ଜନ୍ମଦିନ ଉତ୍ସବରେ ଗୁଳିକାଣ୍ଡ : ୪ ମୃତ, ୧୦ ଗୁରୁତର

ନ୍ୟୁୟର୍କ, ୩୦/୧୧: ଗୁଳିକାଣ୍ଡରେ ଥରିଲା ଆମେରିକା । ଶନିବାର ରାତିରେ ଆମେରିକାର କାଲିଫର୍ଣ୍ଣିଆରେ ଗୁଳିକାଣ୍ଡ ଘଟିଛି । ଏଥିରେ ଚାରି ଜଣ ପ୍ରାଣ ହରାଇଥିବା ସୂଚନା ମିଳିଛି । ଏହାସହ ଅନ୍ୟ ୧୦ ଜଣ ଗୁରୁତର ହୋଇଛନ୍ତି । ପାରିବାରିକ କାର୍ଯ୍ୟକ୍ରମରେ ଗୁଳିକାଣ୍ଡ ଘଟିଥିବା ୟୁଏସ ସୁରକ୍ଷା ଅଧିକାରୀ କହିଛନ୍ତି ।

ରିପୋର୍ଟ ଅନୁସାରେ, କାଲିଫର୍ଣ୍ଣିଆର ଷ୍ଟକଟନ୍ ସହରରେ ଶନିବାର ଏକ ପରିବାରରେ ଜନ୍ମଦିନ ଉତ୍ସବ ଚାଲିଥିଲା । ଏଥିରେ ଅନେକ ବ୍ୟକ୍ତି ଯୋଗ ଦେଇଥିଲେ । କାର୍ଯ୍ୟକ୍ରମ ଚାଲୁଥିବା ବେଳେ ଜଣେ ବ୍ୟକ୍ତି ଆଖିବୁଜା ଗୁଳିମାଡ କରିଥିଲେ । ଘଟଣାସ୍ଥଳରେ ହିଁ ୪ ଜଣ ପ୍ରାଣ ହରାଇଥିଲେ । ଏହାସହ ଅନ୍ୟ ୧୦ ଜଣ ଗୁରୁତର ହୋଇଥିଲେ ।

ଖବର ପାଇ ପୋଲିସ ଘଟଣାସ୍ଥଳରେ ପହଁଚିଥିଲା । ଆହତଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଥିଲା । ସ୍ଥାନୀୟ ଅଧିକାରୀଙ୍କ କହିବାନୁସାରେ, ଅଘଟଣସ୍ଥଳକୁ ସିଲ୍ କରାଯାଇଛି । କାର୍ଯ୍ୟକ୍ରମ ହେଉଥିବା ସ୍ଥାନରେ ତଦନ୍ତ ଚାଲିଛି । ବିଭିନ୍ନ ଦିଗରୁ ପ୍ରମାଣ ଏକାଠି କରାଯାଉଛି । କେଉଁ କାରଣରୁ ଆକ୍ରମଣ ହୋଇଛି ଏବଂ କିଏ ଏହା କରିଛି ସେନେଇ କୌଣସି ସୂଚନା ଦିଆଯାଇ ନାହିଁ ।

ଗୁଳିକାଣ୍ଡ ପରେ ଅନେକ ଭିଡିଓ ଭାଇରାଲ ହେଉଛି । ଯେଉଁଥିରେ ବ୍ୟାପକ ପୋଲିସ ଫୋର୍ସ ଏବଂ ଆମ୍ବୁଲାନ୍ସ ଦେଖିବାକୁ ମିଳିଛି । କିଛି ପ୍ରତ୍ୟକ୍ଷଦର୍ଶୀ ଘଟଣା ସମୟରେ ସେହି ରାସ୍ତାରେ ଯାଉଥିବା ଏବଂ ଗୁଳିର ଶବ୍ଦ ଶୁଣିଥିବା କମେଣ୍ଟରେ ଲେଖିଛନ୍ତି । ଆଉ କେହି କେହି ଜନ୍ମଦିନ ଉତ୍ସବରେ ଗୁଳିକାଣ୍ଡ ଘଟିଥିବା କହିଛନ୍ତି ।