ହିନ୍ଦୋଳ ଟ୍ରେଜେରି ଅଫିସ୍‌ର ବରିଷ୍ଠ କିରାଣୀ ମନୋରଞ୍ଜନ ସାହୁ ଗିରଫ, ୬୮ ଲକ୍ଷ ଟଙ୍କା ଘୋଟାଲା କରି ନିଲମ୍ବିତ ପରେ ଫେରାର ଥିଲେ

ଢେଙ୍କାନାଳ ୨୨।୧୧: ଢେଙ୍କାନାଳ ଜିଲ୍ଲା ହିନ୍ଦୋଳ ଟ୍ରେଜେରି ପୂର୍ବତନ ବରିଷ୍ଠ କିରାଣୀଙ୍କୁ ଗିରଫ କରିଛି ଭିଜିଲାନ୍ସ । ଗିରଫ ବରିଷ୍ଠ କିରାଣୀ ମନୋରଞ୍ଜନ ସାହୁ ବୋଲି ଜଣାପଡିଛି । ଶୁକ୍ରବାର ରାତିରେ ସଦର ଥାନା ଅନ୍ତର୍ଗତ ସାଇଁବିରି ଗାଁ ନିକଟରୁ ଗିରଫ କରିଛି ଢେଙ୍କାନାଳ ଭିଜିଲାନ୍ସ ।

ସୂଚନାଯୋଗ୍ୟ ଯେ, ମନୋରଞ୍ଜନ ହିନ୍ଦୋଳ ଟ୍ରେଜେରିରେ ଅବସ୍ଥାପିତ ସମୟରେ ଗତ ୨୦୨୩ରେ ୬୮ ଲକ୍ଷ ୮୫ ହଜାର ୪୯୭ ଟଙ୍କାର ଘୋଲା କରିଥିଲେ । କିଛି ଦିନ ସବ୍ ଟ୍ରେଜେରି ଅଫିସର ଭାବେ ଦାୟିତ୍ୱରେ ଥିବାବେଳେ କେତେକ ପେନସନଧାରୀଙ୍କ ଟଙ୍କାକୁ ନିଜ ଆକାଉଣ୍ଟକୁ ଟ୍ରାନ୍ସଫର କରି ହଡପ କରିଥିଲେ । ପରେ ତାଙ୍କୁ ଭୁବନ ବ୍ଲକ କାର୍ଯ୍ୟାଳୟକୁ ବଦଳି କରାଯାଇଥିଲା । ମାତ୍ର ଘୋଟାଲା ଧରାପଡିଯିବାରୁ ତାଙ୍କୁ ନିଲମ୍ବିତ କରାଯାଇ ମାମଲାକୁ ଭିଜିଲାନ୍ସକୁ ହସ୍ତାନ୍ତର କରାଯାଇଥିଲା ।

ଗତ ୨୦୨୪ ମସିହାରେ ଭିଜିଲାନ୍ସରେ ଏକ ମାମଲା ରୁଜୁ ହୋଇ ଢେଙ୍କାନାଳ ଭିଜିଲାନ୍ସ ପକ୍ଷରୁ ତଦନ୍ତ ଚାଲିଥିବା ବେଳେ ମନୋରଞ୍ଜନ ଫେରାର ହୋଇଯାଇଥିଲେ । ଫଳରେ ଭିଜିଲାନ୍ସ କୋର୍ଟରୁ ତାଙ୍କ ନାମରେ ଗିରଫ ୱାରେଣ୍ଟ ରହିଥିଲା । ତେବେ ମନୋରଞ୍ଜନ ତାଙ୍କ ଗାଁ ସଦର ଥାନା ଅନ୍ତର୍ଗତ ସାଇଁବିରି ଗ୍ରାମକୁ ଆସିଥିବା ବିଶେଷ ସୂତ୍ରରୁ ସୂଚନା ପାଇଥିଲା ଭିଜିଲାନ୍ସ । ଗାଁରୁ ଭୁବନେଶ୍ୱର ପଳାଇ ଯାଉଥିବା ବେଳେ ଗତ ରାତିରେ ସାଇଁବିରି ଗାଁ ନିକଟରୁ ଢେଙ୍କାନାଳ ଭିଜିଲାନ୍ସ ତାଙ୍କୁ କାବୁ କରି ଗିରଫ କରିଥିବା ଜଣାପଡ଼ିଛି । ଗିରଫ ପରେ ମନୋରଞ୍ଜନଙ୍କୁ ଭିଜିଲାନ୍ସ କୋର୍ଟକୁ ଚାଲାଣ କରାଯାଉଛି ।