ଭୁବନେଶ୍ବର: ସୁନ୍ଦରଗଡ଼ ବିଧାୟକ ଯୋଗେଶ ସିଂଙ୍କୁ ପୋଲିସ ଅଟକ ରଖିବା ଘଟଣାକୁ ନିନ୍ଦା କରିଛି ବିଜେଡି। ଶନିବାର ଶଙ୍ଖ ଭବନଠାରେ ଆୟୋଜିତ ସାମ୍ବାଦିକ ସମ୍ମିଳନୀରେ ଦଳର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ସଂଜୟ ଦାସବର୍ମା ଏହି ଘଟଣାର ତୀବ୍ର ନିନ୍ଦା କରିଛନ୍ତି । ସେ କହିଛନ୍ତି ବିଧାୟକ ଯୋଗେଶ ସିଂ ଓ ଶତାଧିକ ଗ୍ରାମବାସୀଙ୍କୁ ପୋଲିସ ବେଆଇନ ଭାବେ ଅଟକ ରଖି ତରବରିଆ ଭାବେ କରୁଥିବା ଏହି ନିର୍ମାଣ କାର୍ଯ୍ୟ ତୁରନ୍ତ ବନ୍ଦ କରିବାକୁ ଦାବି କରିଛନ୍ତି।
ପ୍ରେସମିଟରେ ସଞ୍ଜୟ ଦାସ ବର୍ମା ଆହୁରି କହିଛନ୍ତି, ଗଣତାନ୍ତ୍ରିକ ଆନ୍ଦୋଳନକୁ ଚପାଇ ଦେବା ଲାଗି ଉଦ୍ୟମ ହେଉଛି। ସୁନ୍ଦରଗଡ଼ର ବିଧାୟକ ଗୋଟିଏ ଆଦିବାସୀ ଗାଁର ଲୋକଙ୍କ ସ୍ୱାର୍ଥକୁ ନେଇ ଲଢ଼ୁଥିଲେ। ହେଲେ ତାଙ୍କୁ ପୋଲିସ ଅଟକ ରଖିଛି। ତାକୁ ଆମେ ନିନ୍ଦା କରୁଛୁ। ବରପାଲ୍ଲୀ ଗାଁରୁ ୩୦୦ ମିଟର ଦୂରରେ ଏକ ରେଲୱେ ସାଇଡିଙ୍ଗ ତିଆରି କରିବାକୁ ଯୋଜନା ହୋଇଛି। ସରକାରଙ୍କ ଜନ ବିରୋଧୀ ନିଷ୍ପତ୍ତି ବିରୋଧରେ ଯୋଗେଶ ସିଂ ଲୋକଙ୍କ ପାଇଁ ଲଢ଼େଇ କରୁଛନ୍ତି। ବିଧାୟକ ପୂର୍ବରୁ ଏନେଇ ଜିଲ୍ଲା ପ୍ରଶାସନକୁ ଜଣାଇଛନ୍ତି।
ହେଲେ ଲୋକଙ୍କ ଆନ୍ଦୋଳନ ପ୍ରତିବାଦକୁ ଜିଲା ପ୍ରଶାସନ ଚାପିବାକୁ ବ୍ୟବସ୍ଥା କରାଯାଇଛି। ପ୍ରଶାସନ ଆତଙ୍କରାଜ ଚଳାଇଛି। ରେଲୱେ ସାଇଡିଙ୍ଗ ହେଲେ ଏହାର କୁପ୍ରଭାବ ପଡ଼ିବ। ଶିକ୍ଷାନୁଷ୍ଠାନରେ ଏହାର କୁପ୍ରଭାବ ପଡିବ। ଆଇନଗତ ପ୍ରକ୍ରିୟା ଜାରି ରହିଛି। ଜନସାଧାରଣଙ୍କ ବିରୋଧରେ ଏପରି ନିଷ୍ପତ୍ତି କେତେ ଯୁକ୍ତି ସଂଗତ ବୋଲି ପ୍ରଶ୍ନ କରିଛନ୍ତି ବିଜେଡି ନେତା। ଖଣି ମାଫିଆଙ୍କ ହାତ ବାରିସୀ ସାଜି ଜିଲ୍ଲା ପ୍ରଶାସନ କାମ କରୁଛି ଚାଲିଛି। ତେଣୁ କାମ ତୁରନ୍ତ ବନ୍ଦ ହେବା ଉଚିତ। ଆଉ ଯଦି ଆଗାମୀ ଦିନରେ କାମ ବନ୍ଦ ନହେବ ତେବେ ବିଜେଡି ଦୃଢ଼ ପଦକ୍ଷେପ ନେବ ବୋଲି କହିଛନ୍ତି ସଞ୍ଜୟ ଦାସବର୍ମା।
ସୂଚନାଥାଉକି, ହେମଗିରି କୋଇଲା ସାଇଡିଂ ନିକଟରେ ବିଧାୟକ ଯୋଗେଶ ସିଂଙ୍କ ନେତୃତ୍ବରେ ଆନ୍ଦୋଳନ ଚାଲିଥିଲା। ବେଆଇନ ରେଲୱେ ସାଇଡିଂ ଚାଲିଥିବା ଅଭିଯୋଗରେ ବିଧାୟକଙ୍କ ଶତାଧିକ ଆନ୍ଦୋଳନକାରୀ ଆନ୍ଦୋଳନ କରୁଥିଲେ। ମାତ୍ର ବିଧାୟକଙ୍କ ସମେତ ଦେଢ଼ ଶହ ଆନ୍ଦୋଳନକାରୀଙ୍କୁ ଉଠାଇ ନେଇଛି।
