୍ତି । ସେ ୨୦୦୩ରେ ଡିଏଭି ମଡ୍ୟୁଲ୍ ସ୍କୁଲ୍ ଚଣ୍ଡିଗଡ଼ରେ ଦ୍ୱାଦଶରୁ ଉତ୍ତୀର୍ଣ୍ଣ ହୋଇଥିଲେ ।
