କମିଯାଉଛି ଶ୍ରେୟସ ଆୟାରଙ୍କ ଓଜନ, ନ୍ୟୁଜିଲାଣ୍ଡ ବିପକ୍ଷ ସିରିଜରେ ମିଳିବନି ଚାନ୍ସ !

ନୂଆଦିଲ୍ଲୀ, ୩୧/୧୨ : ନ୍ୟୁଜିଲାଣ୍ଡ ବିପକ୍ଷ ଦିନିକିଆ ସିରିଜକୁ ଫେରିବେନି ଶ୍ରେୟସ ଆୟର । ଆହତ ଜନିତ ସମସ୍ୟାରୁ ସେ ସମ୍ପୂର୍ଣ୍ଣ ଭାବେ ବାହାରି ପାରି ନାହାଁନ୍ତି । ଅଷ୍ଟ୍ରେଲିଆ ବିପକ୍ଷ ଏକ ମୁକାବିଲାରେ ସେ କ୍ୟାଚ୍ ନେବା ବେଳେ ଆହତ ହୋଇଥିଲେ । ତାଙ୍କ ଛାତିରେ ଯନ୍ତ୍ରଣା ହୋଇଥିଲା ।

କୁହାଯାଉଛି ଯେ, ଶ୍ରେୟସ ସମ୍ପୂର୍ଣ୍ଣ ଭାବେ ଫିଟ୍ ହୋଇ ନାହାଁନ୍ତି । ତେଣୁ ଜାନୁଆରୀ ୧୧ରୁ ନ୍ୟୁଜିଲାଣ୍ଡ ବିପକ୍ଷରେ ଆରମ୍ଭ ହେବାକୁ ଥିବା ଦିନିକିଆ ସିରିଜରେ ତାଙ୍କୁ ବିସିସିଆଇ କ୍ଲିନ୍ ଚିଟ୍ ପ୍ରଦାନ କରିନାହିଁ । ସେ ଏବେ ବ୍ୟାଟିଂ କରିପାରିବେ କିନ୍ତୁ ଅଧିକ ସମୟ ଯାଏଁ ଖେଳିପାରିବେ ନାହିଁ ।

ମିଡିଆ ରିପୋର୍ଟ ଅନୁସାରେ, ଶ୍ରେୟସ ଆହତ ହେଲା ପରେ ଦ୍ରୁତ ଗତିରେ ତାଙ୍କର ଓଜନ ହ୍ରାସ ପାଉଛି । ତାଙ୍କର ତିନି ମାସ ମଧ୍ୟରେ ୬ କେଜି ଓଜନ କମିଛି । ଏହାପୂର୍ବରୁ ବିଜୟ ହଜାରେ ଟ୍ରଫିର କିଛି ମୁକାବିଲା ଖେଳିବା ନେଇ ଖବର ଆସିଥିଲା । ମୁମ୍ବାଇ ପାଇଁ ସେ ଜାନୁଆରୀ ୩ରୁ ୬ ଯାଏଁ ମୁକାବିଲା ଖେଳିଥାନ୍ତେ ।

ବିସିସିଆଇ କହିଛି ଯେ, ଶ୍ରେୟସ ୫୦ ଓଭର ମୁକାବିଲା ପାଇଁ ସେତେଟା ଫିଟ୍ ନାହାଁନ୍ତି । ସେ ନିଜର ସମସ୍ତ ଶକ୍ତି ମ୍ୟାଚରେ ଦେଇପାରିବେ ନାହିଁ । ଚଳିତ ସପ୍ତାହରେ ସେ ଅଭ୍ୟାସ ଆରମ୍ଭ କରିଛନ୍ତି । ସେ ଧିରେ ଧିରେ ସୁସ୍ଥ ହେଉଛନ୍ତି । କିନ୍ତୁ ଏବେବି ଆଉ କିଛି ସମୟ ଲାଗିବ । ବିଜୟ ହଜାରେ ଟ୍ରଫିରେ ସେ ଖେଳିବେ ନା ନାହିଁ ସେନେଇ ଆଗକୁ ନିଷ୍ପତ୍ତି ନିଆଯିବ ।

ସୂଚନାଯୋଗ୍ୟ, ଆଲେକ୍ସ କେରୀଙ୍କ କ୍ୟାଚକୁ ଡାଇଭ୍ କରି ଧରିବା ବେଳେ ଶ୍ରେୟରଙ୍କ ଛାତି ଭିତରେ ଆଘାତ ଲାଗିଥିଲା । ତାଙ୍କର ସାମାନ୍ୟ ଅପରେସନ ମଧ୍ୟ ହୋଇଥିଲା । ରକ୍ତସ୍ରାବ ବନ୍ଦ ନହେଉଥିବାରୁ ତୁରନ୍ତ ଆଇସିୟୁରେ ଭର୍ତ୍ତି କରାଯାଇଥିଲା । ଏବେ ସେ ସୁସ୍ଥ ଅଛନ୍ତି । ପୁଣି ଥରେ କ୍ରିଜକୁ ଫେରିବା ପାଇଁ ଜୋରଦାର ଅଭ୍ୟାସ କରୁଛନ୍ତି ।