ନୂଆଦିଲ୍ଲୀ: ନିକଟରେ ଆଇସିଆଇସିଆଇ ବ୍ୟାଙ୍କ ସର୍ବନିମ୍ନ ଜମା ରାଶିକୁ ୫୦ ହଜାର ଟଙ୍କାକୁ ବୃଦ୍ଧି କରିଛି। ଅର୍ଥାତ୍ ସେଭିଂ ଆକାଉଣ୍ଟ ଧାରି ନିଜ ଖାତରେ ୫୦ ହଜାର ଟଙ୍କା ତଳକୁ ରଖିପାରିବେ ନାହିଁ। ବ୍ୟାଙ୍କର ଏଭଳି ନିର୍ଦ୍ଦେଶ ପରେ ଗ୍ରାହକଙ୍କ ମଧ୍ୟରେ ଚିନ୍ତା ବଢ଼ି ଯାଇଛି। ଏନେଇ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ଗଭର୍ଣ୍ଣର ସଞ୍ଜୟ ମଲୋହତ୍ରାଙ୍କୁ ପଚରାଯାଇଥିଲା। ତେବେ ଗଭର୍ଣ୍ଣରଙ୍କ ପ୍ରତିକ୍ରିୟା ଗ୍ରାହକଙ୍କ ଚିନ୍ତା କମାଇବା ବଦଳରେ ଆହୁରି ବଢ଼ାଇ ଦେଇଛନ୍ତି।
ଗଭର୍ଣ୍ଣ କହିଛନ୍ତି ଯେ ବ୍ୟାଙ୍କ ସର୍ବନିମ୍ନ ଜମାରାଶି କେତେ ରଖିବେ ଏହା ତାଙ୍କ ଉପରେ ନିର୍ଭର କରେ। ଏନେଇ ବ୍ୟାଙ୍କଗୁଡ଼ିକର ସବୁ ଅଧିକାର ରହିଛି। ଏହା ଉପରେ କଟକଣା ଲଗାଇବାକୁ କୌଣସି ନିୟମ ନାହିଁ ବୋଲି ମଲହୋତ୍ରା କହିଛନ୍ତି। ସଞ୍ଚୟ ଆକାଉଣ୍ଟ ପାଇଁ ସର୍ବନିମ୍ନ ବାଲାନ୍ସ ଆବଶ୍ୟକତା ନିୟାମକ ତଦାରଖ ଅଧୀନରେ ନାହିଁ ଏବଂ ଏହା ସମ୍ପୂର୍ଣ୍ଣ ଭାବରେ ବ୍ୟକ୍ତିଗତ ବ୍ୟାଙ୍କଗୁଡ଼ିକର ଉପରେ ନିର୍ଭର କରେ ବୋଲି ଗଭର୍ଣ୍ଣର କହିଛନ୍ତି।
ବିଭିନ୍ନ ଗ୍ରାହକ ବର୍ଗରେ ନୂଆ ଆକାଉଣ୍ଟଧାରୀଙ୍କ ପାଇଁ ଆଇସିଆଇସିଆଇ ବ୍ୟାଙ୍କ ମାସିକ ହାରାହାରି ବାଲାନ୍ସ ଆବଶ୍ୟକତା ବୃଦ୍ଧି କରିଛି। ଯାହା ଗ୍ରାହକଙ୍କୁ ଚିନ୍ତାରେ ପକାଇଛି। ଏନେଇ ଗଭର୍ଣ୍ଣର କହିଛନ୍ତି ଯେ ଭାରତୀୟ ବ୍ୟାଙ୍କଗୁଡ଼ିକ ବର୍ତ୍ତମାନ ଭିନ୍ନ ଭିନ୍ନ ସୀମା ବଜାୟ ରଖିଛନ୍ତି। କିଛି ବ୍ୟାଙ୍କ ସର୍ବନିମ୍ନ ଜମା ରାଶି ୧୦,୦୦୦ ଟଙ୍କା ରଖିଥିବା ବେଳେ ଆଉ କିଛି ୨,୦୦୦ ଟଙ୍କା, ତେବେ କିଛି ବ୍ୟାଙ୍କର ଏପରି କୌଣସି ଆବଶ୍ୟକତା ନାହିଁ ବୋଲି ଶ୍ରୀ ମଲହୋତ୍ରା କହିଛନ୍ତି।
ଆଇସିଆଇସିଆଇର ନୂଆ ନିୟମ
ICICI ବ୍ୟାଙ୍କର ସଂଶୋଧିତ ନୀତି ଅଗଷ୍ଟ ୧ରେ କାର୍ଯ୍ୟକାରୀ ହୋଇଛି। ନୂଆ ଆଇନ ଅନୁସାରେ ମେଟ୍ରୋ ଏବଂ ସହରାଞ୍ଚଳ କେନ୍ଦ୍ରଗୁଡ଼ିକରେ ନୂଆ ସେଭିଂ ଖାତାଧାରକମାନଙ୍କୁ ମାସିକ ହାରାହାରି ୫୦,୦୦୦ ଟଙ୍କା ବାଲାନ୍ସ ନିଜ ଖାତାରେ ବଜାୟ ରଖିବାକୁ ପଡିବ। ଯେଉଁମାନେ ଏହା କରିବାରେ ବିଫଳ ହେବେ ସେମାନଙ୍କୁ ହ୍ରାସର ୬ ପ୍ରତିଶତ କିମ୍ବା ୫୦୦ ଟଙ୍କା ଫାଇନ ଲାଗିପାରେ। ଏଥିସହିତ, ବ୍ୟାଙ୍କ ଏବେ ପ୍ରତି ମାସରେ କେବଳ ତିନୋଟି ମାଗଣା ନଗଦ ଜମା କାରବାରକୁ ଅନୁମତି ଦେବ। ଏହାପରେ ଗ୍ରାହକମାନଙ୍କୁ ପ୍ରତି ଜମା ପାଇଁ ୧୫୦ ଟଙ୍କା ଦେୟ ନିଆଯିବ।
